កំពត ៖ សង្វៀនប្រជល់មាន់មួយកន្លែង ដែលតែងលួចឆ្មក់លេងនៅក្នុងភូមិសាស្ត្រស្រុកកំពង់ត្រាច ត្រូវសមត្ថកិច្ចនៃស្នងការដ្ឋាននគរបាលខេត្តកំពត សហការជាមួយកម្លាំងនគរបាលស្រុក ចេញប្រតិបតិ្តការបង្ក្រាប ដោយឃាត់ខ្លួនមនុស្សចំនួន៦នាក់ ដកហូតម៉ូតូចំនួន១៨គ្រឿង អាគក២ក្បាល ព្រមទាំងសម្ភារៈមួយចំនួនទៀត។
ការបង្ក្រាបល្បែងប្រជល់មាន់នេះ បានប្រព្រឹត្តឡើងនៅរសៀលថ្ងៃទី២៤ខែមីនា ឆ្នាំ២០១៨ ត្រង់ចំណុចភូមិកោះខ្លូត ឃុំកំពង់ត្រាចខាងកើត ស្រុកកំពង់ត្រាច ខេត្តកំពត។
ពាក់ព័ន្ធនឹងការបង្ក្រាបសង្វៀនប្រជល់មាន់ខាងលើ សមត្ថកិច្ចឲ្យដឹងថា ក្នុងប្រតិបតិ្តការនេះ កម្លាំងបានដកហូតម៉ូតូចំនួន១៨គ្រឿង និងឃាត់ខ្លួនអ្នកញៀនល្បែងប្រជល់មាន់ចំនួន៦នាក់ រួមមាន៖ ១.ឈ្មោះ ខូវ មាវ ,២.ឈ្មោះ អ៊ុក ទន់ ,៣.ឈ្មោះ យិុន រឹម ,៤.ពេជ្រ ធឿន ,៥.ឈ្មោះ យេន ពី ,៦.ឈ្មោះ សុខ ពុទ្ធ។ទាំងអស់គ្នា រស់នៅក្នុងភូមិសាស្ត្រស្រុកកំពង់ត្រាច ខេត្តកំពត។
បច្ចុប្បន្ន ក្រុមអ្នកញៀនល្បែងជល់មាន់ទាំង៦នាក់ និងម៉ូតូចំនួន១៨គ្រឿង ព្រមទាំងមាន់គក២ក្បាល ក៏ដូចជាសម្ភារៈពាក់ព័ន្ធមួយចំនួនទៀត សមត្ថកិច្ចបាននិងកំពុងរៀបចំកសាងសំណុំរឿងចាត់ការតាមនីតិវិធីនៅថ្ងៃបន្ទាប់៕
សេង ណារិទ្ធ
