កំពត ៖ ដើម្បីបង្កបរិយាកាសនូវភាពសប្បាយរីករាយអំណរសាទរបុណ្យចូលឆ្នាំថ្មីប្រពៃណីជាតិខ្មែរខាងមុខជូនដល់ប្រជាពលរដ្ឋ ក៏ដូចជាភ្ញៀវទេសចរជាតិ-អន្តរជាតិ ព្រមទាំងជំរុញលើកកម្ពស់ វិស័យ ទេសចរណ៍ ក្នុងខេត្តឲ្យបានកាន់តែមានការរីកចម្រើននិងភាពទាក់ទាញថែមទៀតនោះ នៅព្រឹកថ្ងៃសុក្រ ០៧កើត ខែចេត្រ ព.ស ២៥៦១ត្រូវនឹងថ្ងៃទី២៣ខែមីនា ឆ្នាំ២០១៨រដ្ឋបាលខេត្តកំពត បានបើកកិច្ចប្រជុំគណៈកម្មការ រៀបចំកំពតសង្ក្រាន ក្រោមកិច្ចដឹកនាំប្រជុំដោយ លោក ជាវ តាយ អភិបាល នៃគណៈអភិបាលខេត្តកំពត។
កម្មវិធីដែលត្រៀមរៀបចំបុណ្យកំពតសង្ក្រានឆ្នាំ២០១៨នៅក្នុងកិច្ចប្រជុំដែលមានគណៈកម្មការចំនួន៦បានបង្ហាញពីតួនាទីភារកិច្ចទទួលខុសត្រូវ រួមមាន៖ កម្មវិធីក្រុងពាលីសុំសេចក្តីសុខចម្រើន-ពិធីទទួលទេវតាឆ្នាំថ្មី -ពីធីបើកនិងកាត់់ខ្សែបូរសម្ពោធពិព័រណ៍កំពតសង្ក្រាន នៅក្នុងរយៈពេលបីថ្ងៃបីយប់ នាឱកាសបុណ្យចូលឆ្នាំថ្មីប្រពៃណីជាតិខ្មែរនាឱកាសឈានចូលមកដល់ខាងមុខនេះ។ចំពោះកម្មវិធីដែលត្រូវត្រៀមរៀបចំរួមមាន របាំត្រុដិ ការរាំកំសាន្តរបស់ក្រុមយុវជន ការតាំងពិព័រណ៍ សមិទ្ធផលនិងផលិតផល ល្បែងប្រជាប្រិយខ្មែរ ការសំដែងសិល្បៈ ការប្រជុំតន្ត្រីនិងរាំកំសាន្តលក្ខណៈមហាជន ការទស្សនាពិព័រណ៍ប្រឡងម្ហូបអាហារនិងបង្អែម ការប្រកួតកីឡាមិត្តភាពរបស់ក្រុមយុវជន ពិធីស្រង់ព្រះ ការបាញ់កាំជ្រួច និងបណ្ដែតប្រទីប រួមនិងមានការជូនពានរង្វាន់ជ័យលាភីដល់បេក្ខជនក្នុងកម្មវិធីនីមួយៗនៃការប្រឡងនាឱកាសកំពតសង្ក្រាននេះផងដែរ។
មានប្រសាសន៍ក្នុងកិច្ចប្រជុំ លោក ជាវ តាយ អភិបាលខេត្តបាន ថ្លែងអំណរគុណចំពោះបណ្ដាក្រុមហ៊ុន និងសប្បុរសជននានាដែលបានចូលរួមឧបត្ថម្ភគាំទ្រ និងក៏បានអំពាវនាវ ឲ្យមានការសហការគ្នាឲ្យបានកាន់តែល្អថែមទៀត និងបានផ្ដាំផ្ញើ ដល់សមាជិកកិច្ចប្រជុំ ពិសេសគណៈកម្មការកំពតសង្ក្រាន នីមួយៗ ត្រូវយកចិត្តទុកដាក់សហការគ្នាអនុវត្តពីតួនាទីភារកិច្ចរៀងខ្លួន ដោយយកចិត្តទុកដាក់បំផុសការអប់រំផ្សព្វផ្សាយ ដល់មន្ទីរ អង្គភាព ក្រុមហ៊ុនឯកជន និងប្រជាពលរដ្ឋ ឲ្យមានការសហការចូលរួមតុបតែងកែលម្អ និងសម្អាត អនាម័យនៅតាមមន្ទីរ អង្គភាពនិងនៅតាមលំនៅដ្ឋានរៀងខ្លួន ជាពិសេសកងកម្លាំងប្រដាប់អាវុធទាំងអស់ត្រូវបង្កើនការការពាររក្សាសន្តិសុខ សុវត្ថិភាពជូនភ្ញៀវទេសចរណ៍ជាតិនិងអន្តរជាតិមកលម្ហែ កម្សាន្ត។ដើម្បីធ្វើឲ្យដំណើរការនៃការប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរក្នុងរយៈពេលបីថ្ងៃបីយប់ដែលត្រូវប្រព្រឹត្តទៅចាប់ពីថ្ងៃទី១៤ដល់ថ្ងៃ១៦ខែមេសាឆ្នាំ២០១៨ខាងមុខនេះប្រកបដោយភាពអធិកអធមស្របតាមទំនៀមទំលាប់និងប្រពៃណីជាតិខ្មែរយើងឲ្យមានប្រសិទ្ធភាពនិងទទួលបានជោគជ័យយ៉ាងត្រចះត្រចង់។
សូមជំរាបថា៖ ពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំចសំរិទ្ធស័ក ព.ស
២៥៦២ ដែលត្រូវនឹងថ្ងៃទី១៤ដល់
ថ្ងៃទី១៦ ខែមេសាឆ្នាំ២០១៨នេះ
ខេត្តកំពត ក៏ដូចបណ្ដាខេត្តមួយចំនួនទៀតបានត្រៀមធ្វើពិធីបុណ្យសង្ក្រាន ឆ្នាំថ្មីក្នុងដែនរដ្ឋបាលរបស់ខ្លួន ក្នុងគោលបំណង ដើម្បីជំរុញលើកកម្ពស់វិស័យទេសចរណ៍ ស្របទៅតាមបរិបទប្រទេសជាតិមានការអភិវឌ្ឍរីកចម្រើនមានសុខសន្តិភាពពេញលេញព្រមទាំងជីវភាពនិងការរស់នៅរបស់ប្រជាពលរដ្ឋប្រកបដោយសុខដុមរមនា៕
សេង ណារិទ្ធ
