កែប ៖ ផ្លូវជាតិលេខ33A តភ្ជាប់ពីទីប្រជុំជនសេះស ឆ្ពោះទៅកាន់ឆ្នេរកែប ដែលមានចម្ងាយប្រវែង ៧.៨០០ម៉ែត្រ បន្ទាប់ពីស្ថាបនារួចរាល់ប្រវែង៧.០៥០ម៉ែត្រ ហើយនៅសល់ប្រវែង៧៥០ទៀតនោះ មន្ទីរសាធារណការ និងដឹកជញ្ជូនខេត្តកែប នឹងបន្តស្ថាបនាឲ្យបានរួចរាល់ ក្នុងឆ្នាំ២០១៨។នេះជាការលើកឡើងពីមន្ត្រីជំនាញ ដែលកំពុងអនុវត្តការងារនៅចំណុចការដ្ឋានផ្លូវខាងលើ។
លោក ម៉ម ទូច ប្រធានមន្ទីរសាធារណការ និងដឹកជញ្ជូនខេត្តកែប បានប្រាប់ កម្ពុជាថ្មី នៅរសៀលថ្ងៃទី២១ខែមីនា ឆ្នាំ២០១៨នេះថា លោកនឹងខិតខំដឹកនាំមន្ត្រីជំនាញ អនុវត្តផ្លូវដែលនៅសេសសល់ប្រវែង ៧៥០ម៉ែត្រនេះឲ្យបានរួចរាល់ជាស្ថាពរ ក្នងឆ្នាំ២០១៨នេះ។លោកប្រធានបានបញ្ជាក់ទៀតថា ចម្ងាយផ្លូវសរុបមានប្រវែង ៧.៨០០ម៉ែត្រនេះ ត្រូវបានស្ថាបនាតាមគម្រោង ដែលមានប្រវែងទទឹងគិតបូករួមទាំងចិញ្ចើមផ្លូវសងខាងផងគឺមានប្រវែង៣៣ម៉ែត្រ។ក្នុងនោះយើងបានរៀបចំស្ពាន-ប្រព័ន្ធលូជាច្រើនកន្លែង និងធ្វើសួនចំពាក់កណ្តាលទ្រូងផ្លូវ សម្រាប់ដាំផ្កាចម្រុះពណ៌ និងដាំបង្គោលភ្លើងបំពាក់ដោយសឡា(ប្រើអំពូលឋាមពលព្រះអាទិត្យ)ទាំងអស់ផងដែរ។ជាមួយនេះដែរ ការថែទាំផ្លូវលោកបានចាត់ឲ្យមន្ត្រីអនុវត្តតាមតួនាទី ភារកិច្ចរបស់ខ្លួន ពិសេសការបាញ់ទឹកលាងសម្អាតនៅលើកំណាត់ផ្លូវជាតិលេខ33A និងការថែទាំផ្លូវ ថែសួនគ្រប់ខំណុចនៃដងផ្លូវជុំវិញខ្សែក្រវាត់ខេត្តទាំងមូល។
មហាជនក៏ដូចជាអ្នកដំណើរ មានអំណរសាទរខណៈដងផ្លូវជាតិលេខ33Aត្រូវបានស្ដាបនា ពង្រីកតួផ្លូវដ៏ធំទូលាយងាយស្រួលធ្វើចរាចរ ដោយពួកគេបានលើកឡើងថា កាលពីមុនដងផ្លូវមួយនេះមានសភាពតូចចង្អៀត ថែមទាំងមានជង្ហុកពិបាកធ្វើដំណើរណាស់ តែពេលនេះត្រូវបានស្ថាបនាមានភាពធំទូលាយ រលើបរលោង មានសុវត្ថិភាពពេលធ្វើដំណើរ គឺគ្មានការព្រួយបារម្ភទៀតទេ។
សូមបញ្ជាក់ថា៖ ផ្លូវជាតិលេខ33A ដែលមានប្រវែង៧.៨០០ម៉ែត្រ គឺជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តាមរយៈក្រសួងសាធារណការនិងដឹកជញ្ជូន រួមជាមួយនឹងការស្នើសុំពីសំណាក់ លោកអភិបាលខេត្តផងដែរ ហើយត្រូវបានបើកការដ្ឋានស្ថាបនាឡើងក្នុងអំឡុងឆ្នាំ២០១៣ ដែលមានមន្ទីរសាធារណការ និងដឹកជញ្ជូនខេត្តកែប ជាប្រតិបតិ្តករ។លើសពីនេះ ផ្លូវជាតិលេខ33A ត្រូវបានស្ថាបនាឡើងតាមលក្ខណៈបច្ចេកទេស ប្រកបដោយគុណភាព ពីសំណាក់ក្រុមបច្ចេកទេស ដែលមានបទពិសោធន៍ខ្ពស់ នៃមន្ទីរសាធារណការ និងដឹកជញ្ជូនខេត្តកែប ហើយសង្ឃឹមថា ផ្លូវមួយខ្សែយ៉ាងធំទូលាយដែលជាចំណងដៃរបស់ប្រមុខដឹកនាំប្រទេសសម្រាប់ផ្តល់ជូនខេត្តកែប នឹងបានរួចរាល់ជាស្ថាពរក្នុងពេលដ៏ខ្លីខាងមុខនេះ៕
សេង ណារិទ្ធ
