នាព្រឹកថ្ងៃទី១៩ ខែមីនា ឆ្នាំ២០១៨នេះ ឯកឧត្ដម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍ក្នុងសន្និសីទសារព័ត៌មានមួយស្តីពី ការចូលរួមលើកកម្ពស់សុវត្ថិភាពចរាចរណ៍ផ្លូវគោក នៅខេត្តសៀមរាប បានបញ្ជាក់ថា គ្រោះថ្នាក់ចរាចរណ៍ បានធ្វើឱ្យខូចខាតទ្រព្យសម្បត្តិរដ្ឋ និងឯកជន ប្រមាណ ៣០០លានដុល្លារអាម៉េរិក ក្នុងមួយឆ្នាំៗ ដែលបញ្ហានេះក្រៅពីបំផ្លិចបំផ្លាញទ្រព្យសម្បត្តិ ក្នុងនោះក៏បន្សល់ទុកនូវកុមារកំព្រា និងស្ត្រីមេម៉ាយផងដែរ ។
លោកស្រី MICHELL YEOH បានថ្លែងថា ដើម្បីលើកកម្ពស់ច្បាប់ចរាចរណ៍ផ្លូវគោកនៅកម្ពុជាក៏ដូចជានៅក្នុងតំបន់អាស៊ានទាំងមូល ត្រូវមានការចូលរួមពីប្រជាពលរដ្ឋក៏ដូចជាប្រព័ន្ធផ្សព្វផ្សាយ ជាពិសេសក្មួយៗសិស្សានុសិស្សត្រូវអោយពួកគេយល់ច្បាស់ពីច្បាប់ចរាចរណ៍ផ្លូវគោក។
នាឱកាសនោះដែរ ឯកឧត្ដម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានមានប្រសាសន៏ថាប្រមុខរាជរដ្ឋាភិបាលនៃព្រះរាជាណាចក្រកម្ពុជា បានខិតខំប្រឹងប្រែងខ្លាំងណាស់ក្នុងការលើកកម្ពស់ដើម្បីទប់ស្កាត់កាត់បន្ថយ គ្រោះថ្នាក់ចរាចរណ៍នេះដោយថវិកាយ៉ាងច្រើនសន្ធឹកសន្ធាប់ក្នុងមួយឆ្នាំៗ។
ឯកឧត្ដម ស៊ុន ចាន់ថុល បានកោតសរសើរខ្ពស់ចំពោះការសហការរវាងក្រុមហ៊ុន ព្រូដិនសលកម្ពុជា បានចូលរួមពង្រឹង ក៏ដូចការកាត់បន្ថយគ្រោះថ្នាក់ចរាចរណ៍ផ្លូវគោកនិងបានចូលរួមផ្តល់យោបល់ ដោយចុះធ្វើការអប់រំពីសុវត្ថិភាពចរាចរណ៍ផ្លូវគោកដោយផ្ទាល់នេះ។
ឯកឧត្ដម បានបញ្ជាក់ទៀតថា ជារៀងរាល់ថ្ងៃមានមនុស្សស្លាប់ដោយសារគ្រោះថ្នាក់ចរាចរណ៍ចំនួន ៥នាក់ និងរងរបួសចំនួន ១៥នាក់ ហើយក្នុងចំណោមអ្នកស្លាប់មាន ៧០ភាគរយ ធ្វើដំណើរដោយម៉ូតូ និងក្នុងចំណោម ៧០ភាគរយនោះទៀត មានចំនួន៨០ភាគរយដែលមិនពាក់មួកសុវត្ថិភាព ដូច្នេះសំណូមពរដល់អ្នកដំណើរទាំងអស់ ត្រូវធ្វើដំណើរដោយស្មារតីប្រុងប្រយ័ត្ន កុំប្រើប្រាស់គ្រឿងស្រវឹង កុំបើកបរលើសល្បឿនកំណត់ ត្រូវពាក់មួកសុវត្ថិភាព និងមិនត្រូវប្រើប្រាស់ថ្នាក់ញៀនជាដើម ។ល។
គួររម្លឹកថា គណៈកម្មាធិការជាតិសុវត្ថិភាពចរាចរណ៍ផ្លូវគោកកាលពីឆ្នាំ២០១៧ បានចែកមួកសុវត្ថិ ភាពចំនួន ៣ម៉ឺនមួយ ទៅដល់សិស្សានុសិស្ស ហើយគ្រោងចែក ៧ម៉ឺនមួកទៀតក្នុងឆ្នាំ២០១៨នេះ រួមជាមួយនឹងគម្រោងចែកក្រដាសផ្លាត ១លានសន្លឹក ចែកក្នុងឆ្នាំ២០១៨នេះ ដែលកាលពីឆ្នាំ២០១៧ បានចែកចំនួន ៣លាន៤សែនសន្លឹកទូទាំងប្រទេស ៕
ដោយ សារ៉េត(កម្ពុជាអភិវឌ្ឍ)
