កំពត ៖ សពបុរសម្នាក់ដែលស្លាប់ដោយសារលង់ទឹកកាលពីរសៀលម្សិលមិញនោះ ត្រូវបានកម្លាំងសមត្ដកិច្ចនៃស្នងករនគរបាលខេត្តកំពត ផ្តល់កា្តមឈូស ព្រមទាំងអង្ករចំនួន២បាវស្មើនឹង១០០គីឡូក្រាម នៅព្រឹកថ្ងៃទី២០ខែមីនា ឆ្នាំ២០១៨នេះ ដោយសម្ភារៈទាំងនេះ ជាអំណោយដ៏ថ្លៃថ្លារបស់ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត ផ្តល់ជូនដល់ក្រុមគ្រួសារសព ឈ្មោះ សុខ វ៉ា ភេទប្រុស អាយុ៣៥ឆ្នាំ មានទីលំនៅ ក្នុងភូមិច្រនៀងទេ ឃុំភ្នំប្រាសាទ ស្រុកកំពង់ត្រាច ខេត្តកំពត ដែលស្លាប់ដោយសារលង់ទឹក កាលពីរសៀលថ្ងៃទី១៩ខែមីនា ឆ្នាំ២០១៨ ហើយនេះជាមឈូសលើកទី១១៤ ដែលលោកស្នងការខេត្តកំពតតែងតែជួយឧបត្ថម្ភដល់សពជនក្រីក្រទូទាំងខេត្ត ។ តាមរយៈនេះដែរ លោកអូន ខន អភិបាល នៃគណៈអភិបាលស្រុកកំពង់ត្រាច រួមជាមួយលោក សេង សុគន្ធចាត់ អធិការនគរបាលស្រុកកំពង់ត្រាច ក៏បានពាំនាំនូវថវិកាចំនួន៣០មីុនរៀលសម្រាប់ប្រគល់ដល់ក្រុមគ្រួសារសព ដើម្បីជួយរំលែកទុក្ខផងដែរ។
សូមជម្រាបថា កាលវេលាម៉ោង១៤និង១៥នាទី រសៀល ថ្ងៃទី១៩ខែមីនា ឆ្នាំ២០១៨ មានការភ្ញាក់ផ្អើល ខណៈជនរងគ្រោះខាងលើ ឈ្មោះ សុខ វ៉ា ភេទ្រុស អាយុ៣៥ឆ្នាំ ចុះអូសឆឹបក្នុងស្រះ ដែលស្ថិតនៅក្នុងភូមិច្រនៀងទេ ឃុំភ្នំប្រាសាទ ស្រុកកំពង់ត្រាច ខេត្តកំពត ស្រាប់តែមិនឃើញគាត់ងើបឡើង ពីក្នុងទឹកវិញ ។ បន្ទាប់ពីបាត់ខ្លួន សាច់ញាតិព្រមទាំងអ្នកភូមិ ក៏នាំគ្នាចុះរាវរកជនរងគ្រោះដោយប្រើរយៈពេលជិតកន្លះម៉ោងទើបរាវរកឃើញសពជនរងគ្រោះនៅក្នុងស្រះទឹកនោះ។
ក្រោយពីកើតហេតុ អ្នកភូមិបាននិយាយថា បុរសរងគ្រោះរស់ក្នុងសកថានភាពយ៉ាប់យឺន រកបានព្រឹកខ្វះល្ងាច មានកូនតូចៗ ឯប្រពន្ធពិកាភ្នែក និងមានម្តាយចាស់ជរា ថែមទាំងមានជីវភាពដ៏លំបាកបំផុត ពោលគឺការរស់នៅត្រូវពឹងផ្អែកតែលើបុរសជាប្តី ស្វែងរកកម្រៃមកចិញ្ចឹមគ្រួសារទាំងមូលតែម្តង ប៉ុន្តែពេលនេះបុរសជាប្តី ជាឪពុក បានលាចាកលោកបាត់ទៅហើយ តើមានអី្វត្រូវពឹងផ្អែកទៀត។
ជាមួយនេះដែរ លោកអភិបាលស្រុកកំពង់ត្រាច គឺលោកអូន ខន ក៏សូមជួយរំលែកទុក្ខនិងចូលរួមសោកស្តាយ ហើយក៏បានផ្តាំផ្ញើដល់ក្រុមគ្រួសារសព ត្រូវពង្រឹងស្មារតីឲ្យបានរឹងមាំ និងឲ្យមានការប្រុងប្រយ័ត្នកុំឲ្យកូនៗចុះក្នុងទឹកត្រពាំងផ្តាសផ្តាស ក្រែងមានកើតជាករណីលង់ស្លាប់ដូចឪពុក-ប្តី ខាងលើនេះ៕
សេង ណារិទ្ធ
