ខេត្តបន្ទាយមានជ័យ ៖ នៅព្រឹកថ្ងៃទី១៨ខែមីនាឆ្នាំ២០១៨នេះ លោកឧកញ៉ា សាន ស៊ានហូអភិបាលនៃគណៈអភិបាលក្រុងប៉ោយប៉ែត បានដឹកនាំមន្ត្រីក្រោមឱវាទជាច្រើនរូបបន្តដាក់របាំងថ្មពុះចែកទ្រូងផ្លូវ ដើម្បីកាត់បន្ថយនូវការកកស្ទះនិងគ្រោះថ្នាក់ចរាចរណ៍។
សូមជម្រាបដែរថា ៖ ការដាក់របាំងថ្មពុះចែកទ្រូងផ្លូវនេះគឺជាលើកទី២ហើយ ដោយលើកទី១គឺចាប់ផ្ដើមពីចំណុចទល់មុខទីស្នាក់ការគយនិងរដ្ឋាករ រហូតទៅដល់ផ្សាររ៉ានិងលើកទី២បន្តពីផ្សាររ៉ា រហូតទៅដល់វត្តបាលិលេយ្យ សង្កាត់ប៉ោយប៉ែត ។ បើតាមលោកឧកញ៉ា សាន ស៊ានហូ អភិបាលនៃគណៈអភិបាលក្រុងប៉ោយប៉ែតបានប្រាប់អ្នកសារព័ត៍មានឲ្យដឹងថា ៖ ការដាក់របាំងថ្មពុះចែកទ្រូងផ្លូវនេះគឺជាលើកទី២ហើយ ដោយលើកទី១ដាក់បានចំនួន១០០ដុំ និងលើកទី២នេះក៏បានចំនួន១០០ដុំដែរ។
លោកឧកញ៉ាបានបន្តថា ៖ក្នុងមួយដុំចំណាយថវិកាអស់ចំនួន៣៦០០បាត(លុយបាត)។លោកឧកញ៉ាបានបញ្ជាក់ថា៖លោកនឹងរៀបចំបន្តទៀតជាបណ្ដើរបណ្ដើរតាមដំណាក់កាល ដោយចាប់ពីចំណុចរង្វង់មូលក្រុងប៉ោយប៉ែតរហូតទៅដល់ចំណុចផ្សារកណ្ដាល ស្ថិតនៅក្នុងភូមិគីឡូម៉ែត្រលេខ៤ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ។
ទាក់ទិនទៅនឹងសកម្មភាពរបស់លោកឧកញ៉ាសាន ស៊ានហូ អភិបាលនៃគណៈអភិបាលក្រុងប៉ោយប៉ែត ត្រូវបានប្រជាពលរដ្ឋក៏ដូចជាមហាជនលើកឡើងថា៖តាំពីលោកឧកញ៉ា ឡើងជាអភិបាលក្រុងប៉ោយប៉ែតមកនោះគេសង្កេតឃើញថានៅក្នុងក្រុងប៉ោយប៉ែតទាំងមូលមានការរៀបចំបានល្អ ទាំងសន្តិសុខ ចរាចរណ៍ រៀបចំប្រព័ន្ធលូ ហេដ្ឋារចនាសម្ព័ន្ធនិងបានចុះជួយដោះស្រាយ ទុក្ខលំបាកជូនដល់ប្រជាពលរដ្ឋបានច្រើនផងដែរ ពិសេសជាងនេះទៅទៀតគឺផ្នែកអនាម័យតែម្ដង៕
