កំពត ៖ ជនសង្ស័យប្រុស ស្រី បួននាក់ដែលពាក់ព័ន្ធនឹងករណីគ្រឿងញៀន ត្រូវបានសមត្ថកិច្ចស្នងការនគរបាលខេត្ត សហការជាមួយកម្លាំងនគរបាលស្រុកទឹកឈូ ធ្វើការបង្ក្រាបបានទាំងសម្បុក ដោយដកហូតវត្ថុតាងថ្នាំញៀនចំនួន៦កញ្ចប់ ក្នុងនោះមានមួយកញ្ចប់ធំ។
ប្រតិការបង្ក្រាបខាងលើបានធ្វើឡើងកាលពីវេលាម៉ោង១១និង៣០នាទីព្រឹក ថ្ងៃទី១០ខែមីនា ឆ្នាំ២០១៨ ត្រង់ចំណុចភូមិព្រៃតុម្ព ឃុំព្រៃឃ្មុំ ស្រុកទឹកឈូ ខេត្តកំពត ខណៈមានបណ្តាញសម្ងាត់រាយការណ៍ ទាក់ទងនឹងករណីប្រើប្រាស់ចែកចាយថ្នាំញៀននៅភូមិសាស្ត្រខាងលើ។
មន្ត្រីនគរបាលបានប្រាប់ឲ្យដឹងថា ជនសង្ស័យទាំងបួននាក់ រួមមាន៖ទី១-ឈ្មោះ ចាយ សឿ ភេទប្រុស អាយុ៤២ឆ្នាំ ,ទី២-ឈ្មោះ ស៊ុន លីម ភេទស្រី អាយុ៤១ឆ្នាំ។អ្នកទាំង២រស់នៅក្នុងភូមិព្រៃតុម្ព ឃុំព្រៃឃ្មុំ ស្រុកទឹកឈូ ។ទឺ៣-ឈ្មោះ ចាន់ មន្នីវេហា ភេទប្រុស អាយុ២៣ឆ្នាំ , និងទី៤-ឈ្មោះ តាត់ សុវណ្ណ ភេទប្រុស អាយុ២៣ឆ្នាំ ទាំងពីរនាក់រស់នៅភូមិកំពង់គ្រែង ឃុំកំពង់គ្រែង ស្រុកទឹកឈូ ខេត្តកំពត។សមត្ថកិច្ចបានបន្តទៀតថា ការឈានទៅបង្ក្រាបបទល្មើសគ្រឿងញៀនទទួលបានជោគជ័យនេះ បន្ទាប់ពីកម្លាំងបានទទួលសេចក្តីរាយការណ៍ពីប្រភពសម្ងាត់ កាលពីវេលាម៉ោង១១និង៣០នាទីព្រឹក ថ្ងៃទី១០ខែមីនា ឆ្នាំ ២០១៨ ក្រោមបញ្ជាផ្ទាល់របស់លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត ទើបកម្លាំងស្នងការបានសហការជាមួយនគរបាលស្រុកទឹកឈូ បានចុះឆែកឆេរលំនៅឋានមួយកន្លែង ស្ថិតក្នុងភូមិព្រៃតុម្ព ឃុំព្រៃឃ្មុំ ដោយរកឃើញគ្រឿងញៀនចំនួន៥កញ្ចប់តូចនិង១កញ្ចប់ធំ ទើបនាំយកវត្ថុតាងថ្នាំញៀន និងឃាត់ខ្លួនជនសង្ស័យទាំងបួននាក់មកសាកសួរតែម្តង។
បច្ចុប្បន្ន ជនសង្ស័យរួមនឹងវត្ថុតាង សមត្ថកិច្ចបាននិងកំពុងកសាងសំណុំរឿងដើម្បីចាត់ការតាមនីតិវិធីច្បាប់៕
សេង ណារិទ្ធ
