កាលពីថ្ងៃទី៨ ខែមីនា ឆ្នាំ២០១៨ ដឹកនាំដោយលោក សុខ សម្បត្តិ អភិបាលនៃគណៈអភិបាលខណ្ឌព្រែកព្នៅ បានដឹកនាំយកថវិការបស់លោក ឃួង ស្រេង អភិបាលនៃគណៈអភិបាលរាជធានីភ្នំពេញ ទៅសួរសុខទុក្ខលោក អ៊ឹម រិទ្ធី ភេទប្រុស អាយុ៣៦ឆ្នាំ មុខរបរនគរបាលជាតិ (នាយប៉ុស្តិ៍ព្រែកព្នៅស្តីទី) ដែលត្រូវជនញៀនថ្នាំកាប់បាក់ដៃ កំពុងសម្រាកព្យាបាលជំងឺនៅមន្ទីរពេទ្យកាល់ម៉ែត្រ ។
លោក ឃួង ស្រេង បានផ្តល់ថវិការចំនួន ២០០ដុល្លា លោក សុខ សម្បត្តិ ថវិកាចំនួន ២០០ ដុល្លារ និងទឹកដោះឆៅចំនួន៤ឡូ លោក ឈិន គឹមធុយ ថវិកាចំនួន ១ ០០០ ០០០ រៀល។
លោក អ៊ឹម រិទ្ធី នាយប៉ុស្តិ៍នគរបាលព្រែកព្នៅស្តីទី ត្រូវបានជនសង្ស័យញៀនថ្នាំកាប់ដាច់ដៃ កាលពីវេលាម៉ោង១០យប់ ថ្ងៃទី៧ ខែមីនា ឆ្នាំ២០១៨ ត្រង់ចំណុចមុខផ្ទះគ្មានលេខ ផ្លូវជាតិ លេខ៥ ភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ខណៈដែល ជនរងគ្រោះទៅអន្តរាគមន៍ហាមឃាត់ជនសង្ស័យប្រើហិង្សាទៅលើម្តាយបង្កើត។
សមត្ថកិច្ចបានឲ្យដឹងថា ជនសង្ស័យឈ្មោះ អំ ដាលីន ភេទប្រុស អាយុ៣០ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅ ផ្ទះគ្មានលេខ ភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។ ចំណែកជនរងគ្រោះឈ្មោះ អ៊ឹម រិទ្ធី ភេទប្រុស អាយុ៣៦ឆ្នាំ ជនជាតិខ្មែរ មុខរបរនគរបាលជាតិ (នាយប៉ុស្តិ៍ព្រែកព្នៅស្តីទី) មានទីលំនៅ ផ្ទះគ្មានលេខ ផ្លូវបេតុង ភូមិកណ្តាល សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
សមត្ថកិច្ចបានឲ្យដឹងថា មុនពេលកើតហេតុ មានប្រជាពលរដ្ឋល្អបានផ្តល់ព័ត៌មានថា មានករណីហិង្សាក្នុងគ្រួសារកើតឡើងត្រង់ចំណុចផ្ទះកើតហេតុខាងលើ ភ្លាមនោះជនរងគ្រោះបានដឹកនាំកម្លាំងចុះដល់ត្រង់កន្លែងកើតហេតុ ពេលទៅដល់ស្រាប់តែជនសង្ស័យស្ទុះយកកាំបិតផ្គាក់មកកាប់ទៅលើជនរងគ្រោះ បណ្តាលឲ្យដាច់កដៃខាងឆ្វេង ភ្លាមនោះប្រជាពលរដ្ឋដែលឈរមើលនៅក្បែរនោះ ក៏បាននាំគ្នាមកជួយឃាត់ជនសង្ស័យ និងបានវាយជនសង្ស័យបណ្តាលឲ្យបែកក្បាលហូរឈាម រួចប្រគល់ឲ្យកម្លាំងល្បាតរបស់អធិការដ្ឋាន ចំណែកឯជនរងគ្រោះត្រូវបានកម្លាំងសមត្ថកិច្ចយើង និងក្រុមគ្រួសារបញ្ជូនទៅមន្ទីរពេទ្យកាល់ម៉ែត្រដើម្បីព្យាបាល។
តាមប្រជាពលរដ្ឋនិយាយថា ជនសង្ស័យខាងលើ គឺជាមនុស្សញៀនថ្នាំ ហើយត្រូវក្រុមគ្រួសារបញ្ជូនទៅមណ្ឌលកែប្រែ។ ក្រោយមកជនសង្ស័យរូបនេះបានប្រើល្បិចធ្វើជាឈឺឱ្យគេបញ្ជូនទៅមន្ទីរពេទ្យស្រាប់តែបានរត់គេចខ្លួនបាត់។ លុះនៅថ្ងៃកើតហេតុ ជននេះបានមករករឿងក្រុមគ្រួសារយ៉ាងខ្លាំង ហើយក៏មានអ្នកជិតខាងជួយរាយការណ៍ទៅកម្លាំងសមត្ថកិច្ច ទើបត្រូវលោកមេប៉ុស្តិ៍ដែលជាជនរងគ្រោះដឹកនាំកម្លាំចុះទៅអន្តរាគមន៍នៅផ្ទះកើតហេតុ។ គ្រាន់តែក្រឡេកឃើញកម្លាំងសមត្ថកិច្ចភ្លាម ជននោះក៏ទាញកាំបិតដេញកាប់រហូតត្រូវជនរងគ្រោះរងរបួសតែម្តង ត្រូវបញ្ជូនទៅសង្គ្រោះនៅមន្ទីរពេទ្យផងដែរ។ ភ្លាមៗជនសង្ស័យ ត្រូវបានឃាត់ខ្លួននៅអធិការដ្ឋាននគរបាលខណ្ឌព្រែកព្នៅ ដើម្បីកសាងសំណុំរឿងបញ្ជូនទៅតុលាការ៕
