កំពត ៖ ប្រជាពលរដ្ឋរស់នៅទីប្រជុំជននៃឃុំអង្គសុរភី ស្រុកកំពង់ត្រាច ខេត្តកំពត បាននាំគ្នារិគន់ចំៗមកលើអាជ្ញាធរនិងសមត្ថកិច្ចមូលដ្ឋានថា ហាក់ដូចជាមិនខ្វាយខ្វល់ពីសុខទុក្ខរបស់ប្រជាពលរដ្ឋក្នុងតំបន់ឡើយ។
ពួកគាត់បានលើកហេតុផលថា កន្លងមកក្នុងមូលដ្ឋាននេះឧស្សាហ៍មានកើតជម្លោះនិងករណីបង្កហិង្សាជាញឹកញាប់ ដោយករណីបែបនេះបានកើតឡើងក្បែរក្លៀកនិងច្រមុះ របស់អាជ្ញាធរនិងសមត្ថកិច្ចក្នុងតំបន់ខាងលើ តែបែរជាគ្មានមុខអស់លោកទាំងនោះមករេរាំងឬមានវិធានការបង្កាទប់ស្កាត់ឡើយ។ជាងនេះទៅទៀត ផ្នែកបរិស្ថាននៅភូមិសាស្ត្រចំណុចផ្លូវបំបែកជិតប៉ុស្តិ៍រដ្ឋបាល ហាក់មានសភាពអាប់អួរ ដោយកន្លងមកគេតែងតែឃើញបុគ្គលមួយផ្នែកតូចជញ្ជូនកាកសំណល់រាវរឹងគ្រប់ប្រភេទមកចាក់គរ ក្បែរចិញ្ចើមផ្លូវ ដែលបង្កទៅជាមានចំហាយក្លិនសាយភាយបង្ករំខានដល់អ្នកដំណើរ ពិសេសអ្នករស់នៅក្បែរចំណុចនោះតែម្តង។
ប្រជាពលរដ្ឋខាងលើបានបញ្ជាក់អះអាងថា អាជ្ញាធរ ក៏ដូចជាសមត្ថកិច្ចមូលដ្ឋានក្នុងតំបន់ខាងលើ ហាក់ដូចជាអសកម្មការងារ ហើយមិនសូវខ្វាយខ្វល់ពីសុខទុក្ខរបស់ប្រជាពលរដ្ឋនោះឡើយ ចង់អ្នកណាមានបញ្ហាអី្វ ក៏មិនឈឺក្បាលវិលមុខដែរ ជួនកាលមានជម្លោះបែកផ្សែង ជេរគ្នាផ្អើលស្រុក ប៉ុន្តែមិនដែលឃើញអស់លោក អាជ្ញាធរ ឬលោកសមត្ថកិច្ចណាមកអន្តរាគមន៍នោះទេ ឬអស់លោករង់ចាំឲ្យពលរដ្ឋប្រកាប់ប្រចាក់គ្នាមានរបួសស្នាមនិងចង់ឲ្យមានបទល្មើសកើតឡើងទើបបង្ក្រាបយកស្នាដៃឬយ៉ាងណា?។
ជុំវិញភាពអសកម្មដូចខាងលើ ប្រជាពលរដ្ឋក្នុងភូមិសាស្ត្រឃុំអង្គសុរភីសំណូមពរដល់លោក សេង សុគន្ធចាត់ អធិការនគរបាលស្រុក និងលោក អូន ខន អភិបាល នៃគណៈអភិបាលស្រុកកំពង់ត្រាច មេត្តាជួយជំរុញដល់អាជ្ញាធរក្រោមឱវាទកុំឲ្យខ្ជិលច្រអូសពេក ព្រោះកន្លងមកអស់លោកហាក់ដូចជាស្ពឹកស្រពន់ណាស់ យកល្អគួរហៅទៅស្រឿសរសៃចេញម្តងទើបប្រសើរ។
គួរកត់សម្គាល់ថា៖ កាលពីថ្ងៃទី២៨ខែកុម្ភៈ ឆ្នាំ២០១៨កន្លងមក រាជរដ្ឋាភិបាលបានប្រគល់ពានរង្វាន់ ជ័យលាភីទីក្រុងស្អាតសម្រាប់ខេត្តកំពត។ការសម្រេចផ្តល់នូវជ័យលាភីនេះ ដោយសារខេត្តកំពត ត្រូវបានកែលម្អឲ្យក្លាយជាតំបន់មួយប្រកបដោយសោភ័ណភាព មានសម្រស់ស្រស់ត្រកាល មាននិរន្តរភាពប្រកបដោយភាពរីកចម្រើន ទាក់ទាញ ទាំងសក្តានុពលសេដ្ឋកិច្ច ទាំងសក្តានុពលទេសចរណ៍ ពិសេសបរិស្ថានធម្មជាតិនិងការធ្វើបដិសណ្ឋារកិច្ច ។ ដូច្នេះដើម្បីឲ្យស័ក្តិសមនឹងឈ្មោះដ៏ល្បីល្បាញ ទីក្រុងស្អាត”ផ្ការំដួលបីទង”យើងត្រូវរួមគ្នាថែរក្សាបរិស្ថានឲ្យបានស្អាតជានិច្ច សូមកុំបោះចោលសំរាម និងកាកសំណល់រប៉ាត់រប៉ាយ ឬបំពុលបរិស្ថានក្បែរចិញ្ចើមផ្លូវ ។ បរិស្ថានល្អ ប្រជាពលរដ្ឋរស់នៅប្រកបដោយផាសុខភាព គ្មានជំងឺបៀតបៀន។ការធ្វើអនាម័យ សម្អាតបរិស្ថាន ផ្តើមដោយសារយើងទាំងអស់គ្នា ដោយយើងមិនអាចមើលរំលងបានឡើយ៕
សេង ណារិទ្ធ
