បន្ទាប់ពីស្ងប់ស្ងាត់មួយរយៈឈ្មួញឈើដ៏ធំនៅភូមិភាគឥសាន្តឈ្មោះចែច្រឹបនិងប្អូនប្រុសឈ្មោះ ថានចាប់រកស៊ីបទល្មើសព្រៃឈើឡើងកក្រើកប្រជាពលរដ្ឋនិងសមត្ថកិច្ចខេត្តរតនគិរី ។ប្រភពពីមន្ត្រីសមត្ថកិច្ចតូចតាចក្នុងខេត្តរតនគិរី បានឲ្យដឹងថា ឈ្មួញឈ្មោះ វ៉ាន់ ចន្នី ហៅចែច្រឹប និងប្អូនប្រុសឈ្មោះ ថាន កំពុងប្រមូលទិញឈើនិងសម្រុកដឹកជញ្ជូនឈើចេញទៅស្រុកយួនតាមច្រករបៀងខ្លាធំ និងច្រករបៀងអូរថ្ម ស្រុកអូរយ៉ាដាវ យ៉ាងរលូន។ ការដែលឈ្មួញឈ្មោះ ចែច្រឹប និងប្អូនប្រុសឈ្មោះ ថាន មានការដឹកជញ្ជូនឈើគឺមានការឃុបឃិតជាមួយមន្ត្រីរដ្ឋបាលព្រៃឈើនិងសមត្ថកិច្ចពាក់ព័ន្ធដទៃទៀត។ ជាពិសេសសមត្ថកិច្ចនៅតាមច្រករបៀង។ លោក កែប កត់ នាយខណ្ឌរដ្ឋបាលព្រៃឈើខេត្តរតនគិរី ត្រូវប្រភពខ្លះបង្ហើបឲ្យដឹងថា គឺជាខ្នងបង្អែកដ៏រឹងមាំរបស់ឈ្មួញឈ្មោះ ចែច្រឹប និងបក្ខពួកដែលកំពុងធ្វើសកម្មភាពដឹកជញ្ជូនឈើចេញទៅស្រុកយួនទាំងយប់ទាំងថ្ងៃ។
តាមការអះអាងរបស់ប្រជាពលរដ្ឋរស់នៅឃុំសេដា ស្រុកលំផាត់ ខេត្តរតនគិរី បានឲ្យដឹងថា ឈ្មួញឈ្មោះ ចែច្រឹប និងបក្ខពួកចូលមកប្រមូលទិញឈើប្រភេទឈ្លីក និងប្រភេទសុក្រំ ដឹកចេញពីមូលដ្ឋានពួកគាត់យ៉ាងរលូន ព្រោះគ្មានមន្ត្រីជំនាញឬសមត្ថកិច្ចពាក់ព័ន្ធចាត់វិធានការទបស្កាត់ឡើយខណៈមានប្តីជាមេប៉ុស្តិ៏ច្រករបៀងខ្លាធំ។ ប្រភពពីសមត្ថកិច្ចពាក់ព័ន្ធបានឲ្យដឹងថា ប្អូនប្រុសចែច្រឹប ឈ្មោះ ថាន បានចេញមុខរត់ការសម្របសម្រួលជាមួយមន្ត្រីជំនាញនិងសមត្ថកិច្ចពាក់ព័ន្ធជាច្រើនស្ថាប័នដើម្បីដឹកជញ្ជូនឈើចេញទៅស្រុកយួនតាមច្រករបៀងខ្លាធំ និងច្រករបៀងអូរថ្ម ស្រុកអូរយ៉ាដាវ។ ប្រការនេះហើយដែលធ្វើឲ្យព្រៃឈើក្នុងតំបន់ដែនជម្រកសត្វព្រៃលំផាត់ ត្រូវប្រឈមនឹងការបំផ្លាញយ៉ាងមហន្តរាយព្រោះឈ្មួញឈ្មោះ ចែច្រឹប និងបក្ខពួកកំពុងប្រើប្រាស់រថយន្តកែច្នៃជាច្រើនគ្រឿងសម្រាប់ដឹកជញ្ជូនឈើពីឃុំសេដា ស្រុកលំផាត់ ចេញទៅស្រុកយួនតាមច្រករបៀងក្នុងស្រុកអូរយ៉ាដាវ ។
ប្រភព បានឲ្យដឹងទៀតថា រយៈពេលប៉ុន្មានថ្ងៃកន្លងទៅនេះឈ្មួញឈ្មោះ ចែច្រឹប និងប្អូនប្រុសឈ្មោះ ថាន បានប្រើប្រាស់រថយន្តកែច្នៃរាប់សិបគ្រឿងសម្រាប់ដឹកជញ្ជូនចេញពីស្រុកលំផាត់ ចេញទៅស្រុកយួន។ ប្រភពបានឲ្យដឹងទៀតថា ឈ្មួញឈ្មោះ ចែច្រឹប និងបក្ខពួក ដឹកជញ្ជូនឈើចេញពីតំបន់អូរជីប អូរក្រែង អូរបោក សហគមន៍កែងសាន់ កាត់តាមភូមិតាកុកព្នង ភូមិដតូច ហើយយកទៅលក់ឲ្យឈ្មួញយួនតាមច្រករបៀងខ្លាធំនិងច្រករបៀងអូរថ្ម ស្រុកអូរយ៉ាដាវ ដោយគ្មានសមត្ថកិច្ចណាហ៊ានចាត់វិធានការបង្ក្រាបនោះទេ។ សូម្បីតែមន្ត្រីគណៈកម្មការបង្ក្រាបនិងទប់ស្កាត់បទល្មើសព្រៃឈើដែលកំពុងឈរជើងនៅខេត្តរតនគិរី ក៏មិនមិនបង្ក្រាបឈ្មួញឈ្មោះ ចែច្រឹប នោះដែរ។ហើយចាត់ទុកឈ្មួញឈើរូបនេះជាប្រភពចំណូលដ៏សំខាន់សម្រាប់ពួកគេទៅវិញ ។ អង្គភាពយើងរង់បកស្រាយរាល់ធើ្វការបើមានពីសាម៉ីពាក់ព័ន្ធ៕
