ខេត្តកំពង់ស្ពឺ ៖ ឯកឧត្តម នាយឧត្តមសេនីយ៍ សែម សុវណ្ណនី ថ្លែងថា មេទ័ពកងកម្លាំងមួកខៀវកម្ពុជាបានលើកកម្ពស់សិទ្ធនារី និងកោតសរសើរពីពលីកម្មរបស់កងយោធានារីមួក ខៀវកម្ពុជាដែលមានសិទ្ធ និងសមត្ថភាពដូចបុរសក្នុងកិច្ចចូលរួមបេសក កម្មរក្សាសន្តិភាពរបស់អង្គការសហប្រជាជាតិ(អ.ស.ប)ដោយសម្រេចបានលទ្ធផលស្នាដៃជាបន្តបន្ទាប់ជូនជាតិមាតុភូមិ។ ឯកឧត្តម នាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិរក្សាសន្តិភាព និងជាអគ្គនាយកមជ្ឈមណ្ឌលជាតិ រក្សា សន្តិភាព ថ្លែងថា ៖“កម្លាំងមួកខៀវនារីកម្ពុជា គឺមានសិទ្ធិស្មើគ្នាដូចបុរសក្នុងការចូលរួមបំពេញបេសកកម្មអ.ស.ប” ។
ការថ្លែងបែបនេះ ក្នុងពិធីអបអរសាទរខួបលើកទី១០៧ នៃទិវាសិទ្ធិនារីអន្តរជាតិ ៨មីនា ក្រោមប្រធានបទ ”ស្ត្រីរួមគ្នារក្សា សន្តិភាពដើម្បីអភិវឌ្ឍន៍ជាតិ”កាលពីព្រឹកថ្ងៃទី៦ ខែមីនា ឆ្នាំ២០១៨ នៅវិទ្យាស្ថានហ្វឹកហ្វឺនកងកម្លាំងរក្សាសន្តិភាព ឧដុង្គ ខេត្តកំពង់ស្ពឺ ។
កម្លាំងនារីកម្ពុជាកាលពីឆ្នាំ២០១៧កន្លងទៅត្រូវបានអគ្គលេខាធិការអ.ស.បផ្តល់ចំណាត់ថ្នាក់លេខ១០ លើ១២១ប្រទេស ដែលបានបរិច្ចាគកងកម្លាំងច្រើនជាងគេក្នុងតំបន់អាស៊ី ។កម្ពុជាទទួលបានចំណាត់ថ្នាក់លេខ២ស្ទួនជាមួយប្រទេសម៉ុងហ្គោលី និងប្រទេសក្នុងតំបន់អាស៊ាន ។ កម្ពុជាត្រូវបានជាប់ចំណាត់ថ្នាក់លេខ១ ក្នុងការបញ្ជូនកម្លាំងនារីទៅក្នុងបេសកកម្មអ.ស.ប”។
លោកស្រីឧត្តមសេនីយ៍ឯក ហេ សៀកឡេង អគ្គនាយករងមជ្ឈមណ្ឌលជាតិរក្សាសន្តិភាពបានបញ្ជាក់ថាៈ “ឆ្នាំ២០១៨គឺជាខួបលើកទី១២ឆ្នាំ នៃការបញ្ជូនកម្លាំងមួកខៀវកម្ពុជា ចូលរួមប្រតិបត្តិការរក្សាសន្តិភាពរបស់អ.ស.ប ដែលមានកម្លាំងចូលរួមសរុបចំនួន ៥.១៧២នាក់។ ក្នុងនោះមានកម្លាំងនារីចំនួន២៣០នាក់”។ លោកបន្តថាបច្ចុប្បន្នកម្លាំង កំពុងបំពេញបេសកកម្មមានចំនួន៨១៣នាក់ក្នុងនោះកម្លាំងនារីចំនួន៦៣នាក់ បាននិងកំពុងបំពេញបេសកកម្មស្វែងរក សន្តិភាព នៅប្រទេសស៊ូដង់ខាងត្បូង ម៉ាលី លីបង់ និងអាហ្វ្រិកកណ្តាលហើយដែលក្នុងនោះគឺមាននារីមួយរូបជានាយសេនាធិការនិងមួយរូបទៀតជាមេបញ្ជាការរងផងដែរ។
ដោយសារតែកម្លាំងមួកខៀវនារីមានសមត្ថភាពគ្រប់គ្រាន់ លោកស្រី ឧត្តមសេនីយ៍ឯកបន្ថែមថា នឹងបន្តលើកទឹកចិត្ត ជ្រើសរើស និងស្នើសុំចាត់បញ្ជូនយុទ្ធនារី ដែលមានសមត្ថភាព ទៅចូលរួមបំពេញបេសកកម្មរក្សាសន្តិភាព របស់អ.ស.បឱ្យមានចំនួនកើនឡើងបន្ថែមទៀត និងបន្តពិនិត្យសមត្ថភាពនិងលើកទឹកចិត្ត ដើម្បីតែងតាំងមុខងារ និងតម្លើង ឋានន្តរស័ក្តិបន្ថែមផងដែរ។
គួរបញ្ជាក់ថាៈក្នុងរយៈពេល១២ឆ្នាំកន្លងទៅនេះ កម្ពុជាបានបញ្ជូនកងកម្លាំងរក្សាសន្តិភាព ទៅកាន់ប្រទេសចំនួន៨រួចមកហើយ រួមមានៈ សាធារណៈរដ្ឋស៊ូដង់, ស៊ូដង់ខាងត្បូង, លីបង់, អាហ្វ្រិកកណ្តាល, ម៉ាលី, ឆាត, សាយប្រឹស និងស៊ីរឺ ដែលមានកម្លាំងសរុបចំនួន ៥.១៧២នាក់ ក្នុងនោះកម្លាំងនារីចំនួន២៣០នាក់ ៕
