កំពត ៖ យ៉ាងហោចណាស់មនុស្សបីនាក់បានរងរបួសធ្ងន់ និងម្នាក់ទៀតរងរបួសស្រាល ខណៈម៉ូតូពីរគ្រឿងបានប៉ះទង្គិចគ្នាយ៉ាងដំណំ លើកំណាត់ផ្លូវជាតិលេខ៣៣ក្នុងទិសដៅខ្វែងគ្នា។
ហេតុការណ៍គួរឲ្យស្រៀវសាច់នេះ បានកើតឡើង នៅវេលាម៉ោង៨និង៥០នាទីព្រឹក ថ្ងៃទី០៣ខែកុម្ភៈ ឆ្នាំ២០១៨ត្រង់ចំណុចផ្លូវចូលសាលាស្រុកទឹកឈូ ស្ថិតក្នុងភូមិត្រពាំងសង្កែ ឃុំត្រពាំងសង្កែ ស្រុកទឹកឈូ ខេត្តកំពត។
តាមប្រភពពីសាក្សីដែលឃើញហេតុការណ៍ផ្ទាល់ភ្នែក បាននិយាយថា មុនពេលប៉ះទង្គិចគ្នាយ៉ាងធ្ងន់ធ្ងរនេះ គេឃើញយុវជនម្នាក់ជិះម៉ូតូម៉ាកC125សេរីឆ្នាំ២០១៦ក្នុងទិសដៅពីកើតទៅលិចក្នុងល្បឿនលឿនដូចព្យុះសង្ឃរា លុះមកដល់ចំណុចកើតហេតុគាប់ជួនមានម៉ូតូម៉ាកC125សេរីឆ្នាំ២០១៣ ជិះគ្នាបីនាក់ក្នុងនោះមានក្មេងម្នាក់ផងដែរ បានបើកឆ្លងផ្លូវបំណងចូលទៅផ្លូវលំនៃស្រុកទឹកឈូ ទើបធ្វើឲ្យម៉ូតូទាំងពីរគ្រឿងវាក់អើុគ្នា ហើយក៏បុកគ្នាពេញទំហឹង បណ្តាលឲ្យភាគីទាំងសងខាងរងរបួសធ្ងន់ធ្ងរដូចគ្នា ដេករដូករណែលនៅលើចិញ្ចើមផ្លូវតែម្តង។
ទាក់ទិននឹងហេតុការណ៍ខាងលើ ប៉ូលិសចរាចរណ៍ស្រុកទឹកឈូ បានប្រាប់ឲ្យដឹងថា គ្រោះថ្នាក់នេះផ្តើមដោយសារកត្តាមនុស្ស ពោលគឺការបើកបរប្រើល្បឿនលើសកម្រិត ហើយភាគីទាំងពីរក៏ខ្វះភាពប្រុងប្រយ័ត្នដូចគ្នា ទើបងាយប្រឈមនឹងគ្រោះថ្នាក់ធ្ងន់ធ្ងរបែបនេះ ។
សមត្ថកិច្ចបានបញ្ជាក់ទៀតថា ភាគីម្ខាងដែលជិះម៉ូតូម្នាក់ឯងមានឈ្មោះ សុខ រដ្ឋា ភេទប្រុស អាយុ២៣ឆ្នាំ មុខរបរជាសិស្ស(របួសធ្ងន់) មានទីលំនៅភូមិកំពង់នង់ ឃុំកូនសត្វ ស្រុកទឹកឈូ ខេត្តកំពត បើកបរម៉ូតូC125ពណ៌ខ្មៅសេរីឆ្នាំ២០១៦ ពាក់ស្លាកលេខ កែប 1A-4859។ដោយឡែកភាគីម្ខាងទៀតមានគ្នាបីនាក់ រួមមាន៖ ទី១-ឈ្មោះ អៃ សះ ភេទស្រី អាយុ២៤ឆ្នាំ(របួសធ្ងន់)ជាអ្នកបើកបរម៉ូតូ។ ទី២-ឈ្មោះ លី សើហ្វា ភេទស្រី អាយុ២៣ឆ្នាំ អ្នករួមដំណើរ របួសស្រាល និងទី៣-ឈ្មោះ លី ណាអ៊ីន ភេទប្រុស អាយុ៣ឆ្នាំ អ្នករួមដំណើរ(របួសធ្ងន់)។ទាំងបីនាក់រស់នៅក្នុងភូមិត្រពាំងសង្កែ ឃុំត្រពាំងសង្កែ ស្រុកទឹកឈូ ខេត្តកំពត ប្រើប្រាស់មធ្យោបាយម៉ាកC125 ពណ៌ខ្មៅ សេរីឆ្នាំ២០១៣ ពាក់ស្លាកលេខ កំពត 1G-5333។
បច្ចុប្បន្ន ជនរងគ្រោះក្នុងហេតុការណ៍គ្រោះថ្នាក់ចរចរណ៍ខាងលើ ត្រូវបានក្រុមគ្រួសារដឹកទៅសង្គ្រោះរៀងៗខ្លួននៅឯមន្ទីរពេទ្យ។ចំណែកមធ្យោបាយពាក់ព័ន្ធសមត្ថកិច្ចបាននាំយកទៅរក្សាទុកនៅក្នុងអធិការដ្ឋាននគរបាលស្រុកទឹកឈូ សម្រាប់ដោះស្រាយគ្នានៅពេលក្រោយ៕
សេង ណារិទ្ធ
