កំពត ៖ លោក វង សូត រដ្ឋមន្ត្រី ក្រសួងសង្គមកិច្ច អតីតយុទ្ធជន និងយុវនីតិសម្បទា បានមានប្រសាសន៍ថា សេដ្ឋកិច្ចកម្ពុជា បានសម្រេចកំណើនយ៉ាងឆាប់រហ័ស ដោយរក្សាកំណើនខ្ពស់ជាមធ្យម ៧,៧% ក្នុងរយៈពេលពីរទសវត្សរ៍ចុងក្រោយនេះប្រកបដោយចីរភាព សមធម៌ បរិយាប័ន្ន ហើយត្រូវបានចាត់ទុកថាជាប្រទេសដែលមានកំណើនសេដ្ឋកិច្ចខ្ពស់ ដោយធនាគារពិភពលោក ។ ស្របពេលដែលមានកំណើនសេដ្ឋកិច្ច ក្រសួងសង្គមកិច្ចបានចំណាយថវិកា ៨០លានដុល្លាក្នុងការផ្តល់សេវាលើរបបសន្តិសុខសង្គម ជូនដល់ បងប្អូនអតីតយុទ្ធជននៅទូទាំង ២៥ រាជធានី ខេត្ត តាមប្រព័ន្ធធនាគារដៃគូ ដែលប្រើប្រាស់ថវិការដ្ឋប្រមាណជាង ៣២០ ពាន់លានរៀល ស្មើនឹង ៨០ លានដុល្លាអាមេរិក ក្នុងមួយឆ្នាំ។
នេះបើតាមការលើកឡើងរបស់លោករដ្ឋមន្ត្រី ក្នុងសន្និបាតបូកសរុបលទ្ធផលការងារ ឆ្នាំ២០១៧ និងទិសដៅអនុវត្តបន្ត របស់បេឡាជាតិ អតីតយុទ្ធដែលបានប្រារព្ធឡើងនៅថ្ងៃទី០១ខែកុម្ភៈ ឆ្នាំ២០១៨នៅសាលប្រជុំសាលាខេត្តកំពត។
នៅក្នុងឱកាសនោះដែរ លោករដ្ឋមន្ត្រីបានលើកឡើងផងដែរថា កម្រិតជីវភាពរបស់ប្រជាជនកាន់តែមានភាពល្អប្រសើរ ដែលឆ្លុះបញ្ចាំងតាមរយៈសូចនាករសង្គម នោះគឺការកើនឡើងនៃផលិតផល ក្នុងស្រុកសរុប ក្នុងមនុស្សម្នាក់ពី ១០៤២ ដុល្លារអាមេរិក ក្នុងឆ្នាំ២០១៣ ដល់ប្រមាណ ១៤៣៥ ដុល្លារអាមេរិក ក្នុងឆ្នាំ២០១៧។
អត្រាភាពក្រីក្រមានការធ្លាក់ចុះពី ៥៣,៥% ក្នុងឆ្នាំ២០០៤ មកត្រឹម ១៣,៥% ក្នុងឆ្នាំ២០១៤ និងបន្តធ្លាក់ចុះថែមទៀត ហើយជាមួយគ្នានេះ គម្លាតនៃប្រាក់ចំណូលរបស់ប្រជាជន ក៏មានការធ្លាក់ចុះជាលំដាប់ផងដែរ។
ការសម្រេចនូវកំណើនសេដ្ឋកិច្ច និងស្ថិរភាពម៉ាក្រូសេដ្ឋកិច្ច ក្នុងបរិការណ៍អតិផរណាទាប និងអត្រាប្តូរប្រាក់មានស្ថិរភាពដូចខាងលើ រាជរដ្ឋាភិបាលបានយកចិត្តទុកដាក់លើការកែសម្រួល និងដំឡើងប្រាក់បៀវត្សមន្ត្រីរាជការស៊ីវិល និងកងកម្លាំងប្រដាប់អាវុធ ក្នុងគោលដៅជាង ១ លានរៀល នៅឆ្នាំ២០១៨ នេះ ។ ជាក់ស្តែងប្រាក់វិភាជន៍គ្រួសារ ប្រាក់បំណាច់ឧបត្ថម្ភគ្រួសារ និងកូនប្រចាំខែ ដូចប្រាក់វិភាជន៍គ្រួសារប្រចាំខែរបស់មន្ត្រីរាជការស៊ីវិល កងកម្លាំងប្រដាប់អាវុធ ក្នុងនោះកូនទទួលបាន ១០.០០០៛ និងប្រពន្ធទទួលបាន ១៥.០០០៛ និងប្រាក់របបសន្តិសុខសង្គម ប្រចាំខែជូនដល់អតីតយុទ្ធជនដែលទាបបំផុតមានចំនួន ៤២០.០០០រៀល ក្នុងឆ្នាំ២០១៧ និងដំឡើងដល់ ៤៨០.០០០ ម៉ឺនរៀល ក្នុងឆ្នាំ២០១៨ នេះផងដែរ។
ដោយឡែក ចំពោះកម្មករ និយោជិតដែលកំពុងតែបម្រើការងារក្នុងវិស័យឯកជន ក៏ទទួលបានឱកាសក្នុងការបង្កើនប្រាក់ចំណូលផងដែរ ដោយប្រាក់ឈ្នួលអប្បរមា កម្មករនិយោជិត ផ្នែកវាយនភណ្ឌកាត់ដេរ និងផលិតស្បែកជើងកើនឡើងដល់ ១៧០ ដុល្លារអាមេរិក នៅឆ្នាំ២០១៨ នេះ ដោយមិនទាន់គិតទៅដល់ការទទួលបានអត្ថប្រយោជន៍ផ្សេងៗទៀត ពីការអនុវត្តគោលនយោបាយជាតិគាំពារសង្គម។
ជាងនេះទៅទៀត ក្រសួងសង្គមកិច្ចបាននឹងកំពុងជំរុញ ការអនុវត្តច្បាប់ស្តីពីយុត្តិធម៌អនីតិជន រួមទាំងគោលនយោបាយចំពោះជនពិការក្រីក្រតាមសហគមន៍ ជាពិសេស ឯកសារគោលនយោបាយជាតិ ស្តីពីមនុស្សវ័យចាស់ ២០១៧-២០២៣ ត្រូវបានប្រកាសផ្សព្វផ្សាយឱ្យប្រើប្រាស់ កាលពីថ្ងៃទី១៨ ខែមករា ឆ្នាំ២០១៨ កន្លងទៅ។
លោករដ្ឋមន្ត្រីមានស្នើឲ្យ មន្ត្រីបេឡាជាតិអតីតយុទ្ធជនទាំងអស់ ត្រូវខិតខំជំរុញការដំឡើងប្រាក់សោធន ជូនអតីតយុទ្ធជនឱ្យបានទាន់ពេលវេលា ។ បង្កើនកិច្ចសហការជាមួយមន្ទីរ និងដៃគូពាក់ព័ន្ធ ដើម្បីលើកកម្ពស់ការផ្តល់សេវាជូនអតីតយុទ្ធជន និងគ្រួសារអតីតយុទ្ធជន ឱ្យកាន់តែល្អប្រសើរឡើង។ត្រូវពិនិត្យយន្តការរបស់ក្រសួង ដើម្បីឱ្យដំណើរការមានសង្គតិភាពទៅនឹងផែនការ និងទិសដៅរបស់ក្រសួង។
ត្រូវត្រៀមលក្ខណៈគ្រប់គ្រងឱ្យបានល្អ នូវកញ្ចប់ថវិការបស់អតីតយុទ្ធជនដែលត្រៀមផ្ទេរពីមន្ទីរ សង្គមកិច្ច អតីតយុទ្ធជន និងយុវនីតិសម្បទា រាជធានី ខេត្ត នៅពេលខាងមុខនេះ។
គួរបញ្ជាក់ថា៖ យោងតាមប្រសាសន៍ លោក ជាវ តាយ អភិបាលនៃគណៈអភិបាលខេត្តកំពត ពាក់ព័ន្ធ និងការងារ(ប.ជ.អ )ខេត្តកំពត បច្ចប្បន្នមានអតីតយុទ្ធជន និងគ្រួសារដែលកំពុងទទួលរបបសន្តិសុខសង្គមសរុបចំនួន៨២៨៣នាក់ផងដែរ ខណៈដែលបច្ចុប្បន្នកម្ពុជាមានអតីតយុទ្ធដែលកំពុងទទួលរបបសន្តិសុខសង្គម សរុបចំនួន៨៦៥១៧នាក់៕ សេង ណារិទ្ធ
