កែប ៖ នៅព្រឹកថ្ងៃព្រហស្បតិ៍១ រោច ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី ០១ ខែ កុម្ភៈ ឆ្នាំ ២០១៨ រដ្ឋបាលខេត្តកែបបានរៀបចំបើកសន្និបាតបូកសរុបលទ្ធផលការងារប្រចាំឆ្នាំ ២០១៧ និងលើកទិសដៅការងារសម្រាប់អនុវត្តឆ្នាំ ២០១៨ ក្រោមអធិបតីភាព លោក កែន សត្ថា អភិបាល នៃគណៈអភិបាលខេត្តកែប លោក សំ សារីន ប្រធានក្រុមប្រឹក្សាខេត្ត ។ ពិធីនេះ ក៏មានការអញ្ជើញចូលរួមពីសំណាក់ លោក លោក លោកស្រី ជាសមាជិកក្រុមប្រឹក្សាខេត្ត លោក លោកស្រី ជាអភិបាលរងខេត្ត លោកនាយករដ្ឋបាលសាលាខេត្ត លោក លោក លោកស្រីប្រធាន អនុប្រធានមន្ទីរ អង្គភាពជុំវិញខេត្ត កងកម្លាំងប្រដាប់អាវុធទាំងបី មន្ត្រីរាជការសាលាខេត្ត លោក លោកស្រីអភិបាល អភិបាលរងក្រុង ស្រុក លោក លោកស្រីប្រធាន អនុប្រធានការិយាល័យអង្គភាពនិងមន្ទីរវិស័យ និងអាជ្ញាធរមូលដ្ឋាន សរុបប្រមាណ ៥០០នាក់។
ថ្លែងក្នុងសន្និបាតនេះ លោកកែន សត្ថា អភិបាលខេត្តកែប បានគូសបញ្ជាក់ថា៖ ដើម្បីឲ្យខេត្តកែបស័ក្តិសមនឹងឈ្មោះ ខេត្តតារារះនាទិសនិរតី យើងត្រូវរៀបចំផែនការអនុវត្តតាមយុទ្ធសាស្ត្ររបស់រាជរដ្ឋាភិបាលកម្ពុជា ហើយការដាក់ឈ្មោះជាតារារះក្នុងទិសនិរតីនេះ គឺជាប់ពាក់ព័ន្ធនឹងខេត្តចំនួន៤ដែលជាប់នឹងឆ្នេរសមុទ្រ រួមមាន៖ខេត្តកែប កំពត ព្រះសីហនុ និងកោះកុង ។
ដោយឡែក សម្រាប់ខេត្តកែបដែលជាខេត្តទេសចរណ៍ សម្រាប់សម្រាក លម្ហែ កម្សាន្ត មានឆ្នេរស្រស់ស្អាតដាច់គេ និងមានបរិស្ថានស្អាត ប្រកបដោយភាពទាក់ទាញទៅលើធនធានធម្មជាតិស្រស់បំព្រង ហើយខេត្តទេសចរណ៍របស់យើងដាច់ខាត មិនឲ្យមានរោងចក្រសម្រាប់បំពុលបរិស្ថាននោះឡើយ ។
លោកអភិបាលខេត្តបានបញ្ជាក់ទៀតថា វិស័យទេសចរណ៍ គឺជាវិស័យមួយយ៉ាងសំខាន់ណាស់ ម្លោះហើយយើងត្រូវរួមគ្នាអនុវត្តភារកិច្ចតាមតួនាទី តាមជំនាញឲ្យបានល្អប្រសើរ ពិសេសមន្ទីរទេសចរណ៍ត្រូវខិតខំជំរុញផែនការរបស់ខ្លួន ដោយសហការជាមួយមន្ទីរអង្គភាពនានា និងដៃគូអភិវឌ្ឍ ព្រមទាំងវិស័យឯកជន វិស័យសាធារណៈជាដើម ។ លោកថា ការធ្វើបដិសណ្ឋារកិច្ច រមណីយដ្ឋានស្អាត សណ្ឋាគារស្អាត ផ្ទះសំណាក់ស្អាត បរិស្ថានស្អាត ផ្សារស្អាត ស្តង់ដាស្អាត ប្រកបដោយអនាម័យល្អ។នេះជាសូចនាករដែលយើងត្រូវប្រឹងប្រែងទាំអស់គ្នា។លោកក៏បានលើកឡើងផងដែរថា ខេត្តទេសចរណ៍ត្រូវការចាំបាច់បំផុតគឺផ្នែកសន្តិសុខជាចម្បង និងសុវត្ថិភាពចំណីអាហារ ពិសេសហាមដាច់ខាតកុំឲ្យមានប្រើប្រាស់សារធាតុគីមីដែលជាកត្តាបង្កឲ្យប៉ះពាល់សុខភាពដល់ភ្ញៀវទេសចរណ៍ដែលគេមកលម្ហែ កម្សាន្តក្នុងរមណីយដ្ឋានរបស់យើង ។ ម្យ៉ាងទៀត ត្រូវជំរុញដល់ក្រុមអាជីវករទាំងអស់កុំមានការកេងបន្លំលើរង្វាស់ទម្ងន់(ជញ្ជីងថ្លឹង) ព្រោះវានាំឲ្យបង្កផលប៉ះពាល់ដល់អារម្មណ៍ភ្ញៀវដែលគេមកសម្រាក កម្សាន្តនៅតំបន់ឆ្នេរកែប។
ដូច្នេះយើងត្រូវចូលរួមសហការគ្នាបំបាត់នូវបញ្ហាខាងលើនេះឲ្យបាន ដើម្បីបញ្ចៀសការរិគន់ពីសំណាក់មហាជន។យើងត្រូវរួមគ្នាគិត រួមគ្នាធ្វើ រួមគ្នាទទួលខុសត្រូវ ដើម្បីជួយបង្កើនសក្តានុពលលើវិស័យទេសចរណ៍ក្នុងតំបន់របស់យើងឲ្យកាន់តែមានអទិភាពខ្ពស់ ដើម្បីឲ្យស្របទៅនឹងឈ្មោះខេត្តតារារះក្នុងទិសនិរតី៕
សេង ណារិទ្ធ
