ប៉ៃលិន ៖ មានប្រសាសន៍ថ្លែងនៅក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០១៧ និងលើកទិសដៅអនុវត្តន៍ការងារឆ្នាំ២០១៨ របស់រដ្ឋបាលខេត្តប៉ៃលិន នៅសាលប្រជុំសាលាខេត្តប៉ៃលិន នៅរសៀលថ្ងៃទី២៣ ខែមករា ឆ្នាំ២០១៨ លោក ប៉ុល លឹម រដ្ឋលេខាធិការក្រសួងមហាផ្ទៃ បានជំរុញឱ្យអាជ្ញាធរ និងមន្ត្រីរាជការខេត្តប៉ៃលិនគ្រប់ជាន់ថ្នាក់ ត្រូវបន្តការខិតខំប្រឹងប្រែងបន្ថែមទៀត ដើម្បីបង្កើនការអភិវឌ្ឍសេដ្ឋកិច្ច សង្គម និងជីវភាពរបស់ប្រជាពលរដ្ឋ។
លោក ប៉ុល លឹម ក្នុងនាមជាតំណាងរបស់លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍កត់សម្គាល់ថា អ្វីដែលមានភាពលេចធ្លោរសម្រាប់សាលាខេត្តប៉ៃលិន គឺការបន្តពង្រឹងកិច្ចអភិវឌ្ឍន៍រយៈពេល៥ឆ្នាំ និងកម្មវិធី ៣ឆ្នាំរំកិល ក្នុងការផ្តល់សេវាសាធារណៈជូនប្រជាពលរដ្ឋ ប្រកបដោយតម្លាភាព ប្រសិទ្ធភាព ដែលលទ្ធផលទាំងនេះ គឺកើតចេញពីកម្លាំងសាមគ្គី និងបានរួមចំណែកក្នុងការចូលរួមថែរក្សាសន្តិភាព ស្ថិរភាព សន្តិសុខ សណ្តាប់ធ្នាប់សង្គមបានល្អ។
ដូច្នេះដើម្បីបន្តថែរក្សានូវសមិទ្ធផលទាំងនោះ ស្របតាមកម្មវិធីនយោបាយរបស់រាជរដ្ឋាភិបាល លោក ប៉ុល លឹម បានផ្តល់អនុសាសន៍មួយចំនួន ដល់អាជ្ញាធរខេត្តប៉ៃលិន មានដូចជា៖ ការបន្តរួមគ្នាទទួលខុសត្រូវ ក្នុងការពង្រឹងសន្តិសុខសណ្តាប់ធ្នាប់សង្គម មន្ត្រីរាជការគ្រប់ជាន់ថ្នាក់ ត្រូវលើកកម្ពស់វប្បធម៌ទទួលខុសត្រូវក្នុងភារកិច្ច មានភក្តីភាព មានមនសិការវិជ្ជាជីវៈ គោរពច្បាប់ វិន័យបទបញ្ជា និងគោលការណ៍របស់រដ្ឋ ជាពិសេសបន្តអនុវត្តន៍គោលនយោបាយកំណែទម្រង់រដ្ឋបាលសាធារណៈ ឱ្យមានតម្លាភាព គុណភាព ប្រសិទ្ធភាព សម្របសម្រួល និងយកចិត្តទុកដាក់ដោះស្រាយជម្លោះដីធ្លី បង្ការទប់ស្កាត់បទល្មើសព្រៃឈើ ឱ្យកាន់តែម៉ឺងម៉ាត់។
នាឱកាសនោះ លោក កើត សុធា អភិបាលខេត្តប៉ៃលិន ក៏បានមានប្រសាសន៍បានថ្លែងអំណរគុណ និងកោតសរសើរ ព្រមទាំងវាយតម្លៃខ្ពស់ចំពោះការខិតខំប្រឹងប្រែងបំពេញការងាររបស់ថ្នាក់ដឹកនាំ មន្ត្រីរាជការគ្រប់លំដាប់ថ្នាក់នៅក្នុងខេត្ត ដោយសម្រេចបានសមិទ្ធិផលផ្លែផ្កាជាច្រើនជូនជាតិ និងប្រជាពលរដ្ឋក្នុងឆ្នាំ២០១៧កន្លងមក។
លោកអភិបាលខេត្តប៉ៃលិន បានមានប្រសាសន៍បញ្ជាក់ថា បើទោះបីជាការអនុវត្តការងារ ឆ្នាំ២០១៧ កន្លងទៅរបស់ខេត្ត ទទួលបានជោគជ័យ និងមានប្រសិទ្ធភាពខ្ពស់យ៉ាងណាក៏ដោយ ក្នុងនាមមន្ត្រីរាជការ បម្រើប្រជាប្រពលរដ្ឋ ត្រូវខិតខំកំណែទម្រង់ការងារក្នុងដែនសមត្ថកិច្ចនៃការគ្រប់គ្រងរបស់ខ្លួនឱ្យបានល្អថែមទៀត ដោយអនុវត្តន៍ការងារទៅតាមច្បាប់ ក៏ដូចជាសេចក្តីណែនាំ នីតិវិធី ស្របតាមបទដ្ឋានគតិយុត្តិ ក្នុងគោលបំណងអភិវឌ្ឍន៍អង្គភាពនីមួយៗ ឱ្យទទួលបាននូវការរីកចម្រើន ស្របតាមយុទ្ធសាស្ត្រដំណាក់កាលទី៣ ដែលរាជរដ្ឋាភិបាលបានដាក់ចេញឲ្យអនុវត្តន៍ផងនោះ។
សូមបញ្ជាក់ថា រយៈពេល២ថ្ងៃ នៃអង្គសន្និបាត គឺសមាជិកអង្គបាតទាំងមូល បានស្តាប់ពីរបាយការណ៍ប្រចាំឆ្នាំ របស់រដ្ឋបាលខេត្ត និងមន្ទីរជំនាញស្ថាប័នជុំវិញខេត្ត អំពីវឌ្ឍនភាព និងបញ្ហាប្រឈម ដោយបានពិភាក្សាទៅលើប្រធានបទសំខាន់ៗ និងបញ្ហាមួយចំនួនពាក់ព័ន្ធភាពចន្លោះប្រហោងក្នុងការទទួលខុសត្រូវរបស់អាជ្ញាធរមូលដ្ឋាន ហើយក្នុងឱកាសនោះ លោក ប៉ុល លឹម ក៏បានបំពាក់គ្រឿងឥស្សរិយយសជួនដល់ថ្នាក់ដឹកនាំ មន្ត្រី ដែលមានស្នាដៃល្អចំនួន ១១រូប ក្នុងនោះ មានគ្រឿងឥស្សរិយយសសុវត្ថារាថ្នាក់មហាសេនា ចំនួន ៥ គ្រឿងឥស្សរិយយស ព្រះរាជាណាចក្រកម្ពុជាថ្នាក់សេនា ចំនួន ៣ និងគ្រឿងឥស្សរិយយស ព្រះរាជាណាចក្រកម្ពុជាថ្នាក់អស្សឬទ្ធិ ចំនួន៣៕
