កំពត ៖ សមត្ថកិច្ចនៃស្នងការដ្ឋាននគរបាលខេត្តកំពត កាលពីថ្ងៃទី២៣ខែមករា ឆ្នាំ២០១៨បានឃាត់ខ្លួនបុរសសង្ស័យម្នាក់តាមអំណាចតុលាការ ក្រោមបទចោទប្រកាន់ប្រើហិង្សាដោយចេតនាមកលើក្រុមគ្រួសារកាលពីអំឡុងពាក់កណ្តាលឆ្នាំ២០១៧។
ជនត្រូវចោទមានឈ្មោះ វង្ស វុទ្ធី ហៅ ខ្លូត វុទ្ធី ភេទប្រុស អាយុ៤៦ឆ្នាំ មុខរបរកសិករ មានស្រុកកំណើត ភូមិចោមចៅ សង្កាត់ចោមចៅ ខណ្ឌដង្កោ ក្រុងភ្នំពេញ និងមានទីលំនៅបច្ចុប្បន្ននៅភូមិគាថាវង្សក្រោម ឃុំត្រពាំងសាលាខាងលិច ស្រុកបន្ទាយមាស ខេត្តកំពត។
ចំពោះការឃាត់ខ្លួននេះបានអនុវត្តតាមដីកាបង្គាប់ឲ្យឃុំខ្លួនបណ្តោះអាសន្នតាមមាត្រា ២១៩ និងមាត្រាបន្តបន្ទាប់នៃក្រមនីតិវិធីព្រហ្មទណ្ឌ របស់ចៅក្រមស៊ើបសួរនៃសាលាដំបូងខេត្តកំពត លី សូដាណែត ដែលប្រកាសឲ្យប្រើប្រាស់តាមព្រះរាជក្រមលេខ នស/រកម/០៨០៧/០២៤ ចុះថ្ងៃទី១០ ខែសីហា ឆ្នាំ២០១៧។
ពាក់ព័ន្ធនឹងអង្គហេតុនៃការឃាត់ខ្លួនខាងលើ ត្រូវបានសមត្ថកិច្ចបង្ហើបថា៖ ជននេះត្រូវបានដាក់ឲ្យស្ថិតនៅក្រោមការពិនិត្យពីបទ ហិង្សាដោយចេតនានិងគំរាមថានឹងសម្លាប់ ដែលបានប្រព្រឹត្តនៅភូមិគាថាវង្សក្រោម ឃុំត្រពាំងសាលាខាងលិច ស្រុកបន្ទាយមាស ខេត្តកំត កាលពីថ្ងៃទី១២ ខែមិថុនា ឆ្នាំ២០១៧ នេះជាទម្រង់បទល្មើសដែលមានចែងឲ្យផ្តន្ទាទោសតាមបញ្ញតិ្តមាត្រា ២១៧,២៣៣ នៃក្រមព្រហ្មទណ្ឌ នៃព្រះរាជាណាចក្រកម្ពុជា។
បច្ចុប្បន្ន ជនសង្ស័យត្រូវបានសមត្ថកិច្ចស្នងការដ្ឋាននគរបាលខេត្ត បញ្ជូនទៅកាន់សាលាដំបូងខេត្តកំពត ចាត់ការតាមនីតិវិធី នៅព្រឹកថ្ងៃទី២៤ខែមករា ឆ្នាំ២០១៨នេះហើយ៕
សេង ណារិទ្ធ
