កំពត ៖ ខេត្តកំពត ជាខេត្ត ទេសចរណ៍ មួយដ៏សំខាន់ និងជាមុខមាត់ របស់កម្ពុជា ដូច្នេះហើយ ទាក់ទង នឹងសន្តិសុខ យើងត្រូវ តែរិតបន្តឹង រិតត្បិត ឲ្យបាន យ៉ាងម៉ឺងម៉ាត់ ដោយការបំពាក់ កាមេរ៉ាសុវត្ថិភាព តាមប៉ុស្តិ៍ប្រចាំការ២៤ម៉ោង លើ២៤ម៉ោង នៃគោលដៅ និមួយៗ នៅក្នុង ក្រុងកំពត និងកាត់បន្ថយ បទល្មើស ផ្សេងៗ រួមទាំងការ អនុវត្តច្បាប់ ចរាចរផ្លូវគោក ផងដែរ ជាពិសេស ដើម្បីជួយសម្រួល ដល់ភ្ញៀវជាតិ អន្តរជាតិ ពេលមានបញ្ហា គឺមានកម្លាំង ចាំជួយអន្តរាគមន៍២៤ម៉ោង លើ២៤ម៉ោងតែម្តង។
នេះបើតាមការ លើកឡើងរបស់ លោក ឧត្តមសេនីយ៍ទោ ម៉ៅ ច័ន្ធ មធុរិទ្ធ ស្នងការ នគរបាលខេត្តកំពត បានប្រាប់ឲ្យដឹង នៅព្រឹកថ្ងៃ ២៣ ខែមករា ឆ្នាំ ២០១៨នេះ។លោកស្នងការបានបន្តថា៖ ការដាក់ កាមេរ៉ា សុវត្ថិភាព នៅក្នុង ក្រុងកំពត តាមគោលដៅ ប៉ុស្តិ៍ប្រចាំការ២៤ម៉ោង លើ២៤ម៉ោង សំខាន់ៗនេះ មិនមែនជា គម្រោងរបស់ ក្រសួង ឬអគ្គស្នងការដ្ឋាននគរបាលជាតិនោះទេ ប៉ុន្តែវាជាផ្នែក មួយដើម្បី ឆ្លើយតបតាម គោលការណ៍ ភូមិឃុំមានសុវត្ថិភាព ក្នុងការ រិតបន្តឹង សន្តិសុខ នៅក្នុង ខេត្តកំពតរបស់យើង។ហើយការដាក់កាមេរ៉ាសុវត្ថិភាពក្នុងក្រុងកំពតនេះគឺមានគោលដៅ ត្រូវដាក់ ៦កន្លែង ជាក់ស្តែង ស្នងការ នគរបាល ខេត្ត បានដាក់ រួចរាល់ ពីរគោលដៅ សាកល្បង សិន ទី១ នៅរង្វង់ មូលធូរេន និងទី២ នៅផ្សារត្រី។ ហើយនឹង បន្តបំពាក់ នៅគោលដៅទី៣ ដែលបានព្រៀងទុកនៅម្តុំ សាលា ខេត្ត, ទី៤ នៅជិត កន្លែងរូប សំណាក់ ត្រីផ្សោត (កីឡា ហែលទឹក) , ទី៥ នៅផ្លូវវៀង ក្រុង និង ទី៦ នៅ រង្វង់ ទឹករលក ហើយលោក ចង់ដាក់ នៅបរិវេណ ជុំវិញផ្សារសាមគ្គី កំពត មួយកន្លែងទៀត ប៉ុន្តែមិនមានដីរដ្ឋ ដើម្បីដាក់ទូកុងទឺន័រ។
លោកស្នងការ ខេត្តកំពត បាន បញ្ជាក់ថា៖ តាមគោលដៅ និមួយៗ នឹងបំពាក់ ចំនួនកាមេរ៉ា ទៅតាមស្ថានភាព ជាក់ស្តែង។ដោយឡែក ចំពោះរង្វង់ មូល ធុរេន បានបំពាក់ ១៣កាមេរ៉ា គោលដៅផ្សាររាត្រី ក៏ដូចគ្នាដែរ ហើយគោលដៅ ណាដែល ស្មុគស្មាញ នឹងបំពាក់ កាមេរ៉ា បន្ថែមទៀត។
ចំពោះនៅក្នុងប៉ុស្តិ៍ ប្រចាំការ២៤ លើ២៤ ម៉ោងនោះ ត្រូវប្រើប្រាស់ កម្លាំងចំរុះ ទាំងកម្លាំង ប៉ុស្តិ៍រដ្ឋបាល កម្លាំង ចរាចរណ៍ ព្រហ្មទណ្ឌ កម្លាំង អន្តរាគមន៍ ពិសេស និង កម្លាំង អន្តោប្រវេសន៍ ។
ការដាក់កាមេរ៉ា សុវត្ថិភាពនេះ គឺជាគំនិតច្នៃប្រឌិត ក្រោយ ទទួល បានការណែនាំ ពីសម្តេច ក្រឡាហោម ស ខេង ឧបនាយក រដ្ឋមន្ត្រី រដ្ឋមន្ត្រី ក្រសួងមហាផ្ទៃ ជា ពិសេស ឯកឧត្តម នាយ ឧត្តមសេនីយ៍ អគ្គនគរបាល ជាតិ ក្នុង បំណង ជួយកាត់ បន្ថយ កម្លាំងចេញ យាមល្បាត ហើយមកអង្គុយ ប្រចាំការនៅ ក្នុងប៉ុស្តិ៍ ប្រចាំការវិញ ដើម្បី ត្រួតពិនិត្យ សកម្មភាពផ្សេងៗស្ថិតក្នុងតំបន់ និងភូមិសាស្ត្រខេត្តកំពតទាំងមូល៕
សេង ណារិទ្ធ
