រតនគិរី ៖ សមត្ថកិច្ចចម្រុះ ដែលមានតួនាទីប្រចាំការនៅច្រកទ្វារអន្តរជាតិអូរយ៉ាដាវ កំពុងបើកកុងត្រូលអោយរថយន្តដឹកឈើប្រណិតខុសច្បាប់ចូលទៅប្រទេសវៀតណាមមុនម៉ោង៧ព្រឹកដែលល្មើសនឹងច្បាប់ជាក់ស្តែងនៅវេលាម៉ោង៦និង២២ព្រឹក ថ្ងៃទី៧ ខែវិច្ឆិការ ឆ្នាំ២០១៧ គេសង្កេតឃើញសមត្ថកិច្ចបានបើកទ្វារអោយរថយន្តដឹកឈើខុសច្បាប់ទាំងនោះចូលទៅប្រទេសវៀតណាមយ៉ាងគគើ្លនដោយមិនកោតក្រែងនឹងច្បាប់ទំលាប់ឡើយ ប្រហែលជាមន្ត្រីប្រចាំការអស់ទាំងនោះរកផលប្រយោជន៍អោយមេៗ ហើយបានជាមេៗមិនមានចំណាត់ការអ្វីទាល់តែសោះចំពោះមន្ត្រីខិលខូចអស់ទាំងនោះ។
គេសង្កេតឃើញយ៉ាងហោចណាស់មានមន្ត្រី៥ស្ថាប័នក្នុងនោះរួមមានគណកម្មការច្រកទ្វារ គយនិងរដ្ឋករ កាំងកុងត្រូល នគរបាលអន្តោប្រវេសន៍ និងតំណាងតុលាការសាលាដំបូងខេត្តនៅចាំរាប់ក្បាលឡានដឹកឈើខុសច្បាប់ទៅប្រទេសវៀតណាមដើម្បីបង់លុយតែប៉ុណ្ណោះ ហើយក្នុង១ថ្ងៃៗ គេសង្កេតឃើញរថយន្តដឹកឈើប្រណិតខុសច្បាប់ទៅប្រទេសវៀតណាមឆ្លងកាត់ផ្លូវជាតិលេខ៧៨ត្រង់ច្រកទ្វារអន្តរជាតិអូរយ៉ាដាវមិនតិចជាង៨០ទៅ១០០គ្រឿងក្នុង១ថ្ងៃ។
ប្រភពដាច់ដោយឡែកមួយទៀតពីឈ្មួញរកស៊ីឈើខុសច្បាប់សុំមិនបញ្ចេញឈ្មោះ មិនសប្បាយនិងសមត្ថកិច្ចនៅតាមដងផ្លូវជំរិតទារប្រាក់ គាត់បានអោយដឹងថា ក្នុងរថយន្តបាឡែនមួយគ្រឿងចេញពីស្រុកបរកែវគាត់ត្រូវបង់លុយអោយសមត្ថកិច្ចក្នុង១ជើងពី៤លានរៀលទៅ៥លានរៀល និងរថយន្តសាំយ៉ុងចាប់ពី៨លានរៀលទៅ៩លានរៀលទើបទៅដល់ប្រទេសវៀតណាម ហើយពួកសមត្ថកិច្ចដែលប្រចាំការនៅច្រកទ្វារអន្តរជាតិអូរយ៉ាដាវនោះសប្បាយចិត្តនិងញឹមញញេមរត់ទៅបើកកុងត្រូលអោយរថយន្តដឹកឈើប្រណិតខុសច្បាប់ទាំងនោះចូលទៅអោយផុតៗទៅ។
ចំណែកឯរថយន្តដឹកកសិផលរបស់កសិករវិញសមត្ថកិច្ចអស់ទាំងនោះហាក់ដូចជាខ្វល់ខ្វាយណាស់ប្រើកម្មកររើស្រាយតង់ប្រើសំរ៉បចាក់លើបាវសណ្តែងធ្លុះរយះរយាយហាក់ដូចជារថយន្តដឹកកសិផលនោះបង្កឈើប្រណិតចឹង ហាក់ដូចជាបង្អួតមហាជននិងថ្នាក់លើរបស់ខ្លួន ចំណែកឯរថយន្តដឹកឈើសឹងតែបាក់ឡានហាក់ដូចជាមើលមិនឃើញសោះ រត់ទៅបើកទ្វារអោយយ៉ាងប្រយ៉ាប់ប្រយ៉ាល ។
ជុំវិញការចោទប្រកាន់ថា សមត្ថកិច្ចចម្រុះបើកកុងត្រូងអោយរថយន្តដឹកឈើចួលទៅប្រទេសវៀតណាមខុសម៉ោងរដ្ឋបាល មុនម៉ោង៧ព្រឹកនេះដែរ លោកកង សារឿន ប្រធានគណកម្មការច្រកទ្វារ លោក អាន អង្គារ៉ា ប្រធានស្នាក់ការគយនិងរដ្ឋករ លោកអ៊ី ចំរើន នាយប៉ុស្តិ៍នគរបាលអន្តោប្រវេសន៍ និងលោកហេង សាយប្រធានស្នាក់ការកាន់កុងត្រូល និងតំណាងតុលាការសាលាដំបូងខេត្ត មិនអាចសុំការបំភ្លឺណាមួយបានទេកាលពីម្សិលមិញនេះ ៕
ជីវ៉ា
