កែប ៖ ដោយសារពិធីបុណ្យសមុទ្រឈានជិតមកដល់ រដ្ឋបាលខេត្តកែប បាននិងកំពុងជម្រុញយ៉ាងមមាញឹកក្នុងការសម្អាតបរិស្ថាន នៅតាមទីសាធារណៈ ក្នុងនោះបណ្តាមន្ទីរគ្រប់អង្គភាព កងកម្លាំងប្រដាប់អាវុធ លោកគ្រូ អ្នកគ្រូ ព្រមទាំងសិស្សានុសិស្ស នឹងបន្តធ្វើពលកម្ម សម្អាតបរិស្ថានយ៉ាងផុលផុស ទៅតាមមន្ទីរ ស្ថាប័នរៀងៗខ្លួន។
ផ្អែកតាមគោលការណ៍សំខាន់ៗទាក់ទិននឹងបរិស្ថាន នៅព្រឹកថ្ថៃទី០៦ខែវិច្ឆិកា ឆ្នាំ២០១៧នេះ តាមដងផ្លូវឬតាមបណ្តាស្ថាប័នមន្ទីរនានាអាជ្ញាធរគ្រប់លំដាប់ថ្នាក់ បានបែងចែកតួនាទីជាក្រុមៗ ដើម្បីធ្វើពលកម្ម សម្អាតទីធ្លា ចិញ្ចើមផ្លូវនានា គ្រប់តំបន់ទូទាំងខេត្ត។
ជាមួយនេះដែរ រដ្ឋបាលដែនដី ដែលមានលោកកែន សត្ថា ជាអភិបាល នៃគណៈអភិបាលខេត្តកែប ពិតជាមានភាពសស្រាក់សស្រាំ ក្នុងការដឹកនាំមន្ត្រីរបស់ខ្លួន ធ្វើការកែលម្អ ទៅតាមមុខសញ្ញា និងជម្រុញដល់លោកគ្រូ អ្នកគ្រូ សិស្សានុសិស្សធ្វើពលកម្ម សម្អាតអនាម័យនៅតាមសាលា វិទ្យាល័យ អនុវិទ្យាល័យ ទូទាំងខេត្ត ពិសេសទីប្រជុំជន ដែលជានិច្ចកាលតែងតែយាយីដោយសំរាមនិងកាកសំណល់គ្រប់ប្រភេទនោះ។
ចំពោះការរៀបចំពិធីបុណ្យសមុទ្រលើកទី៦ជុំទី២នៅខេត្តកែប ដែលមានរយៈពេល៣ថ្ងៃ គឺចាប់ពីថ្ងៃទី២២រហូតដល់ថ្ងៃទី២៤ខែធ្នូ ឆ្នាំ២០១៧ខាងមុខនេះ រដ្ឋបាលខេត្តកែប ក៏បានធ្វើកិច្ចប្រជុំ ពិគ្រោះយោបល់ជាច្រើនលើកមកហើយដែរ ដោយក្នុងកិច្ចប្រជុំកន្លងមកក៏បានលើកនូវគោលការណ៍ចម្បងៗដើម្បីញាំុងឲ្យពិធីបុណ្យដ៏សំខាន់នេះ ប្រព្រឹត្តទៅដោយរលូននិងមានបរិយាកាសសប្បាយរីករាយ។ក្នុងនោះដែររដ្ឋបាលខេត្តកែប ក៏បានធ្វើកិច្ចប្រជុំជាច្រើនលើក ច្រើនសារ សម្រាប់រៀបចំបុណ្យសមុទ្រទទួលបានជោគជ័យ ដោយបានបង្កើតគណៈកម្មការនិងអនុគណៈកម្មការជាចំណុះ សម្រាប់សហការរៀបចំពិធីបុណ្យសមុទ្រឲ្យលើកទី៦ជុំទី២របស់ខ្លួនរួចរាល់ហើយ។
ដូច្នេះពិធីបុណ្យសមុទ្រនៅខេត្តកែប ដែលនៅសល់តែជាងមួយខែទៀតនឹងឈានមកដល់ គេសង្ឃឹមថា អាជ្ញាធរគ្រប់តំបន់ អាជីវករ មហាជនគ្រប់ស្រទាប់ ក៏ដូចជាប្រជាពលរដ្ឋ នឹងមានការសហការចូលរួមជួយសម្អាត អនាម័យទាំងអស់គ្នា ចាប់ពីពេលនេះទៅ ព្រោះយើងដឹងហើយថាកត្តាអនាម័យ វានាំមកនូវសុខភាពល្អ អាចបញ្ចៀសជំងឺដង្កាត់ផ្សេងៗ ថែមទាំងបានចូលរួមលើកកម្ពស់ខេត្តទេសចរណ៍កាន់តែមានសក្តានុពលខ្ពស់ថែមទៀត។
សូមបញ្ជាក់ផងដែរថា៖ បុណ្យសមុទ្រលើកទី៦ជុំទី២នៅខេត្តកែប ដែលចាប់ផ្តើមនៅថ្ងៃទី២២ខែធ្នូ រហូតដល់ថ្ងៃទី២៤ខែធ្នូ ឆ្នាំ២០១៧គឺ ក្រោមអធិបតីភាព ដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហើយពិធីនោះ នឹងមានការប្រគុំតន្ត្រី(ខនសឺត)មានដាក់តាំងលក់ផលិតផលគ្រប់ប្រភេទនៅតាមស្តង់មុខសាលាខេត្តកែប ពិសេសផលិតផលក្នុងស្រុក ព្រមទាំងមានការប្រកួតកីឡាបីប្រភេទ គឺកីឡាលើគោក កីឡាលើទឹកនិងកីឡាលើអាកាស និងមានការបង្ហោះខ្លែងផងដែរ។/
ណារិទ្ធ
