កែប ៖ បុរសម្នាក់ត្រូវរថភ្លើងបុកស្លាប់យ៉ាងរន្ធត់ ខណៈបុរសចិត្តសឿងខាងលើ ពេលស្រវឹងស្រាបានទៅដេកកើយដែកទម្រផ្លូវរថភ្លើង ហើយក៏ជួបហេតុការណ៍ដ៏អកុសល្យត្រូវរថភ្លើងបុកស្លាប់នៅកណ្តាលអាធ្រាតគ្មានអ្នកណាដឹង។
ហេតុការណ៍បង្កភាពភ្ញាក់ផ្អើល ដោយសារប្រទះឃើញសពនេះ នៅវេលាម៉ោង៦និង២០នាទីព្រឹក ថ្ងៃទី០៣ខែវិច្ឆិកា ឆ្នាំ២០១៧ ស្ថិតចំណុចផ្លូវរថភ្លើង ក្នុងភូមិសាស្ត្រ ភូមិចំការចេក ឃុំពងទឹក ស្រុកដំណាក់ចង្អើរ ខេត្តកែប(ចណុចខាងលិចផ្លូវចូលវត្ត អង្គ្រង រាជាចំងាយ៣០០មែត្រ)។
តាមប្រភពពីក្រុមគ្រួសារសពបានឲ្យដឹងថា បុរសរងគ្រោះ ដោយសាររថភ្លើងបុកស្លាប់ មានឈ្មោះ កើត យី ភេទប្រុស អាយុ៤៩ឆ្នាំ មុខរបរកសិករ រស់នៅក្បែរទីតាំងកើតហេតុ នៃភូមិ ឃុំខាងលើ។
ក្រុមគ្រួសារ(ប្រពន្ធជនរងគ្រោះ) បានបញ្ជាក់អះអាងថា កន្លងមកឲ្យតែផឹកស្រាស្រវឹង ប្តីរបស់គាត់(សព)តែងតែទៅដេកកើយលើផ្លូវរថភ្លើងតែរហូត ប៉ុន្តែត្រូវបានពួកគាត់ជួយលើក សែងចូលផ្ទះវិញ លុះយប់កើតហេតុដោយសារក្រុមគ្រួសារមិនបានដឹងថាគាត់ស្រវឹងស្រា ហើយទៅដេកនៅលើផ្លូវរថភ្លើងបែបនេះទេ ទើបព្រឹកឡើងព្រោះតែមិនឃើញជនរងគ្រោះចូលផ្ទះ ក៏នាំគ្នាដើររកស្រាប់តែប្រទះឃើញដេកស្លាប់នៅលើផ្លូវរថភ្លើង ដែលឃ្លាតពីផ្ទះប្រហែល១០០ម៉ែត្របាត់ទៅហើយ ទើបក្រុមគ្រួសាររាយការណ៍ប្រាប់សមត្ថកិច្ចតែម្តង។
សមត្ថកិច្ចក្នុងតំបន់បានឲ្យដឹងថា បុរសស្លាប់ដោយសាររថភ្លើងបុក-កិននេះ បើតាមប្រជាពលរដ្ឋរាយការណ៍ គឺគាត់តែងតែផឹកស្រាស្រវឹងគ្មានពេលស្បើយ ហើយពេលស្រវឹងម្តងៗអត់ទៅដេកផ្ទះទេ គឺទៅដេកតែកន្លែងផ្លូវរទេះភ្លើងរហូតហ្នឹង។សមត្ថកិច្ចបានបន្តថា ជនរងគ្រោះអាចត្រូវរថភ្លើងដឹកអ្នកដំណើរមកពីខេត្តព្រះសីហនុ បុកស្លាប់ក្នុងចន្លោះម៉ោង២៣យប់ ថ្ងៃទី០២ខែវិច្ឆិកា ឆ្នាំ២០១៧ ប៉ុន្តែពេលកើតហេតុភ្លាមៗគ្មានអ្នកណាដឹង លុះព្រឹកឡើងទើបក្រុមគ្រួសារប្រទះឃើញស្លាប់បាត់ទៅហើយ។
បន្ទាប់ពីមានករណីដូចខាងលើ សមត្ថកិច្ចជំនាញក៏បានចុះទៅពិនិត្យនៅកន្លែងកើតហេតុនិងធ្វើកោសល្យវិច័យសាកសព ដោយខ្លាចមានអំពើឃាតកម្មកើតឡើង ប៉ុន្តែក្រោយពិនិត្យសពទើបយល់ថា បុរសរងគ្រោះពិតជាស្លាប់ដោយសាររថភ្លើងកិនយ៉ាងពិតប្រាកដ ទើបប្រគល់សពទៅក្រុមគ្រួសារ ចាត់ចែងធ្វើបុណ្យតាមប្រពៃណី។
គួរបញ្ជាក់ផងដែរថា គ្រោះថ្នាក់ដែលផ្តើមដោយសារ រថភ្លើងបុកឬកិន ពិតជាករណីមួយបានកើតឡើងជាញឹកញាប់ ហើយគ្រោះថ្នាក់នេះ វាបានធ្វើឲ្យមនុស្សស្លាប់បាត់បង់ជីវិតយ៉ាងអាណោចអាធ័មជាច្រើនករណី។
ទន្ទឹមនឹងនេះ អាជ្ញាធរក៏ដូចជាសមត្ថកិច្ច សំណូមពរដល់ប្រជាពលរដ្ឋដែលមានលំនៅឋានក្បែរផ្លូវរថភ្លើង សូមមានការប្រុងប្រយ័ត្នខ្ពស់ ហើយត្រូវហាមប្រាមក្រុមគ្រួសារ កូន ចៅ កុំឲ្យទៅលេងក្បែរផ្លូវរថភ្លើង ទោះជាយប់ឬថ្ងៃក៏ដោយ ព្រោះរថភ្លើងអត់មានផ្លូវឯណាគេចចេញពីយើងបានទេ។/ ណារិទ្ធ
