កំពត ៖ សិក្ខាសាលា ស្តីពីការអភិវឌ្ឍន៍វិជ្ជាជីវៈ សម្រាប់ឆ្មបលើកទី១ខេត្តកំពត ត្រូវបានរៀបចំឡើង នៅឯសាលប្រជុំមន្ទីរសុខាភិបាលខេត្តកំពត នៅព្រឹកថ្ងៃទី៣១ខែតុលា ឆ្នាំ២០១៧នេះ ក្រោមវត្តមាន លោកសាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល ហែរហមដោយសហការីជាច្រើនរូប និងលោក លោកស្រីជាគ្រូពេទ្យឆ្មបគ្រប់តំបន់ទូទាំងខេត្តកំពត-កែប។
ទាក់ទងនឹងខ្លឹមសារសិក្ខាសាលាខាងលើ បើតាមគោលការណ៍ណែនាំ គឺតម្រូវឲ្យសមាជិកគណៈឆ្មបកម្ពុជាទាំងអស់ដែលកំពុងអនុវត្តការងារក្នុងព្រះរាជាណាចក្រកម្ពុជា ត្រូវសុំធ្វើអាជ្ញាប័ណ្ណឡើងវិញជាមួយគណៈឆ្មបកម្ពុជារៀងរាល់០៣ឆ្នាំម្តង សម្រាប់ឆ្មបជនជាតិខ្មែរ និងសម្រាប់ឆ្មបបរទេសគឺ០១ឆ្នាំម្តង។នេះជាភាពចាំបាច់មួយដោយត្រូវអនុវត្តន៍តាមគោលការណ៍យ៉ាងខ្ជាប់ខ្ជួន ដើម្បីធ្វើឲ្យប្រសើរឡើងវិញក្នុងការធ្វើបច្ចុប្បន្នភាពនិងអភិវឌ្ឍន៍ចំណេះដឹងនិងជំនាញរបស់ខ្លួន ហើយគេសង្ឃឹមជឿជាក់ថា តាមរយៈគោលការណ៍ណែនាំនេះ ឆ្មបទាំងអស់នឹងខិតខំកែឥរិយាបទក្នុងការអនុវត្តន៍ការងាររបស់ខ្លួន ដោយជំនាញច្បាស់លាស់ ប្រកបដោយក្រមសីលធម៌ ដើម្បីផ្តល់ការថែទាំប្រកបដោយគុណភាពនិងប្រសិទ្ធភាពខ្ពស់បំផុត សម្រាប់ស្ត្រីនិងទារក។
ផ្តើមពីចំណេះដឹងជាមូលដ្ឋានខាងលើនេះ លោកសាស្ត្រាចារ្យ ធា គ្រុយ បានលើកឡើងថា៖ គណៈឆ្មបកម្ពុជា គឺជាអង្គភាពមួយដែលតាមដានការអនុវត្តវិជ្ជាជីវៈរបស់ឆ្មបក្នុងប្រទេសកម្ពុជានិងទទួលខុសត្រូវលើការលើកកម្ពស់ស្តង់ដារនៃការថែទាំរបស់ឆ្មប ក្នុងគោលបំណងដើម្បីបម្រើនិងការពារសាធារណជន ហើយគោលការណ៍ណែនាំនេះនឹងជួយដល់ឆ្មបទាំងអស់ដែលកំពុងអនុវត្តន៍ការងារឆ្មបទូទាំងប្រទេស មានចំណេះដឹងនិងជំនាញ កាន់តែច្បាស់លាស់ ដើម្បីផ្តល់ការថែទាំយ៉ាងល្អបំផុតសម្រាប់ស្ត្រី ទារកនិងគ្រួសារ។ ឆ្មបអនុវត្តវិជ្ជាជីវៈឆ្មប គ្រូបង្រៀនឆ្មប អ្នកគ្រងឆ្មប អ្នកស្រាវជ្រាវការងារឆ្មប ដែលការងារនោះមានឥទ្ធិពលលើការអនុវត្តការងាររបស់ឆ្មប។ឆ្មបដែលបានចុះបញ្ជិកានិងទទួលបានអាជ្ញាប័ណ្ណទាំងអស់ មានកាតព្វកិច្ចក្នុងការបំពេញតាមស្តង់ដារនៃការការផ្តល់អាជ្ញាប័ណ្ណឡើងវិញ និងលក្ខខណ្ឌតម្រូវក្នុងការអភិវឌ្ឍន៍វិជ្ជាជីវៈបន្ត។
លោកសាស្ត្រាចារ្យ បានបញ្ជាក់យ៉ាងដូច្នោះថា ការអភិវឌ្ឍវិជ្ជាជីវៈបន្តគឺអាចបត់បែនបាន វាអាស្រ័យលើឆ្មបក្នុងការសម្រេចចិត្តជ្រើសរើសវគ្គបណ្តុះបណ្តាលដែលខ្លួនត្រូវការ ដើម្បីបំពេញតាមលក្ខខណ្ឌតម្រូវនៃការអភិវឌ្ឍវិជ្ជាជីវៈបន្ត ប៉ុន្តែការជ្រើសរើសនោះត្រូវអនុលោមទៅតាមពិធីសារជាតិស្តីពី ក្របខណ្ឌសមត្ថភាពស្នូលសម្រាប់វិជ្ជាជីវៈឆ្មប និងឯកសារណែនាំផ្សេងៗទៀតរបស់ក្រសួងសុខាភិបាល។លោកបានសង្កត់ធ្ងន់ថា គោលការណ៍ណែនាំនេះ ប្រើសម្រាប់ឆ្មបដែលបានចុះបញ្ជិកា និងកំពុងអនុវត្តវិជ្ជាជីវៈឆ្មបក្នុងប្រទេសកម្ពុជា ហើយវាមានសារៈប្រយោជន៍ផងដែរ សម្រាប់ប្រធានអង្គភាពដែលឆ្មបកំពុងបម្រើការងារ ស្ត្រី និងសាធារណជន ដើម្បីឲ្យពួកគេយល់ពីតួនាទីរបស់គណៈឆ្មបកម្ពុជាក្នុងការកំណត់ស្តង់ដារនៃការអនុវត្តវិជ្ជាជីវៈឆ្មប ឲ្យកាន់តែមានគុណភាព និងមានប្រសិទ្ធភាពខ្ពស់។/
ណារិទ្ធ
