សម្តេចក្រុមព្រះ នរោត្តម រណប្ញទ្ធិ ប្រធានគណបក្សរាជានិយមហ្វ៊ុនស៊ិនប៉ិច ដែលពីអតីតកាលធ្លាប់ធ្វើរដ្ឋាភិបាល ចម្រុះ ជាមួយគណបក្សប្រជាជនកម្ពុជា របស់សម្តេចនាយករដ្ឋមន្ត្រី ហ៊ុន សែន ឥឡូវមកប្រកាសត្រៀមធ្វើរដ្ឋាភិបាលចម្រុះ ក្រោយពីទទួលយកកៅអីសភា ៤១ក្នុងចំណោម ៥៥ របស់បក្សសង្គ្រោះជាតិ បន្ទាប់ពីបក្សប្រឆាំងនេះត្រូវរំលាយ ។
ព្រះអង្គបានមានបន្ទូលនៅឯដំណាក់ព្រះអង្គក្នុងសង្កាត់ទន្លេបាសាក់ រាជធានីភ្នំពេញថា គណបក្សរបស់ទ្រង់ នឹងទទួលយកអាសនៈសភាជាង ៤០ របស់គណបក្សសង្គ្រោះជាតិ ក្រោយពីបក្សមួយនេះត្រូវបានរំលាយ ហើយកៅអីរបស់គណបក្សត្រូវដកហូតយកមកបែងចែកនោះ ។
ព្រះអង្គបន្តថា ដំណើរការរំលាយគណបក្សសង្គ្រោះជាតិ គឺមិនមានឧបសគ្គអ្វីមករាំងស្ទះឡើយ បន្ទាប់ពីក្រសួង មហាផ្ទៃដាក់បណ្តឹងទៅតុលាការកំពូលសុំឱ្យរំលាយគណបក្សនេះចោល ដោយសារតែមេបក្សលោក កឹម សុខា ត្រូវបានចោទ ពីបទក្បត់ជាតិឃុបឃិតជាមួយបរទេសចង់ផ្តួលរំលំរដ្ឋាភិបាលហើយថា បក្សរបស់ទ្រង់កំពុងត្រៀមធ្វើការក្នុងរដ្ឋាភិបាលជា មួយគណបក្សប្រជាជនកម្ពុជា ដោយធ្វើបក្សប្រឆាំងមួយដែលប្រឆាំងមានហេតុផល ។
ព្រះអង្គមានបន្ទូលបន្ថែមទៀតថា“អាកន្លែងណាត្រូវស្រប ដើម្បីសន្តិភាពជូនជាតិយើងខ្ញុំស្រប អាកន្លែងណាយើងប្រឆាំងយើងខ្ញុំប្រឆាំង ”រួចដែលអាក្រក់បំផុត ប្រឆាំងអត់ឈប់អាក្រក់បំផុត អាស្របអត់ឈប់ ។ បើគាត់ធ្វើត្រូវយើងត្រូវគាំទ្រគាត់ បើកន្លែងណាដែលគាត់ធ្វើមិនត្រូវទេ យើងខ្ញុំប្រឆាំង” ។
ឆ្លើយតបនឹងការរិះគន់ពីចំណុចអវិជ្ជានរបស់គណបក្សហ្វ៊ុនស៊ិនប៉ិច ដែលបានបាត់បង់ការគាំទ្រច្រើននោះ ព្រះអង្គអះអាងថា ទិសដៅរបស់ ហ្វ៊ុនស៊ិនប៉ិចចាប់ពីពេលនេះទៅ គឺមានលទ្ធភាពកែទម្រង់ឱ្យបានល្អក្នុងសតវត្សរ៍ទី២១ នេះ ដោយព្រះអង្គបន្ថែមថា ធ្វើការក្នុងរដ្ឋាភិបាលជាមួយបក្សកាន់អំណាចត្រូវតែប្រឆាំងបើមានចំណុចអវីជ្ជមានរបស់គណបក្ស ដែលធ្វើការជាមួយគ្នា ប៉ុន្តែការប្រឆាំងក៏ត្រូវតែមានហេតុផលដែរ ។
សម្តេចក្រុមព្រះមានបន្ទូលថា “ដែលយើងទាំងអស់គ្នាត្រៀមខ្លួន នឹងចូលធ្វើរដ្ឋាភិបាល សូមមានសេចក្តីក្លាហានគាំទ្រ យើងផង ។ កុំថា ឱ្យតែចូលជាមួយគេថាកញ្ជៈគេ”។
ជាមួយនឹងការត្រៀមទទួលយកកៅអីរបស់បក្សប្រឆាំង និងត្រៀមធ្វើការជាមួយរដ្ឋាភិបាលរបស់ សម្តេច ហ៊ុន សែន សម្តេចក្រុមព្រះក៏បានរំព្ញកដល់សម្តីរបស់សម្តេចនាយករដ្ឋមន្ត្រី ដែលបានសរសើរផងដែរ ពីបក្សហ្វ៊ុនស៊ិនប៉ិចដែលទទួលបាន កៅអីច្រើនពីបក្សប្រឆាំងនោះ ទោះបីបក្សផ្សេងមិនទទួលយកក៏ដោយ ។
លោក សួស យ៉ារ៉ា អ្នកនាំពាក្យរបស់គណបក្សកាន់អំណាចបដិសេធធ្វើអត្ថាធិប្បាយដោយនិយាយថា លោកមិនបាន ដឹងពីគម្រោងរបស់សម្តេចក្រុមព្រះក្នុងការចូលរួមរដ្ឋាភិបាលចម្រុះនោះទេ ខណៈលោកកំពុងមានភារកិច្ចនៅឯបរទេស ហើយបានបង្វែរសំណូរទៅលោក សុខ ឥសាន
អ្នកនាំពាក្យរបស់បក្សកាន់អំណាចម្នាក់ទៀត ដែលមិនអាចទាក់ទងបានកាលពីម្សិលមិញ ៕
