ខេត្តរតនគិរី ៖ សំរាមជាច្រើនគរដូចភ្នំកំពុងតែជះក្លិនស្អុយអាសោចអស់រយៈពេលជិត ១ ខែមកហើយ នៅមុខផ្សារបានលុងដែលក្រុមហ៊ុនទំនើងគីម ជ្រា ដែលមានលោកជា គួង អ្នកម៉ៅការសំរាម មិនប្រមូលយកទៅចាក់ចោលនៅទីលានសំរាមឡើយ ដោយយកលេសថា ក្រុមហ៊ុនហេងដារ៉ានៅជំពាក់លុយក្រុមហ៊ុនម៉ៅការសម្រាម ។
ជាក់ស្តែងនៅព្រឹកថ្ងៃទី១៨ ខែតុលា ឆ្នាំ២០១៧ អ្នកយកព័ត៌មានយើងបានទៅផ្តិតយករូបភាពសំរាម ដែលគរទុកចោលនៅមុខផ្សារបានលុងពិតជាច្រើនពិតមែនឥឡូវនេះអាជ្ញាធរក្រុងបានលុងដោយមានការចង្អុលបង្ហាញពីឯកឧត្តមថង សាវុន អភិបាលនៃគណអភិបាលខេត្តរតនគិរី អោយយករថយន្តដឹកដី យកទៅប្រមូលសំរាមអោយចេញពីកន្លែងទីលានចាក់សំរាមបណ្តោះអាសន្ននៅមុខផ្សារបានលុង។
លោក ជាម សុផាត គណកម្មការគ្រប់គ្រងផ្សារបានលុងបានប្រាប់អោយដឹងនៅព្រឹកថ្ងៃទី១៨នេះថា សំរាមដែលគរនេះទុកចោលអស់រយៈជិត១ខែមកហើយ ដោយក្រុមហ៊ុនទំនើងគីម ជ្រា មិនប្រមូលយកទៅចាក់ចោល នៅទីលានចាក់សម្រាមនោះទេ ក្រុមហ៊ុនទំនើងមួយនេះ អោយតែមានបុណ្យទានធំៗតែងតែយកលេសមិនប្រមូលសំរាមធ្វើអោយខូចសោភ័ណ្ឌភាពទីក្រុងស្អាត បរិស្ថានស្អាត ធ្វើអោយប៉ះពាល់ដល់សុខភាពរបស់អាជីវករ និងភ្ញៀវជាតិ និងអន្តរជាតិ ទង្វើទាំងនេះគឺជាទំលាប់របស់ក្រុមហ៊ុនទំនើងគីម ជ្រា ដែលមានលោកជាគួង ជាអ្នកម៉ៅការនេះទៅហើយ។
លោកងិន នែល អភិបាលក្រុងបានលុង បានប្រាប់អោយដឹងថា ចំពោះសំរាមនៅមុខផ្សារបានលុង លោកបានហៅក្រុមហ៊ុនទំនើងនេះមកប្រមូលសំរាម២-៣លើកទៅហើយ ប៉ុន្តែក្រុមហ៊ុនហាក់បីដូចមិនកោតញញើតទៅអាជ្ញាធរទេ ព្រោះយកឡះថា ក្រុមហ៊ុនហេងដារ៉ានៅជំពាក់លុយជាច្រើន ចង់អោយអាជ្ញាធរជួយដោះស្រាយលុយជូនគាត់ ប៉ុន្តែលោកអភិបាលក្រុងបានលើកឡើងថា លុយដែលក្រុមហ៊ុនដារ៉ាជំពាក់នោះ គឺលោកអោយទៅប្តឹងទៅតុលាការទៅ លោកមិនអាចដោះស្រាយជូនការងារជំពាក់លុយនោះបានទេ។
មន្ទីរបរិស្ថាន និងសាលាក្រុងបានព្យាយាមទំនាក់ទំនងទៅក្រុមហ៊ុនទំនើងគីម ជ្រា ដើម្បីអោយប្រមូលសំរាមចេញពីផ្សារ និងតាមផ្លូវសំខាន់ៗតែក្រុមហ៊ុនបានលើកហេតុផលថា គ្មានកម្មករ ឥឡូវសាលាក្រុងកំពុងស្នើទៅមន្ទីរសេដ្ឋកិច្ចនិងហិរញ្ញវត្ថុខេត្តចាប់វិធានការបន្តព្រោះក្រុមហ៊ុននេះមិនស្តាប់តាមការណែនាំរបស់ជំនាញទេ។
លុះដល់ថ្ងៃទី១៨ ខែតុលា ឆ្នាំ២០១៧ ដោយយោងតាមប្រសាសន៍ដ៏ខ្ពង់ខ្ពស់ របស់ឯកឧត្តម ថង សាវុន អភិបាល នៃគណៈអភិបាលខេត្ត និងដើម្បីសោភ័ណភាព អនាម័យ បរិស្ថានល្អ រដ្ឋបាលក្រុងបានលុង ដឹកនាំដោយលោក ងិន ណែល អភិបាល នៃគណៈអភិបាលក្រុង និងមន្ទីរអង្គភាពពាក់ព័ន្ធ បានដឹកនាំកម្លាំងចុះប្រមូល និងដឹកសំរាមចេញពីកន្លែងស្តុកបណ្តោះអាសន្នខាងមុខផ្សារ ដោយក្រុមហ៊ុនវិនិយោគសំរាម គីម ជ្រា ពុំបានដឹកសំរាមចេញអស់រយៈពេលជិត១ខែមកហើយ ដែលបង្កអោយមានក្លិនស្អុយ ប៉ៈពាល់ដល់សោភ័ណភាព អនាម័យ បរិស្ថាន ដល់បងប្អូនប្រជាពលរដ្ឋ និងអាជីវករលក់ដូរនៅជុំវិញទីតាំងខាងលើនេះ៕
