ខេត្តបន្ទាយមានជ័យ ៖ជនជាតិកូរ៉េម្នាក់បានដេកស្លាប់នៅក្នុងផ្ទះសំណាក់ សមត្ថកិច្ចបានធ្វើការសន្និដ្ឋានថាស្លាប់ដោយជម្ងឺគាំងបេះដូង ដោយប្រើគ្រឿងខ្លាំងជ្រុល នៅវេលាម៉ោង៣រសៀល ថ្ងៃទី១៧ ខែតុលា ឆ្នាំ២០១៧ នៅចំណុចក្នុងបន្ទប់ជួលលេខ១០៤ ជាន់ទី១ ផ្ទះសំណាក់ យីហោប៉ោយប៉ែត នៅក្បែរការិយាល័យកាំកុងត្រូលក្រុងប៉ោយប៉ែត ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកអនុសេនីយ៍ឯក សរ សុភក្ត្រា មេបញ្ជាការស្ដីទីមូលដ្ឋានកងរាជអាវុធហត្ថក្រុងប៉ោយប៉ែត បានប្រាប់ឲ្យដឹងថា ជនរងគ្រោះឈ្មោះលីម ខ្យូហ៊ុន ភេទប្រុស អាយុ៤៦ឆ្នាំ ជនជាតិកូរ៉េ មកស្នាក់នៅបណ្តោះអាសន្ន នៅបន្ទប់ជួលលេខ១០៤ ជាន់ទី១ ផ្ទះសំណាក់ យីហោប៉ោយប៉ែត នៅក្បែរការិយាល័យកាំកុងត្រូលក្រុងប៉ោយប៉ែត ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។
លោកអនុសេនីយ៍ឯក សរ សុភក្ត្រា បានប្រាប់ឲ្យដឹងទៀតថា បើតាមការសាកសួរម្ចាស់ផ្ទះសំណាក់បានប្រាប់ថា ជនរងគ្រោះមកជួលបន្ទប់ស្នាក់នៅបណ្តោះអាសន្នលេខ១០៤នេះ តាំងពីថ្ងៃទី១១ ខែតុលា ឆ្នាំ២០១៧ មកម្លេះ ហើយជនរងគ្រោះបានបង់ប្រាក់ថ្លៃបន្ទប់មួយថ្ងៃម្តង ម្ចាស់ផ្ទះសំណាក់បានបញ្ជាក់ទៀតថា សពដងជនរងគ្រោះព្រឹកឡើងបានចេញពីបន្ទប់ជារៀងរាល់ថ្ងៃ ដោយឡែកនៅថ្ងៃទី១៧ នេះស្រាប់តែមិនឃើញជនរងគ្រោះចេញទៅណាសោះ ទើបនៅម៉ោង១៥នេះគាត់បានឲ្យបុគ្គលិកឡើងទៅមើលក្នុងបន្ទប់ស្រាប់តែឃើញជនរងគ្រោះដេកស្លាប់ ពេលនោះគាត់បានរាយការណ៍ឲ្យសមត្ថកិច្ចអាវុធហត្ថតែម្ដង។
លោកអនុសេនីយ៍ឯក សរ សុភក្ត្រា បានប្រាប់ឲ្យដឹងទៀតថា នៅពេលសមត្ថកិច្ចត្រួតពិនិត្យក្នុងបន្ទប់ឃើញមានជញ្ជីងសម្រាប់ថ្លឹងគ្រឿងងញៀន១ សារាងសំរាប់ប្រើប្រាស់គ្រឿងញៀនចំនួន១១ និងឧបករណ៍ប្រើប្រាស់គ្រឿងញៀនមួយចំនួន និងមានរថយន្ត១គ្រឿង។
លោកអនុសេនីយ៍ឯក សរ សុភក្ត្រា បានបញ្ជាក់ទៀតថា បើតាមការសន្និដ្ឋានជនរងគ្រោះអាចប្រើប្រាស់គ្រឿងញៀនលើសកម្រិតទើបបណ្ដាលឲ្យគាំងបេះដូងស្លាប់តែម្តងគ្មានជាប់ពាក់ពាន់និងអំពើឃាតកម្មនោះទេនេះហើយលទ្ធិផលនាក់បើប្រាស់គ្រឿងញៀនចុងក្រោយគឺស្លាប់។
សពជនរងគ្រោះក្រោយពីសមត្ថកិច្ចធ្វើការពិនិត្យរួចរាល់ហើយនោះត្រូវបានយកមកតម្កល់នៅវត្តបាលិលេយ្យ រងចាំសាច់ញាតិ ក្រុមគ្រួសារ យកទៅធ្វើបុណ្យតាមប្រពៃណី ចំណែក រថយន្ត និងវត្ថុតាងផ្សេងទៀត ត្រូវបានកម្លាំងនគរបាលក្រុងប៉ោយប៉ែតយកទៅគ្រប់គ្រង៕
