បន្ទាយមានជ័យ៖ បែកធ្លាយរឿងអាស្រូវកូនប្រុសលោក អាត់ ខែម ស្នងការខេត្តបន្ទាយមានជ័យ មានការឃុបឃិតជាមួយយោធា៥០៣ច្រកចំការគរ លួចនាំចូលម៉ូតូគេចពន្ធទំនើបៗ និងរថយន្តចង្កូតស្ដាំទំនើបៗពីទឹកដីសៀម គឺដោយសារអាងមានឪពុករបស់ខ្លួនជាខ្នងបង្អែកផងនិងមានការបើកភ្លើងខៀវពីជំនាញគយ។
ប្រភពពីមន្ត្រីនគរបាលក្នុង ខេត្តបន្ទាយមានជ័យ បានឲ្យដឹងថាលោក ខែម សោភ័ណ ជាប់ពាក់ព័ន្ធនឹងការនាំចូលម៉ូតូ គេច ពន្ធទំនើបៗ និងរថយន្តចង្កូតស្ដាំទំនើបៗជាច្រើន ឆ្នាំមកហើយ មិនដែលមាន សមត្ថកិច្ចណាហ៊ានប៉ះពាល់ នោះទេ។
ដោយសារតែ មន្ត្រីយោធាការពា រព្រំដែនក៏ដូចជាមន្ត្រីន គរបាលការពារព្រំដែនក្នុង ខេត្តបន្ទាយមានជ័យ មានការយោគយល់ដល់លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ទើបបណ្ដោយឲ្យលោក ខែម សោភ័ណ ធ្វើអ្វីៗស្រេចតែអំពើចិត្ត។ ហើយបច្ចុប្បន្ននេះលោក ខែម សោភ័ណ បានក្លាយជាមេខ្លោងនាំចូលម៉ូតូគេចពន្ធពីស្រុកសៀម ដោយគ្មានសមត្ថកិច្ចពាក់ព័ន្ធណាហ៊ានចាត់វិធានការទប់ស្កាត់ឡើយ។
ជាងនេះទៅទៀតលោក ខែម សោភ័ណ ក៏មានជាប់ពាក់ព័ន្ធទៅនឹងការនាំចូលរថយន្តចង្កូតស្ដាំគេចពន្ធស៊េរីទំនើបៗពីទឹកដីសៀម ចូលទឹកដីខ្មែរយ៉ាងរលូនដែរដោយមានការឃុបឃិតពីសមត្ថកិច្ចជាច្រើនស្ថាប័ន។ មានដូចជាមន្ត្រីគយ សមត្ថកិច្ចតាមច្រករបៀង និងនគរបាលប្រឆាំងបទល្មើសសេដ្ឋកិច្ចជាដើម។
ប្រភពពីប្រជាពលរដ្ឋរស់នៅតំបន់ព្រំដែនក្នុងស្រុកស្វាយចេក បានឲ្យដឹងថា មួយរយៈពេលកន្លងទៅនេះពួកគាត់សង្កេតឃើញសកម្មភាពនាំចូលម៉ូតូទំនើបៗគេចពន្ធពីទឹកដីសៀម ចូលទឹកដីខ្មែរតាមច្រករបៀងចំការគ ស្រុកស្វាយចេក កើតឡើងកាន់តែច្រើនជាងមុនទៅទៀត។ដោយបានឃុបឃិតជាមួយកងយោធាវរសេនាតូចថ្មើរជើងលេខ៥០៣ ដែលមានលោកឧត្តមសេនីយ៍ត្រី ឃួន ជឿន ជាមេបញ្ជាការ ហើយវរ៥០៣ស្ថិតនៅក្រោមចំណុះយោធភូមិភាគ៥ដែលមានលោក ប៊ុន សេង ជាមេបញ្ជាការ។ ទោះជាយ៉ាងណា មជ្ឈដ្ឋាននានាបានលើកឡើងថាបើកគ្មានការបើកភ្លើងខៀវពីសំណាក់គយចល័តរបស់ ក្រសួងទេ ក៏មិនអាចរកស៊ីបានរលូនបែបនេះឡើយ។
ជុំវិញការចោទប្រកាន់ខាងលើនេះគួរតែថ្នាក់ដឹកនាំក្រសួងមហាផ្ទៃ និងលោក នេត សាវឿន អគ្គស្នងការនគរបាលជាតិ គួរពិនិត្យមើលភាពមិនប្រក្រតីខាងលើនេះផងទានកុំអោយខូចកិត្តិយសនិងសេចក្តីថ្លៃថ្នូរ របស់កម្លាំងនគរបាលជាតិហើយ ករណីលោក ខែម សោភ័ណ ហ៊ាននាំចូលម៉ូតូគេចពន្ធទំនើបៗនិងរថយន្តចង្កូតស្ដាំទំនើបៗពីទឹកដីសៀម គឺព្រោះតែមានឪពុករបស់ខ្លួនជាខ្នងបង្អែក។
ពាក់ព័ន្ធនឹងបញ្ហាខាងលើនេះ សារព័ត៌មានយើងពុំអាចសុំការបំភ្លឺពីលោក ខែម សោភ័ណ បាននៅឡើយនោះទេ ? ៕
