កំពត ៖ មិនដឹងជាមូលហេតុអ្វីទេបានជាអ្នករត់តាក់ស៊ីក្នុងអាណាចក្រស្រុកកំពង់ត្រាច តែងយកចិញ្ចើមផ្លូវមុខផ្យារធ្វើជាចំណតរថយន្តហើយនាំគ្នារត់ចាប់ម៉ូយប្រសេកប្រសាចពេញផ្លូវ ដែលបង្កឲ្យមានការរំខានដល់អ្នកដំណើរ និងកកស្ទះចរាចរណ៍ជារៀងរាល់ថ្ងៃនោះ។នេះជាការចោទសួរពីសំណាក់មហាជនដែលជាអ្នកដំណើរ ដែលតែងតែឆ្លងកាត់ចំណុចមុខផ្សារកំពង់ត្រាចដ៏ចង្អៀតនេះ។
ចំពោះមជ្ឈដ្ឋានដឹងរឿងដែលគេរស់នៅក្នុងតំបន់ស្រុកកំពង់ត្រាច បានឲ្យដឹងថា តាមពិតចំណតរថយន្តត្រូវគេធ្វើរួចរាល់តាំងពី៣ឆ្នាំមុនម្លេះ ប៉ុន្តែក្រុមអ្នករត់តាក់ស៊ីមិនបានយករថយន្តរបស់ខ្លួនទៅចតនៅឯចំណតទេ ព្រោះទីតាំងចតរថយន្តវានៅមិនស្ថិតជាប់នឹងដងផ្លូវ ម្យ៉ាងទៀតភ្ញៀវឬម៉ូយជិះតាក់ស៊ី គេមិនសូវចូលទៅទីនោះឡើយ ទើបក្រុមអ្នករត់តាក់ស៊ី ទាំងធុនតូច ធុនមធ្យមត្រូវតែបង្ខំចិត្តយករថយន្តគ្រប់ប្រភេទមកចតពាសពេញចិញ្ចើមផ្លូវយ៉ាងអាណាធិបតេយ្យបែបនេះ។គេបានរិះគន់ផងដែរថា មុខផ្សារស្រុកកំពង់ត្រាច ក្នុងខេត្តកំពតនេះ ក្រៅពីក្លាយជាចំណតរថយន្តតាក់ស៊ីបង្កភាពរញ៉េរញ៉ៃនោះ ពេលថ្មីៗនេះក៏មានការពង្រីកតូបលក់ឥវ៉ាន់រំលោភយកចំណីចិញ្ចើមផ្លូវជាតិលេខ៣៣អស់មួយចំណែកដែរ ដែលជាហេតុធ្វើឲ្យដងផ្លូវមួយនេះកាន់តែចង្អៀតថែមទៀត ពិសេសចំណុចផ្លូវចេញចូលក្នុងផ្សារកំពង់ត្រាចផ្នែកខាងលិច ហើយតូបដែលកំពុងពង្រីកសាបបន្ថែមនេះ ត្រូវគេស្គាល់ជាតូបរបស់កូនគណៈកម្មការផ្សារស្រុកកំពង់ត្រាចនាបច្ចប្បន្នឈ្មោះ ហាម បាវ។
មហាជនបានរិះគន់ថា បើទោះជាដងផ្លូវជាតិលេខ៣៣ត្រូវបានពង្រីកឲ្យកាន់តែទូលាយបែបនេះក្តី ប៉ុន្តែចំណុចមុខផ្សារកំពង់ត្រាច នៅតែមានការកកស្ទះចរាចរណ៍ជារៀងរាល់ព្រឹក ដែលករណីបែបនេះវាចាត់ទុកជាទម្លាប់ទៅហើយៗគេដឹងថា ចំណតរថយន្តគឺគ្រប់គ្រងដោយលោកហាម បាវ ដែលជានិច្ចកាលត្រូវហែកសំបុត្រភាស៊ីយកកម្រៃពីចំណតរថយន្តជាប្រចាំ តែអ្នកគ្រប់គ្រងចំណត ហាក់មិនបានខ្វាយខ្វល់ពីកត្តាលំបាករបស់អ្នកដំណើរលើយគឺគិតតែប្រមូលលុយថ្លៃភាស៊ីចំណតរាល់ថ្ងៃ។លើសពីនេះត្រង់ចំណុចមុខផ្សារកំពង់ត្រាច ពេលឱកាសបុណ្យជាតិម្តងៗតែងស្ទះចរាចរណ៍ស្ថិតតាមកំណាត់ផ្លូវខាងលើ ដោយសារមនុស្សចេញចូលច្រើនថែមទាំងមានយានយន្តគ្រប់ប្រភេទចតឈប់លាយឡំជាមួយរថយន្តឈ្នួលពាសពាញចិញ្ចើមផ្លូវ ជួនកាលស្ទះចរាចរណ៍រាប់ម៉ោងក៏មានដែរ។
ទាក់ទិននឹងរថយន្តតាក់ស៊ីរកចំណតមិនទាន់ឃើញខាងលើ លោកហាម បាវ ប្រធានភាស៊ីចំណតរថយន្តក្នុងស្រុកកំពង់ត្រាច បានប្រាប់ កម្ពុជាថ្មី តាមទូរស័ព្ទនៅរសៀលថ្ងៃទី១៤ខែតុលា ឆ្នាំ២០១៧នេះថា លោកបានប្រាប់ម្ចាស់ឡានតាក់ស៊ីឲ្យចូលទៅចតនៅឯចំណតដែរ ប៉ុន្តែគេមិនព្រមទៅព្រោះនៅកន្លែងចតរថយន្តនោះគ្មានម៉ូយឬភ្ញៀវទេ ណាមួយចំណតរថយន្តក៏នៅឆ្ងាយពីផ្សារផងដែរ។លោកហាម បាវ ថាបើចង់ដឹងច្បាស់សួរចៅហ្វាយស្រុកទៅពិតជាដឹងមិនខានលើយ។
ដោយឡែក អភិបាលស្រុកកំពង់ត្រាច លោកអ៊ុម ស៊ីណាត បានប្រាប់ឲ្យដឹងនៅក្នុងថ្ងៃដដែលនេះថា រឿងស្ទះផ្លូវក្នុងចំណុចមុខផ្សារលោកពិតជាទទួលស្គាល់ ប៉ុន្តែក្នុងបំណាច់ខែក្រោយនេះ លោកនឹងឲ្យក្រុមអ្នករត់តាក់ស៊ីទាំងអស់ចូលទៅចាប់ម៉ូយនៅឯចំណតថ្មី ក្បែរសាលារៀនចិន គាកឃួន ដែលមានចម្ងាយពីចំណុចផ្ សារកំពង់ត្រាច ប្រមាណ៣០០ម៉ែត្រប៉ុណ្ណោះ។/
ណារិទ្ធ
