កែប ៖ ប្រជាពលរដ្ឋចំនួន៩៩គ្រួសារដែលរស់នៅលើដីឯកជនរបស់រដ្ឋ ស្ថិតក្នុងបរិវេណកាស៊ីណូចាស់ នៃក្រុងកែប ខេត្តកែប ត្រូវបានរដ្ឋបាលខេត្ត កោះប្រជុំធ្វើបច្ចុប្បន្នភាព នៅព្រឹកថ្ងៃទី១២ខែតុលា ឆ្នាំ២០១៧ ដើម្បីស្រង់ស្ថិតិនិងប្រមូលឯកសារពាក់ព័ន្ធនានា មកវាយតម្លៃសម្រាប់សុំុគោលការណ៍ពីរាជរដ្ឋាភិបាល ក្នុងការប្រគល់ជូនពួកគាត់រស់នៅដោយស្របច្បាប់។
ការកោះប្រជុំនេះ បានធ្វើឡើងនៅក្នុងបរិវេណមន្ទីររៀបចំដែនដីនគរូនីយកម្ម សំណង់ និងសុរិយោដីខេត្តកែប ដោយមានការចូលរួមពីសំណាក់ លោក ពេទ យុទ្ធី អភិបាលរងខេត្ត លោក អឹុង ឆាយ អភិបាលរងខេត្តកែប ព្រមទាំងអស់លោកជាមន្ត្រីមកពីអង្គភាពជំនាញទូទាំងខេត្ត។
ទាក់ទិននឹងសំណង់ក្នុងបរិវេណកាស៊ីណូចាស់នេះ លោកទេព យុទ្ធី អភិបាលរងខេត្ត បានលើកឡើងថា ទីតាំងកាស៊ីណូចាស់នេះជាសំណង់មានសភាពទ្រុឌទ្រោមដែលបន្សល់តាំងពីជំនាន់អាណានិគម និយមបារាំង និងមានទំហំផ្ទៃដីសរុប១២.០០០ម៉ែត្រក្រឡា ស្ថិតក្នុងភូមិកែប សង្កាត់កែប ក្រុងកែប ដោយកន្លងមកនិងអំឡុងបច្ចុប្បន្នមានប្រជាពលរដ្ឋបានមកតាំងលំនៅដ្ឋានចំនួន៩៩គ្រួសារ។លោកបានបញ្ជាក់ថា ចំណុចដីកាស៊ីណូចាស់ខាងលើកន្លងមក ប្រជាពលរដ្ឋក៏បានសំណូមពរយ៉ាងទទូចមកអាជ្ញាធរ ដើម្បីសុំសិទ្ធិកាន់កាប់ដីធ្លីសង់លំនៅដ្ឋានផងដែរ ប៉ុន្តែខាងអាជ្ញាធរក្នុងតំបន់ពុំមានលទ្ធភាពសម្រេចនោះទេ ព្រោះទីតាំងដីកាស៊ីណូចាស់គឺជាដីឯកជនរបស់រដ្ឋ ទើបខណៈនេះរដ្ឋបាលខេត្តបានធ្វើកិច្ចប្រជុំ ធ្វើបច្ចុប្បន្នភាព ធ្វើការសម្របសម្រួល ដើម្បីស្រង់ស្ថិតិ ប្រជាពលរដ្ឋដើម្បីឲ្យពួកគាត់ ត្រៀមឯកសារពាក់ព័ន្ធនានា សម្រាប់សុំយោបល់និងសុំគោលការណ៍ពីរាជរដ្ឋាភិបាលក្នុងគោលបំណងឲ្យពួកគាត់មានសិទ្ធិកាន់កាប់ និងរស់នៅលើចំណុចដីនេះ ដោយស្របច្បាប់។
ដោយឡែក លោកវ៉ៅ សុខា ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តកែប បានបញ្ជាក់យ៉ាងដូច្នោះថា ទីតាំងកាស៊ីណូចាស់មានទំហំ១២.០០០ម៉ែត្រក្រឡា ក្នុងភូមិសាស្ត្រសង្កាត់កែប ក្រុងកែប ស្ថិតក្នុងប្លង់លេខ៥៤ ហើយដោយសារទីតាំងខាងលើ ជាតំបន់និងជាគោលដៅក្នុងការចុះបញ្ជីដីធ្លីមានលក្ខណៈជាប្រព័ន្ធ ចឹងយើងឃើញថាដីកន្លែងហ្នឹង ពេលគេធ្វើគឺជាប់ជាដីសារពើភណ្ឌរបស់រដ្ឋ ដូច្នេះយើងពុំអាចឃ្វៀលចេញដើម្បីធ្វើប័ណ្ណកម្មសិទ្ធិជូនគាត់បានឡើយ ថ្វីត្បិតប្រជាពលរដ្ឋបានសំណូមពរមកដល់ជំនាញឲ្យជួយចេញប័ណ្ណកម្មសិទ្ធិបែបណាក៏មិនទាន់បានដែរ លុះត្រាដីខាងលើបានកាត់ចេញពីបញ្ជីសារពើភណ្ឌរបស់រដ្ឋរួចហើយ។លោកបានឲ្យដឹងទៀតថា បន្ទាប់ពីមានការស្នើសុំជាបន្តបន្ទាប់ពីសំណាក់ប្រជាពលរដ្ឋ ខាងមន្ទីរជំនាញរបស់លោក ដោយមានការអនុញ្ញាត្តពីអាជ្ញាធរខេត្តកែប ពិសេស ឯកឧត្តម អភិបាលខេត្ត បានផ្តល់សិទ្ធិឲ្យមន្ទីរជំនាញរៀបចំប្រជុំជាមួយបងប្អូនប្រជាពលរដ្ឋ ដើម្បីប្រមូលនូវព័ត៌មានពាក់ព័ន្ធនានា ទាក់ទិននឹងការរស់នៅ ក៏ដូចជាការកាន់កាប់របស់ពួកគាត់យ៉ាងដូចម្តេច ទើបអាជ្ញាធរខេត្តលើកសំណើរសុំទៅប្រមុខរាជរដ្ឋាភិបាល ដើម្បីជម្រះបញ្ជីសារពើភណ្ឌពីដីរដ្ឋ ជូនទៅប្រជាពលរដ្ឋឲ្យមានសិទ្ធិកាន់កាប់និងមានលំនឹងក្នុងការកែលម្អលំនៅឋានតាមតម្រូវការ ព្រមទាំងអភិវឌ្ឍន៍តំបន់នេះជាកន្លែងមួយមានសោភណភាពប្រកបដោយកត្តាអនាម័យខ្ពស់។លោកបានអះអាងថា ក្នុងពេលបច្ចុប្បន្ន ក្នុងទីតាំងដីកាស៊ីណូចាស់នៃភូមិសាស្ត្រក្រុងកែបនេះ មានប្រជាពលរដ្ឋរស់នៅចំនួន៩៩គ្រួសារ ស្មើនឹង១០៩ក្បាលដី ហើយអ្នករស់នៅចំណុចខាងលើ ភាគច្រើនជាមន្ត្រីកងកម្លាំងប្រដាប់អាវុធ(នគរបាល)ដែលគាត់មកពីតំបន់ឆ្ងាយៗហើយមកបម្រើការងារនៅក្នុងខេត្តកែបនេះ។/ ណារិទ្ធ
