សេចក្តីរាយការណ៍បានឱ្យដឹងថា លោក ចាន់ សុធា ដាក់កម្លាំងឈរជើងតាមបន្ទាត់ព្រំដែនខ្មែរ-ថៃ ក្នុងខេត្តបាត់ដំបង ដើម្បីយកប្រាក់ពីទំនិញចេញ-ចូល ជារៀងរាល់ថ្ងៃ ។ មិនតែប៉ុណ្ណោះរថយន្តដឹកទំនិញដែលបានបង់ប្រាក់ឱ្យសមត្ថកិច្ចហើយ នោះក៏ត្រូវទាក់ទងលោក ចាន់ សុធា ដើម្បីបង់ប្រាក់តាមទូរស័ព្ទ ។
ប្រភពព័ត៌មានបានបន្តឱ្យដឹងទៀតថា ទោះបីជាបទបញ្ជាក្រសួងមហាផ្ទៃ បានដាក់ចុះយ៉ាងណាក៏ដោយក៏មកដល់ ពេលនេះ លោក ចាន់ សុធា នៅតែអាចប្រមូលលុយពីពួកឈ្មួញរកស៊ីបានដដែល ដោយស្រួលជារៀងរាល់ថ្ងៃផងដែរ ។ ប្រសិនបើមិនបង់ប្រាក់ឱ្យទេ មុខជាត្រូវទទួលរងការគំរាមចាប់មិនខាន ។ ដូច្នេះឈ្មួញអ្នករកស៊ីត្រូវតែបង្ខំចិត្តបង់ប្រាក់ឱ្យលោក ចាន់ សុធា មិនអាចខ្វះបានឡើយ ។
គួររំលឹកផងដែរថា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានដាក់បទបញ្ជាឱ្យ សមត្ថកិច្ចនគរបាលទាំងអស់ដកប៉ុស្តិ៍ ឬកុងត្រូលជជុះគ្រប់ទីកន្លែងទូទាំងខេត្ត ពោលគឺមិនមានការយកប្រាក់ពីអ្នករកស៊ីនោះ ឡើយ ។ ប៉ុន្តែលោក ចាន់ សុធា មន្ត្រីនគរបាលសេដ្ឋកិច្ចដែលថ្នាក់ដឹកនាំនាយកដ្ឋានប្រឆាំងបទល្មើសសេដ្ឋកិច្ចគ្រាមុនដាក់ឱ្យ ទៅប្រចាំការចាំយកលុយពីរថយន្តដឹកទំនិញគ្រប់ប្រភេទ និងដឹកឈើនៅខេត្តបាត់ដំបងពេលនេះ ត្រូវគេរាយការណ៍ថា នៅតែ បន្តប្រើសហសេវិករបស់ខ្លួនយកប្រាក់ពីរថយន្តដឹកទំនិញដដែល ។
វាក្លាយទៅជាបញ្ហាបោកតគ្នា ពោលគឺថ្នាក់ដឹកនាំនាយកដ្ឋានមិនដឹងថា លោក ចាន់ សុធា នៅបន្តយកលុយបានរាប់ ម៉ឺនដុល្លារ ក្នុងមួយខែៗក្រោមស្លាកនាយកដ្ឋានប្រឆាំងបទល្មើសសេដ្ឋកិច្ចនោះឡើយ ។ គ្រាមុនលោក ចាន់ សុធា បានបង់ ប្រាក់ទៅឱ្យនាយកដ្ឋានប្រឆាំងបទល្មើសសេដ្ឋកិច្ចតាមការកំណត់ ។ ប៉ុន្តែពេលនេះក្រោមលេសបំបាត់កុងត្រូលជជុះមានន័យ ថា “កន្ទេលធំបន្លំដេក” ដូចជា លោក ចាន់ សុធា មិនបានរកប្រាក់ទៀតទេ ដូច្នេះនាយកដ្ឋានក៏មិនតម្រូវឱ្យបង់ប្រាក់ដែរ ។
សារព័ត៌មានយើងពុំអាចសុំការបំភ្លឺពីលោក ចាន់ សុធា បាននោះទេ ?
