ខេត្តបាត់ដំបង ៖ មន្ត្រីរដ្ឋបាលព្រៃឈើស្រុកសំឡូត បានសហការជាមួយកម្លាំងកងរាជអាវុធហត្ថស្រុក រតន:មណ្ឌល ស្ទាក់ចាប់បានរថយន្ត ពាក់ស្លាកលេខនគរបាល មួយគ្រឿងដែល ដឹកឈើ ប្រភេទឈើគគីរ និងឈើដួងចែម ប្រភេទក្តារងឿ ចំនួន៧សន្លឹក កាលពីវេលាម៉ោង១២ និង៣០នាទីថ្ងៃទី០៣ ខែតុលា ឆ្នាំ២០១៧ស្ថិតនៅលើផ្លូវជាតិលេខ៥៧ ត្រង់ចំណុចភូមិដង្គត់ ឃុំស្ដៅ ស្រុករតន:មណ្ឌល ខេត្តបាត់ដំបង។
ប្រភពពីសមត្ថកិចឲ្យដឹងថា រថយន្តដឹកឈើនោះ ជាប្រភេទរថយន្តកូរ៉េទម្ងន់២,៥តោន ពាក់ស្លាកលេខនគរបាល២-១៥៤៣ និងជារថយន្តរបស់អង្គភាពនគរបាលវរៈការពារព្រំដែនគោកលេខ៨២៣ ដែលមានទីតាំងក្បែរផ្លូវទៅកាន់ច្រកទ្វារតំបន់ «៤០០» ស្រុកសំឡូត បើកបរដោយមន្ត្រីនគរបាលម្នាក់ ឈ្មោះមឿន វាសនា និងរួមដំណើការពារដោយមនុស្ស៤នាក់ទៀត ដែលជាមន្ត្រីនគរបាលនៅអង្គភាព៨២៣ជាមួយគ្នា ។
ប្រភពដដែលបញ្ជាក់ថា ឈើដែលមន្ត្រីព្រៃឈើ និងកងរាជអាវុធហត្ថស្ទាក់ចាប់នោះ មានចំនួន៧សន្លឹកធំៗ (ក្ដារងឿ) ជាប្រភេទឈើគគីរ និងឈើដួងចែម ។
បើតាមការសួរនាំមន្ត្រីជំនាញបានប្រាប់ថា ឈើនោះជារបស់លោកយឹម វិចិត្រ មេបញ្ជាការនគរបាលវរ:ការពារព្រំដែនគោកលេខ៨២៣នេះតែម្ដង ។ លោកយឹម វិចិត្រ បានបញ្ជាឲ្យកូនចៅក្រោមឱវាទដឹកឈើនេះ ចេញពីទីបញ្ជាការវរ:ព្រំដែន៨២៣ នៅស្រុកសំឡូត យកទៅទុកនៅផ្ទះរបស់ខ្លួននៅឯក្រុងបាត់ដំបង ដោយគ្មានលិខិតស្នាមទេ លុះដឹកដល់ចំណុចខាងលើ ក៏ត្រូវមេព្រៃ និងកម្លាំងកងរាជអាវុធហត្ថស្ទាក់ជាប់តែម្ដង។ ពេលនេះឈើ និងរថយន្តកំពុងឃាត់ទុកនៅកន្លែងកងរាជអាវុធហត្ថស្រុករតន:មណ្ឌល ដើម្បីសួរនាំ ខណ:មានអ្នកអន្តរាគមន៍តាន់តែខ្លាំងឡើងៗ ដើម្បីឱ្យដោះលែងរថយន្ត និងឈើរបស់លោកយឹម វិចិត្រ វិញ ប៉ុន្តែមេព្រៃបានអះអាងថាឈើទាំងនេះនឹងចាត់ការតាមនីតិវិធី។
