កំពត ៖ នៅព្រឹកថ្ងៃទី០១ខែតុលា ឆ្នាំ២០១៧រដ្ឋបាលខេត្តកំពតបានរៀបចំពិធីសំណេះសំណាលជាមួយសិស្សជ័យលាភីប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ថ្ងៃទី២១ខែសីហា ឆ្នាំ២០១៧ ក្រោមអធិបតីភាព លោក បណ្ឌិត ប៉ែន ស៊ីម៉ន ទេសរដ្ឋមន្ត្រី ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អមដោយសហការីជាច្រើនរូប។
ពិធីនេះក៏មានការចូលរួមផងដែរ ពីសំណាក់ លោក ចាន់ ចេស្តា អភិបាលនៃគណៈអភិបាលខេត្តកំពត និងលោក លោកស្រីជាអភិបាលរងខេត្ត ប្រធាន អនុប្រធានមន្ទីរអង្គភាពពាក់ព័ន្ធ ជុំវិញខេត្ត លោកគ្រូ អ្នកគ្រូ អាណាព្យាបាល និងសិស្សានុសិស្សដែលប្រឡងជាប់សញ្ញាបត្រមធ្យមសិក្សាទុតិយភូមិ គ្រប់និទ្ទេសទូទាំងខេត្តកំពត។
តាមរបាយការណ៍របស់ លោកចាន់ ចេស្តា បានឲ្យដឹងថា ជារួមបើគិតមកដល់ខែសីហា ឆ្នាំ២០១៧ បុគ្គលិកអប់រំទូទាំងខេត្តកំពត សរុបមានចំនួន៥.៧៩២នាក់ ក្នុងនោះស្រី ២.៤៤៣នាក់ ហើយមតេយ្យសិក្សារដ្ឋមាន១៩២កន្លែង ក្នុងនោះមតេយ្យសិក្សាដាច់ដោយឡែកចំនួន០៥សាលាដែលមានកុមារសរុប ៦.៨០៧នាក់ គ្រូបង្រៀនសរុប២៥៥នាក់។ ចំពោះសាលាបឋមសិក្សា មានចំនួន៣០៦សាលា មានសិស្សសរុប ៨១.៨១៧នាក់ គ្រូបង្រៀនសរុប២.៨៣៨នាក់។ អនុវិទ្យាល័យចំនួន៧៧សាលា មានសិស្សសរុប១៩.០៧៦នាក់ គ្រូបង្រៀន១.១៩០នាក់ និងវិទ្យាល័យចំនួន២២សាលា មានសិស្សសរុបចំនួន២៣.៦៣៨នាក់។
ដោយឡែក សាលាគរុកោសល្យនិងវិក្រិត្យការខេត្តមានចំនួន១កន្លែង មានគរុសិស្សសរុប១៤៣នាក់ បុគ្គលិកសរុបចំនួន៣០នាក់។សាកលវិទ្យាល័យឯកជនចំនួន០៤ រួមមាន៖ សាកលវិទ្យាល័យអង្គរខេមរា, សាកលវិទ្យាល័យគ្រប់គ្រងនិងសេដ្ឋកិច្ច, សាកលវិទ្យាល័យអាយយូ, និងសាកលវិទ្យាល័យឯកទេសនៃកម្ពុជា។
លោកបានបញ្ជាក់ថា ចំពោះលទ្ធផលប្រឡងសញ្ញាបត្រមធ្យមសិក្សាទុតិយភូមិក្នុងឆ្នាំ២០១៧នេះពិតជាមានភាពល្អប្រសើរជាងឆ្នាំមុនៗកន្លងទៅ ដោយសម័យប្រឡងឆ្នាំនេះមានបេក្ខជនមកប្រឡងសរុប ៥.០៦៤នាក់ ក្នុងនោះស្រី២.៣៦៣នាក់ ហើយមានបេក្ខជនប្តឡងជាប់សរុបចំនួន ៣.៤៧៥នាក់ ក្នុងនោះស្រី ១.៦៥០នាក់ បើប្រៀបធៀបឆ្នាំ២០១៦កើនឡើង៧.៧០%ឯណោះ។
លោកថា សម័យប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី២១ ខែសីហា ឆ្នាំ២០១៧ បើគិតជាលទ្ធផលពេលនេះ គឺមានសិស្សទទួលបានជ័យលាភីនិទ្ទេស A ចំនួន២១នាក់ ស្រី១០នាក់ នៃទូទាំងខេត្តកំពត ក្នុងនោះទី១. ក្រុងកំពតមានចំនួន០៤នាក់ ស្រី០២។ទី២.ស្រុកបន្ទាយមាស ចំនួន០៥នាក់ ស្រី០២នាក់ ទី៣.ស្រុកដងទង់ចំនួន០២នាក់ស្រីទាំង២នាក់ និងទី៤.ស្រុកអង្គរជ័យចំនួន១០នាក់ ស្រី០៤នាក់។ និទ្ទេស B ចំនួន១០៣នាក់ ស្រី៤៩នាក់ និទ្ទេស C ចំនួន២៦១នាក់ ស្រី១៣៦នាក់ និទ្ទេស D ចំនួន ៥២៨នាក់ ស្រី២៩០នាក់ និងនិទ្ទេស E ចំនួន ២.៥៦២នាក់ ស្រី១.១៦៥នាក់។
ថ្លែងសំណេះសំណាលក្នុងពិធីនេះ លោក បណ្ឌិតប៉ែន ស៊ីម៉ន បានលើកឡើងពីប្រវត្តិ ស្ថាបត្យករដ៏ល្បីឈ្មោះដែលបានស្លាប់បាត់បង់ជីវិតនាពេលថ្មីៗនេះ គឺលោកតា វណ្ណ មុន្នីវណ្ណ ដែលជាអ្នកទទួលបាននិទ្ទេស A មុនដំបូងគេបង្អស់ ក្នុងឆ្នាំ១៩៤៩ ដោយលោកបានទទួលមរណភាពក្នុងអាយុ៩១ឆ្នាំ។ លោកបានបន្យល់នូវស្នាដៃល្បីៗជាច្រើន សម្រាប់កូនចៅជំនាន់ក្រោយ ដូចជាវិមានឯករាជ្យ ស្តាតអូឡាំពិក សាលាគរុកោសល្យ ជាដើម។ល។លោកបានបន្តថា ដោយសារវិស័យអប់រំនាពេលបច្ចុប្បន្នកំពុងមានការរីកចម្រើន លោកនឹងបន្តជ្រុញសាងសង់វិទ្យាល័យបន្ថែមទៀត សម្រាប់ឆ្លើយតបនឹងការសិក្សារបស់សិស្សានុសិស្សក្នុងខេត្តកំពត។ទន្ទឹមនឹងកិតិ្តយសដ៏ថ្លៃថ្លារបស់សិស្សដែលខិតខំរៀនសូត្រពូកែ ដូចជាពេលនេះអីចឹង គឺខេត្តកំពតមានសិស្សជាប់និទ្ទេស A ចំនួន២១នាក់ ដូច្នេះលោកសូមអួតបន្តិចហើយព្រោះខណៈនេះក្នុងស្រុកអង្គរជ័យមានសិស្សឆ្នើមទទួលជ៏យលាភី និទ្ទេស A រហូត១០នាក់ ចំណែក១១នាក់ទៀត គឺស្ថិតក្នុងក្រុងកំពត ស្រុកដងទង់ និងស្រុកបន្ទាយមាស។
លោកបណ្ឌិតប៉ែន ស៊ីម៉ន បានក្រើនរំលឹកដល់សិស្សានុសិស្សទាំងអស់ត្រូវខិតខំរៀនសូត្រឲ្យក្លាយជាសិស្សពូកែ សិស្សល្អ សិស្សគំរូ ព្រោះចំណេះវិទ្យាមានតម្លៃដ៏មហាសាល និងជាដើមទុនមួយ សម្រាប់ប្រកបអាជីវកម្មចិញ្ចឹមជីវិតទៅថ្ងៃអនាគត មានចំណេះគឺមិនចេះសាបសូន្យឡើយ មានចំណេះវិទ្យាគឺចាយមិនចេះអស់ ចោរលួចក៏មិនបាន ចាយច្រើនរិតតែរីកចម្រើនទៅមុខ។
ចំពោះសិស្សជ័យលាភីប្រឡងជាប់សញ្ញាបត្រមធ្យមសិក្សា សិស្សពូកែ និងសិស្សក្រីក្រ លោកបណ្ឌិតនឹងផ្តល់អាហារូករណ៍សម្រាប់សិក្សាបន្តនៅឯរាជធានីភ្នំពេញ។ជាមួយនេះ សិស្សជាប់និទ្ទេស A ចំនួន២១នាក់ ត្រូវបានទទួលការលើកទឹកចិត្តនូវម៉ូតូ Honda Dream C125សេរីឆ្នាំ២០១៧ ម្នាក់១គ្រឿង និងជូនថវិកាចំនួន៤០មឺុនរៀលបន្ថែមទៀង។ចំពោះសិស្សជាប់និទ្ទេស B ចំនួន ១០៣នាក់ ក្នុងម្នាក់ ក៏ត្រូវបានទទួលថវិកា២០មឺុនរៀល និទ្ទេស C ចំនួន២៦១នាក់ ក្នុងម្នាក់ៗ ទទួលបានថវិកា១៥មឺុនរៀល និទ្ទេស D ចំនួន៥២៨នាក់ ក្នុងម្នាក់ៗបានទទួលថវិកា ១០មឺុនរៀល និងសិស្សនិទ្ទេស E ចំនួន២.៥៦២នាក់ ម្នាក់ៗបានថវិកា ៥មឺុនរៀល។លោកគ្រូអ្នកគ្រូក្នុងម្នាក់ៗទទួលបានថវិកា ១០មឺុនរៀល។ដោយឡែក សាស្ត្រាចារ្យ២នាក់ដែលមានស្នាដៃឆ្នើម ក៏ត្រូវបានទទួលថវិកាម្នាក់ចំនួន២លានរៀលពីគណៈអធិបតីផងដែរ ៕
ណារិទ្ធ
