ព្រះវិហារ ៖ កាលពីព្រឹកថ្ងៃទី១៤ ខែកញ្ញា ឆ្នាំ២០១៧ ស្របនឹងពិធីបុណ្យភ្ជុំបិណ្ឌប្រពៃណីជាតិខ្មែរឈានចូលមកដល់នាពេលដ៏ខ្លីខាងមុខនេះ លោកចាន់ ចេស្តា អភិបាលខេត្តកំពត បានដឹកនាំគណៈប្រតិភូនិងសការីចុះសួរសុខទុក្ខ និងនាំថវិកាមួយចំនួន ព្រមទាំងអំណោយមកជូនកម្លាំងយោធាកងពលធំលេខ៣ ដែលកំពុងឈរជើងការពារព្រំដែនប្រចាំតំបន់ប្រាសាទព្រះវិហារ។
អំណោយដែលប្រគល់ជូននាឱកាសនេះ រួមមាន៖ អង្ករ ៤១បាវ អំបិលអុីយ៉ូដ ១០បាវ មី ៥៥កេស ទឹកត្រី ៨៦យួរ ទឹកស៊ីអុីវ ៣៩យួរ ត្រីខ ២២ឡូ ស្ករស ៥គីឡូក្រាម ទឹកបរិសុទ្ធ ១៦កេស និង៦៥យួរ ទឹកក្រូច ២៧កេស ៥លីត្រ ព្រមទាំងថវិកា ៥០លានរៀល។
ក្នុងកិច្ចសំណេះសំណាលសួរសុខទុក្ខ លោកអភិបាលខេត្តកំពតក៏សូមកោតសរសើរចំពោះវីរភាពដ៏អង់អាចក្លាហានរបស់កងកម្លាំងប្រដាប់អាវុធទាំងអស់ ពិសេសយុទ្ធជនឈរជើងនៅតំបន់ប្រាសាទព្រះវិហារដែលហ៊ានពលី ប្តូរជីវិតដើម្បីការពារទឹកដីដោយឥតស្តាយស្រណោះហើយ បើពុំមានការស្ម័គ្របូជាទាំងកម្លាំងកាយទាំងកម្លាំងចិត្តពីបងប្អូនកងទ័ពទាំងអស់ដែលកំពុងឈរជើងនៅតាមព្រំដែននេះទេ នោះសមរភូមិក្រោយក៏មិនមានឱកាសក្នុងការអភិវឌ្ឍបានរីកចម្រើនគ្រប់តំបន់ ហើយបើគ្មានកងទ័ពជាយុទ្ធជននៅសមរភូមិមុខនោះទេ ប្រជាពលរដ្ឋទូទាំងប្រទេសក៏មិនបានសុខសាន្តដូចពេលនេះដែរ ។ លោកក៏សូមជូនពរដល់កងកម្លាំងប្រដាប់អាវុធទាំងអស់មានកម្លាំងពលំមាំមួន ដើម្បីទទួលភារកិច្ចចម្បងក្នុងការ ការពារបូរណភាពទឹកដី អង្គរដ៏បវរនៃយើង ៕
