ខេត្តបន្ទាយមានជ័យ ៖ កម្លាំងជំនាញកងអាវុធហត្ថក្រុងប៉ោយប៉ែត ខេត្តបន្ទាយមានជ័យបានចាប់ឃាត់ខ្លួនស្ត្រីម្នាក់ដែលបានជេរប្រមាថ មាក់ងាយ និងចោទប្រកាន់គ្មានការពិត ទៅលើសម្តេចអគ្គមហាសេនាបតីតេជោ ហ៊ុនសែន ប្រមុខដឹកនាំរាជរដ្ឋាភិបាលកម្ពុជាយកទៅសាកសួរ កាលពីរសៀលថ្ងៃទី១៥ ខែកញ្ញា ឆ្នាំ២០១៧ នេះ។
សូមជំរាបដែរថា ៖ ស្ត្រីរូបនោះ បានប្រើគណនីហ្វេសប៊ុកឈ្មោះ«ជលស្សៃយនា នាងកូនពៅ ស៊ីអារម្មណ៍»ក្នុងការសរសេរជេរ ប្រមាថ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងបានដាក់រូបសម្តេចតេជោ ហ៊ុន សែន រួចសរសេរអក្សរនៅលើដោយប្រើពាក្យអសុរោះ ។
សេចក្តីរាយការណ៍បានឲ្យដឹងថា៖នារីដែលត្រូវបានសមត្ថកិច្ចចាប់ឃាត់ខ្លួននោះមានឈ្មោះ មឿន លីហរ័ ភេទស្រីអាយុ២០ឆ្នាំ រស់នៅភូមិចាន់គីរី សង្កាត់-ក្រុងប៉ោយប៉ែត ខេត្តបន្ទាយមានជ័យ ។
គួរបញ្ជាក់ដែរថា ៖ នាពេលកន្លងមកនេះ អាជ្ញាធរមានសមត្ថកិច្ចបានចាត់វិធានការជាបន្តបន្ទាប់ទៅលើអ្នកលេងបណ្តាញសង្គមហ្វេសប៊ុកមួយចំនួន ដែលបានជេរប្រមាថ និងគំរាមកំហែងដល់អាយុជីវិត ប្រមុខដឹកនាំរាជរដ្ឋាភិបាលកម្ពុជា និងថ្នាក់ដឹកនាំជាន់ខ្ពស់មួយចំនួន។
យោងតាមប្រសាសន៍របស់លោកអនុសេនីយ៍ឯក សរ សុភ័ត្រា មេបញ្ជាការស្ដីទីកងរាជអាវុធហត្ថក្រុងប៉ោយប៉ែត បានថ្លែងប្រាប់អ្នកសារព័ត៌មានថា ៖ ស្ត្រីខាងលើដែលត្រូវបានកម្លាំងសមត្ថកិច្ចកងរាជអាវុធក្រុងប៉ោយប៉ែតចាប់ឃាត់ខ្លួន បញ្ចូនទៅកាន់ទីបញ្ជាការកងរាជអាវុធហត្ថខេត្តបន្ទាយមានជ័យ ដើម្បីចាត់ការបន្តទៅតាមនិតិវិធីច្បាប់រួចរាល់ហើយនាល្ងាចថ្ងៃនេះ៕
