កំពត ៖ នៅព្រឹកថ្ងៃទី១២ខែសីហា ឆ្នាំ២០១៧នេះ លោកបណ្ឌិត ប៉ែន ស៊ីម៉ន ទេសរដ្ឋមន្ត្រី ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាអនុប្រធានក្រុមទី១ក្រុមការងារថ្នាក់កណ្តាល គណបក្សប្រជាជនកម្ពុជា ចុះជួយខេត្តកំពត បានធ្វើពិធីសំណេះសំណាលជាមួយសិស្សានុសិស្សថ្នាក់ទី១២ ក្នុងឆ្នាំសិក្សា២០១៦-២០១៧ នៃស្រុកបន្ទាយមាស និងស្រុកកំពង់ត្រាច។
ពិធីនេះបានប្រព្រឹត្តឡើង នៅក្នុងបរិវេណវិទ្យាល័យទូកមាស ក្នុងឃុំទូកមាសខាងលិច ស្រុកបន្ទាយមាស ខេត្តកំពត ដោយមានការអញ្ជើញចូលរួមពីសំណាក់អាជ្ញាធរគ្រប់លំដាប់ថ្នាក់ កងកំលាំងប្រដាប់អាវុធគ្រប់អង្គភាព លោកគ្រូ អ្នកគ្រូ និងសិស្សានុសិស្សដែលត្រៀមប្រឡងយកសញ្ញាបត្រទុតិយភូមិ(បាក់ឌុប)ចូលរួមចំនួន១១៣៦នាក់ផងដែរ។
ក្នុងឱកាសសំណេះសំណាលនេះ លោកបណ្ឌិត ប៉ែន ស៊ីម៉ន បានពាំនាំនូវពាក្យពេជន៍ដ៏ល្អៗ សម្រាប់ឲ្យសិស្សយកទៅសិក្សា អនុវត្តន៍ប្រកបដោយការយល់ដឹងខ្ពស់ ពិសេសសិស្សត្រៀមប្រឡងសញ្ញាបត្រទុតិយភូមិ(បាក់ឌុប)ដែលនឹងឈានចូលមកដល់នៅថ្ងៃទី២១ខែសីហា ឆ្នាំ២០១៧ខាងមុខ។ លោក បណ្ឌិតក៏បានក្រើនរំលឹក ដល់ក្មួយៗសិស្សានុសិស្សទាំងអស់ឲ្យខិតខំប្រឹងប្រែងរៀនសូត្រក្រេបយកចំណេះវិជ្ជានិងស្តាប់ពាក្យប្រៀនប្រដៅរបស់លោកគ្រូ អ្នកគ្រូ ដើម្បីឲ្យក្លាយជាសិស្សល្អ សិស្សគម្រូ សិស្សឆ្នើម ព្រោះក្នុងថ្ងៃអនាគត វាសនាប្រទេសជាតិត្រូវពឺងផ្អែកទាំងស្រុង លើស្រទាប់យុវជនដែលជាទំពាំងស្នងឫស្សីនេះហើយ។លោកបណ្ឌិត បានគូសបញ្ជាក់ដោយសន្យាថា នឹងផ្តួចផ្តើមទំនុកបំរុងដល់សិស្សប្រឡង បាក់ឌុបដែលជាប់ចំណាត់ថ្នាក់(និទ្ទេសA)ដោយបានត្រៀមរង្វាន់រួចជាស្រេច សម្រាប់ជាការលើកទឹកចិត្ត។ដូច្នេះសូមក្មួយៗខិតខំប្រជែងយកជ័យជំនះឲ្យបានគ្រប់ៗគ្នា ដើម្បីលើកកិត្តិយសខេត្តកំពតយើង។
បន្ទាប់ពីសំណេះសំណាល លោកបណ្ឌិត ប៉ែន ស៊ីម៉ន ក៏បានឧបត្ថម្ភថវិកាដល់លោកគ្រូ អ្នកគ្រូ ក្នុងស្រុកបន្ទាយមាស និងស្រុកកំពង់ត្រាច ចំនួន៦៣នាក់ ដោយក្នុងម្នាក់ៗទទួលបានចវិកា ១០០.០០០រៀល។ដោយឡែកសិស្សានុសិស្សចំនួន ១១៣៦នាក់ ក៏ត្រូវបានទទួលនូវថវិកាម្នាក់ៗចំនួន ៥០.០០០រៀលផងដែរ។/ ណារិទ្ធ
