ខេត្តប៉ៃលិន ៖ កាលពីព្រឹកថ្ងៃទី៩ ខែកុម្ភៈ ឆ្នាំ២០១៥ នៅភូមិក្បាលឡាន ឃុំស្រុកសាលាក្រៅ ខេត្តប៉ៃលិន ប្រធានកសិកម្មខេត្តពន្យល់ ឲ្យកសិករប្រើប្រាស់ពូជដំឡូងមី ៨៩ (ភាសារថៃប៉ែតកៅ) ដែលទទួលបានទិន្នផលខ្ពស់ជាងប្រភេទដំឡូងផ្សេងទៀត និងព្យាយាមជួយរកទីផ្សារអោយតំលៃកសិផលទទួលបានប្រាក់ចំណូលខ្ពស់ ។
លោក អ៊ុក ទូច ជាម្ចាស់ចំការដំឡូងមី៨៩ និងជាអ្នកកាសែតកម្ពុជាអភិវឌ្ឍន៍ បានអោយដឹងថា ពូជដំឡូងមីមានច្រើនប្រភេទដូចជា ៖ ហ៊ុយប៊ុង ប៉ែតមួយ ត្រយ៉ង៩០ ត្រយ៉ង៧០ ក្សេតសាស្ត្រ ក្សេតនី ។ល។ ហើយពូជដំឡូងនេះ ពីមុនខ្ញុំធ្លាប់ដាំសង់រងកំពស់០,៥ម៉ែត្រ មានគំលាតរង១,២ ម៉ែត្ររីឯគំលាតដាំដើមពូជ ០,៥ ម៉ែត្រ ក្នុង១ហិកតា ទទួលបានផល ២៥ ទៅ ៣០ តោន ទទួលផលលក់បានកំរ៉ៃមិនគ្រប់ថ្លៃកម្មករទេ ។ នៅឆ្នាំ២០១៣ ខ្ញុំបានទិញដំឡូងមី៨៩ (ភាសារថៃប៉ែតកៅ) ពូជ ១ ដើម ១០ បាត និង១បាច់ ស្មើ១០ដើម មានតម្លៃ១០០បាត ដាំសាកល្បង១រ៉ៃ(១៦០០ម៉ែត្រការេ) ទទួលបានផល១៧តោន ។ ក្រោយពីដាំចាប់ពី៦ខែឡើងទៅ អាចកាប់គាស់បាន ដោយអ្នកខ្លះ ៦ ខែ គាស់យកផល អ្នកខ្លះ ៨ ខែគាស់យកផល អ្នកខ្លះ៩ខែគាស់យកផល ។ ដោយឃើញទិន្នផលបានខ្ពស់ ខ្ញុំបានផ្លាស់ប្តូរយកពូជដំឡូងមី៨៩មកដាំវិញ ទទួលបានទិន្នផល១ហិកតា ពី៥០តោនទៅ៦០តោន ដោយចំណាយដាំដុះ និងជួលដី១ហិកតាអស់ប្រាក់ប្រហែល១០០០ដុល្លា ពេលទទួលផលវិ ញប្រហែល២៥០០ដុល្លា ។ ពូជដំឡូងមី៨៩ មានលក់នៅខេត្តប៉ៃលិន ប៉ុន្តែមិនច្រើន តម្លៃ១បាច់ស្មើ២០ដើមស្មើ១០០បាត ថោកជាងទិញមកពីប្រទេសថៃ ។
អ្នកស្រី រស់ ខេម អាយុ៣៦ឆ្នាំ រស់នៅភូមិដីក្រហម សង្កាត់អូរតាវ៉ៅ ក្រុងប៉ៃលិន បានអោយដឹងថា នាងខ្ញុំបានដាំពូជដំឡូងមី ៨៩ ក្នុងដីខ្លួនឯង មិនជួលគេ មិនលើករងដាំចន្លោះដើមតាង៉ែន ត្រឹមដី១ហិកតាចំណាយដើម ៧០០ ដុល្លា ហើយទទួលផលដំឡូង ១ ហិកតាបាន ៦០ តោន ។
លោក ខៀវ អ៊ួ អាយុ៦២ឆ្នាំ រស់នៅភូមិដីក្រហម បានអោយដឹងថា គាត់បានដាំដំឡូងមី៨៩ ក្នុងដី២ហិកតាកន្លះ ទទួលបានផល១៣០តោន ច្រើនជាងដាំពូជដំឡូងផ្សេង ហើយចំណាយប្រាក់តិច ។
លោក ប៉ុល សុន ប្រធានការិយាល័យផ្សព្វផ្សាយ និងអភិវឌ្ឍន៍សហគមន៍បានអោយដឹងថា ការដាំដុះពូជដំឡូងមី ៨៩ គឺឃើញថា ទទួលផលបានខ្ពស់ក្នុង១ហិកតា កន្លែងដីអន់បានផល៥៥ទៅ៦០តោន ហើយកន្លែងដីល្អ១ហិកតា ទទួលបានផលពី៦០តោន ទៅ៧០តោន ប៉ុន្តែកសិករមួយចំនួន មិនទាន់ដាំបានតាមស្តង់ដា ដូចជាការដាំគំលាត១ម៉ែត្រ ១ គុម្ព ពួកគាត់ដាំ០,៨ម៉ែត្រ ឬ០,៥ម៉ែត្រ ដែលបណ្តាលអោយការទទួលផលបានតិច ។
លោក សាយ សុផាត ប្រធានមន្ទីរកសិកម្មកខេត្តប៉ៃលិន បានអោយដឹងថា ពូជដំឡូងមី ៨៩ មានដើមដូចដំឡូងមីដ៏ទៃទៀត ប៉ុន្តែវាមានថ្នាំងញឹកនិងភ្នែកវែង បន្ទាប់ពីប្រជាកសិករមួយចំនួនបានដាំសាកល្បងរួច ទទួលបានផលខ្ពស់ ជាងដំឡូងផ្សេងនោះ ដូច្នេះកសិករដ៏ទៃទៀត គួរតែចាប់អារម្មណ៍មកដាំដុះពូជដំឡូងមី៨៩វិញ ព្រោះចំណាយដើមទិញទទួលបានកំរ៉ៃច្រើន ។ ចំពោះតំលៃទីផ្សារដំឡូងមីស្រស់ពីមុន ១ គីឡូក្រាមលក់បាន២,២បាតប្រាក់ថៃ ឥឡូវធ្លាក់ចុះនៅ១,៨បាត ។ ចំណែកដំឡូងមីក្រាម មុន១គីឡូក្រាមលក់បាន ៥,៥បាត ប្រាក់ថៃឥឡូវធ្លាក់ចុះនៅ៤,៨បាត ។ រូបលោកក៏ដូចជាក្រសួង បានខិតខំយកចិត្តទុកដាក់ទំនាក់ទំនងប្រទេសជិតខាង ដើម្បីរកតំលៃហាងឆេង អោយបានខ្ពស់ជូនប្រជាកសិករ ៕
គឹមសុខជា
