នៅវេលាម៉ោង ២ៈ៣០នាទីរសៀលថ្ងៃទី ១៨ ខែតុលា ឆ្នាំ២០១៦ នៅសាលាស្រុកកំពង់ត្រាច បានរៀបចំពិធី ប្រកាសចូលកាន់មុខតំណែងអភិបាលរងស្រុកកំពង់ត្រាច ក្រោមអធិបតីភាពដ៏ខ្ពង់ខ្ពស់របស់ ឯកឧត្តម សឹម សុទ្ធា អភិបាល រងខេត្តកំពត ក្នុងឱកាសនោះក៏មានវត្តមានចូលរួមពីឯកឧត្តម លោកជំទាវ លោក-លោកស្រី ជាមន្ត្រីរាជការក្នុងស្រុក ឃុំ និងលោកគ្រូអ្នកគ្រូ អធិការ អធិការរង មេបញ្ជាការ មេបញ្ជាការរង កងរាជអាវុធហត្ថស្រុក សរុបទាំងអស់ចំនួន ៣០០នាក់ ចូលរួមនៅក្នុងពិធីនេះដែរ លោក ណុប ចាន់ណារិទ្ធិ នាយកទីចាត់ការគ្រប់គ្រងធនធានមនុស្ស ខេត្តកំពត បានលើកឡើងអាន របាយការណ៍នៅខ្លឹមសារនៃព្រះរាជក្រឹត្យ ដែលឡាយព្រះហស្ថដោយព្រះមហាក្សត្រ ប្រកាសតែងតាំងលោក ឃឹម សាមី អនុប្រធានអង្គភាពលទ្ធកម្មស្រុកកំពង់ត្រាច ឱ្យចូលកាន់តំណែងជាអភិបាលរងនៃគណៈអភិបាលស្រុកកំពង់ត្រាច ។
លោក ឃឹម សាមី អភិបាលរងដែលទើបតែងតាំងចូលកាន់មុខតំណែងថ្មី ក៏បានមានប្រសាសន៍ឡើងថា គាត់នឹងខិត្តខំ ប្តេជ្ញាចិត្តគោរពនៅរដ្ឋធម្មនុញ្ញច្បាប់ព្រះរាជក្រឹត្យ អនុក្រឹត្យ និងលិខិតបទដ្ឋាននានា ដែលកំពុងនៅជាធរមាន ។
លោកបានបន្ថែមទៀតថា លោកបានប្តេជ្ញាចិត្តអនុវត្តតាមកម្មវិធីនយោបាយ និងយុទ្ធសាស្ត្រចតុកោណរបស់រាជរដ្ឋា ភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំដ៏ខ្ពង់ខ្ពស់ នៃព្រះរាជាណាចក្រកម្ពុជា យើងសម្របសម្រួលដឹកនាំការងាររបស់មន្ទីរ អង្គភាពនានាជុំវិញស្រុក ។
ដើម្បីលើកកម្ពស់ប្រសិទ្ធភាពការងារ ហើយនឹងខំប្រឹងប្រែងអស់ពីកម្លាំងកាយចិត្ត និងប្តេជ្ញាខំថែរក្សាសមិទ្ធផលរបស់ ជាតិ ដែលមានស្រាប់ក៏ជាការដឹកនាំគ្រប់គ្រងសភាពការណ៍ឱ្យល្អប្រសើរ ហើយឱ្យមានសន្តិសុខសណ្តាប់ធ្នាប់ល្អ់រួមចំណែកថែ រក្សាការពារបូរណភាពទឹកដី ។ បន្ទាប់មក ឯកឧត្តម គណៈអធិបតី បានមានប្រសាសន៍ទៅអង្គពិធីទាំងមូលថា ជុំវិញសភាព ការណ៍ក្នុងប្រទេសមានភាពស្ងប់ស្ងាត់ល្អប្រសើរ ទទួលបាននូវសន្តិភាពយ៉ាងពេញលេញ ក្រោមការដឹកនាំដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន ដែលជានាយករដ្ឋមន្ត្រី នៃព្រះរាជាណាចក្រកម្ពុជា មិនត្រឹមតែប៉ុណ្ណោះមានការ អភិវឌ្ឍន៍យ៉ាងឆាប់រហ័សពីមួយឆ្នាំទៅមួយឆ្នាំ គួរឱ្យកត់សម្គាល់ ។ ហើយសមិទ្ធផលទាំងឡាយផុសដូចផ្សិត ច្រើនឥតគណនា ដូចជា សាលារៀន ផ្លូវថ្នល់ វត្តអារាម មន្ទីរពេទ្យ ទំនប់ប្រឡាយ ស្ពានជាដើម ប្រជាពលរដ្ឋមានជីវភាពធូរធា ។
នៅទីបញ្ចប់ ឯកឧត្តម ក៏បានផ្តាំផ្ញើដល់មន្ត្រីមូលដ្ឋានស្រុក ឃុំ ភូមិ កងរាជអាវុធហត្ថ កងកម្លាំងនគរបាលជាតិ ឱ្យផ្សារភ្ជាប់ជាមួយប្រជាពលរដ្ឋរាល់តម្រូវការផ្សេងៗ ដែលគាត់ត្រូវការមិនថា មមាញឹកឬយ៉ាងណាឡើយ ៕
