កាលពីថ្ងៃទី ១៩ ខែតុលា ឆ្នាំ២០១៦ ឯកឧត្តម អ៊ុន ចាន់ដា អភិបាលខេត្តព្រះវិហារ និងលោកប្រធានមន្ទីរសាធារណ ការ និងដឹកជញ្ជូនខេត្តព្រះវិហារ លោក សំ លាងទ្រី បានជម្រុញឱ្យក្រុមការងារ ស្ថាបនាពង្រីកផ្លូវ ពន្លឿនសកម្មភាព ហើយ រាល់ការងារជួសជុលផ្លូវ ត្រូវយកចិត្តទុកដាក់អំពីគុណភាពតាមបទដ្ឋានបច្ចេកទេសធ្វើផ្លូវ និងលូ ឱ្យពង្រីកប្រព័ន្ធហេដ្ឋារចនា សម្ព័ន្ធនៅទូទាំងខេត្ត ដើម្បីជួយសម្រួលដល់ការធ្វើដំណើររបស់ប្រជាពលរដ្ឋឱ្យកាន់តែល្អប្រសើរឡើង ។
ឯកឧត្តម អ៊ុន ចាន់ដា អភិបាលនៃគណៈអភិបាលខេត្តព្រះវិហារ បានថ្លែងទៅកាន់ក្រុមការងារបច្ចេកទេសរបស់មន្ទីរ សាធារណការ និងដឹកជញ្ជូនខេត្ត ដោយស្នើឱ្យក្រុមការងារស្ថាបនាពង្រីកផ្លូវនេះ ពន្លឿនសកម្មភាពជួសជុលយកចិត្តទុកដាក់ អំពីគុណភាពនៃការជួសជុលដោយផ្អែកទៅតាមបទដ្ឋានបច្ចេកទេស ការកេងចំណេញ ឬកាត់បន្ថយកម្រិតស្តង់ដានោះឡើយ ។
លោក សំ លាងទ្រី បានបន្តថា មន្ទីរសាធារណការ និងដឹកជញ្ជូនខេត្ត ពេលនេះកំពុងស្ថាបនាពង្រីកផ្លូវទាំងសងខាង ដែលមានទទឹងម្ខាងៗ ៤,៥ម៉ែត្រ ដោយក្រាលកៅស៊ូ DBST ប្រវែង ២១៧០ម៉ែត្រ និងដាក់លូរំដោះទឹកភ្លៀងតាមបណ្តោយ ផ្លូវប្រវែងសរុប ១៣៨០ម៉ែត្រ ក្នុងនោះលូមុខ ១ម៉ែត្រ មានប្រវែង ៩៦០ម៉ែត្រ នឹងលូមុខ ៨តឹក មានប្រវែង ៤២០ម៉ែត្រ កំពុងដំណើរការស្ថាបនានៅក្នុងសង្កាត់កំពង់ប្រណាក ក្រុងព្រះវិហារ ខេត្តព្រះវិហារ ។
លោកប្រធានមន្ទីរបានថ្លែងទៅកាន់ថ្នាក់ដឹកនាំខេត្តថា សម្រាប់ការងារថែទាំប្រចាំឆ្នាំ២០១៦ មន្ទីរបានផ្តល់អាទិភាព សម្រាប់ការងារតម្លើងស្លាកសញ្ញាចរាចរណ៍ថ្មី បង្គោលសុវត្ថិភាព បង្គោលគីឡូម៉ែត្រ រនាំងដែកការពារសុវត្ថិភាព និងការថែ ទាំសម្អាតចិញ្ចើមផ្លូវនៅតាមផ្លូវជាតិផ្លូវខេត្ត និងក្រាលកៅស៊ូសំខាន់ៗមួយចំនួនទៀត ។ លោកបន្តថា ផ្លូវទាំងនោះរួមមានផ្លូវ ជាតិលេខ ៦២ ផ្លូវ ជាតិលេខ ៦៤ ជាតិលេខ៩៥ និងផ្លូវខេត្តលេខ ២៦២៦ ។
នៅក្នុងឆ្នាំ២០១៧ ខាងមុខនេះ មន្ទីរមានផែនការផ្តល់អាទិភាពសំខាន់ទៅលើការងារគូសគំនូសចរាចរណ៍ តាមផ្លូវ ជាតិ និងផ្លូវខេត្ត ដែលក្រាលកៅស៊ូក៏ដូចជា ផ្លូវខេត្តលេខ ២៦២៨ ផ្លូវខេត្ត 2PVH2 ថែទាំនិងជួសជុលសម្បុកមាន់ធ្វើឱ្យ ប្រសើរឡ៉ើង និងផ្លូវសំខាន់ៗមួយចំនួននៅក្នុងខេត្ត ។
ឯកឧត្តមអភិបាលខេត្ត ក៏បានសម្តែងនូវការអរគុណដល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលសម្តេចតែងតែយកចិត្តទុកដាក់ដល់ប្រជាពលរដ្ឋក្នុងខេត្តព្រះវិហារ និងបានផ្តល់ថវិកាសម្រាប់ ការស្ថាបនាផ្លូវនេះ តាមរយៈឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនខេត្តនោះផង ទៀត ៕
