កំពត ៖ កាលពីព្រឹកថ្ងៃទី២២ ខែមីនា ឆ្នាំ២០១៦នេះ សម្តេចក្រឡាហោម ស ខេង នាយករដ្ឋមន្ត្រីស្តីទី អញ្ជើញចូលរួមជាអធិបតីដ៏ខ្ពង់ខ្ពស់ប្រកាសផ្ទេរភារកិច្ច និងតែងតាំងមុខតំណែងអភិបាលនៃគណៈអភិបាលខេត្តកំពត។
សម្តេចក្រឡាហោម ស ខេង នាយករដ្ឋមន្ត្រីស្តីទីបានថ្លែងថា អភិបាលខេត្ត គឺមានតួនាទីដ៏សំខាន់បំផុតសម្រាប់ តំណាងឱ្យរាជរដ្ឋាភិបាល និងតំណាងឱ្យស្ថាប័នថ្នាក់ក្រោមជាតិទាំងមូល ដែលត្រូវដោះស្រាយចំពោះមុខ។
លោក ចាន់ ចេស្តា ត្រូវបានសម្តេចព្រះករុណាព្រះបាទនរោត្តមសីហមុនី ព្រះមហាក្សត្រ នៃព្រះរាជាណាចក្រកម្ពុជា ឡាយព្រះហស្តលេខាដោយត្រាស់បង្គាប់តែងតាំងជាអភិបាល នៃគណៈអភិបាលខេត្តកំពត ជំនួសឯកឧត្តម ខូយ ឃុនហ៊ួរ ដែលត្រូវទៅបំពេញការងារថ្មីនៅទីស្តីការក្រសួងមហាផ្ទៃ តាមការក្រាបបង្គំទូលថ្វាយរបស់សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រី ។
ឯកឧត្តម ខូយ ឃុនហ៊ួរ អភិបាលខេត្តចាស់បានថ្លែងថា ភ្ញៀវកិត្តិយសដែលបានចូលរួម នាថ្ងៃនេះ អំពីសមិទ្ធផលនានា នៅក្នុងទឹកដីខេត្តកំពត ក្នុងអាណត្តិដែលឯកឧត្តមដឹកនាំ ដែលទទួលបាននូវសន្តិសុខសុវត្ថិភាព ជូនប្រជាពលរដ្ឋទូទាំងខេត្ត ទាំងមូល។
បន្ទាប់ពីការអានរបាយការណ៍របស់ឯកឧត្តមអភិបាលខេត្តចាស់រួចហើយ លោក ចាន់ ចេស្តា ដែលឡើងកាន់តំណែងជា អភិបាលខេត្តកំពតថ្មី បានឡើងប្តេជ្ញាចិត្តចំនួន ៩ចំណុច ចំពោះមុខសម្តេចក្រឡាហោម ស ខេង នាយករដ្ឋមន្ត្រីស្តីទី និងគណៈអធិបតី ព្រមទាំងមន្ត្រីរាជការ កងកម្លាំងប្រដាប់អាវុធទាំងបីប្រភេទទូទាំងខេត្តកំពត។
ជាចុងក្រោយ សម្តេចក្រឡាហោម ស ខេង នាយករដ្ឋមន្ត្រីស្តីទីបានផ្តាំផ្ញើដល់អភិបាលខេត្តដែលទើបតែងតាំងថ្មី ត្រូវយកចិត្តទុកដាក់បំពេញការងារថ្មីនេះឱ្យបានល្អប្រសើរ ៕
