ព្រះសីហនុ ៖ ពិធីប្រកាសផ្ទេរមុខតំណែងនេះបានធ្វើឡើងនៅព្រឹកថ្ងៃទី២៣ ខែមីនា ឆ្នាំ២០១៦នៅ សាលប្រជុំសាលា ខេត្តព្រះសីហនុ ក្រោមអធិបតីភាព ឯកឧត្តម អ៊ឹម ឈុនលឹម ទេសរដ្ឋមន្ត្រី និងជា រដ្ឋមន្ត្រីក្រសួងរៀបចំដែនដី នគរូបនីយកម្ម សំណង់ និងសុរិយោដី និង ឯកឧត្តម យន្ត មីន អភិបាលនៃគណៈអភិបាលខេត្តព្រះសីហនុ ព្រមទាំងមន្ត្រីរាជការមកពី អង្គភាព.មន្ទីរ និងស្ថាប័នពាក់ព័ន្ធក្នុងខេត្តជាច្រើននាក់ផ្សេងទៀត។
នៅក្នុងពិធីនេះដែរលោកនួន ប៉ុន ប្រធានមន្ទីររៀបចំដែនដីនគរូបនីយកម្មសំណង់ និងសុរិយោដីថ្មី ដែលទើបបានតែងតាំង បានថ្លែងអំណរគុណចំពោះថ្នាក់ដឹកនាំខេត្តព្រះសីហនុ ក៏ដូចជាក្រសួង ដែលផ្តល់ការទុកចិត្ត និងមានការជឿចំពោះរូបលោក។ លោកនួន ប៉ុក អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តព្រះសីហនុ ត្រូវបានប្រកាសតែងតាំង មុខតំណែង ជាប្រធានមន្ទីររៀបចំដែនដី នគរូបនីយកម្ម សំណង់និងសុរិយោដីខេត្តព្រះសីហនុ ជំនួសលោក ហ៊ុន ភី ប្រធានមន្ទីរចាស់ ដែលត្រូវដល់អាយុចូលនិវត្តន៍។
ដោយឡែក លោកប្រធានមន្ទីរបានមានប្រសាសន៍ទៀតថា ចាប់ពីពេលនេះតទៅលោកនឹងខិតខំបំពេញការងារ និងភារកិច្ចជាបន្តទៀតគឺធ្វើយ៉ាងណាជំរុញឱ្យការងារ និងជំនាញពាក់ព័ន្ធទាំងអស់នៅក្នុងមន្ទីរដំណើរការបានយ៉ាងរលូន ជាពិសេសគឺធ្វើការសហការ និងសាមគ្គីភាពជាមួយមន្ត្រីក្រោមឱវាទ និងអង្គភាពមន្ទីរពាក់ព័ន្ធក្នុងខេត្តព្រះសីហនុ ឱ្យបានកាន់តែប្រសើរថែមទៀត។
នៅក្នុងឱកាសនោះដែរ ឯកឧត្តម អ៊ឹម ឈុនលឹម ទេសរដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្មសំណង់ និងសុរិយោដីបានថ្លែងមានប្រសាសន៍កោតសរសើរចំពោះមន្ត្រី មន្ទីរសុរិយដីខេត្តព្រះសីហនុទាំងអស់ ដែលបានខិតខំបំពេញតួនាទី និងភារកិច្ចកន្លងមកជូនប្រជាពលរដ្ឋបានយ៉ាងល្អប្រសើរ។
ឯកឧត្តម រដ្ឋមន្ត្រីបានមានប្រសាសន៍ដោយសង្កត់ធ្ងន់ថា បើទោះបីជាកន្លងមកការចុះបញ្ជីដីធ្លីនិងក្បាលដីជូនប្រជាពលរដ្ឋ នៅមានការឆកល្វែង ឬក៏បញ្ហាខ្លះៗមែនប៉ុន្តែនេះជារឿងអតីតកាល និងត្រូវធ្វើការដោះស្រាយ ហើយអ្វីដែលសំខាន់ចំពោះនៅពេលនេះលោកសូមសំណូមពរដល់ប្រធានមន្ទីរថ្មី និងអស់លោកជាមន្ត្រីជំនាញពាក់ព័ន្ធ ទាំងអស់ត្រូវធ្វើការសហការគ្នាឱ្យបានល្អប្រយោជន៍បង្កើនគុណភាពការងារជូនប្រជាពលរដ្ឋ និងប្រទេសជាតិយើងទាំងមូល។
នៅក្នុងពិធីនេះដែរ លោកយន្ត មីន អភិបាលខេត្តព្រះសីហនុ បានលើកឡើងអំពីចំណុចវិជ្ជមាន និងចំណុចអវិជ្ជមានរបស់មន្ទីរសុរិយោដីមួយ ព្រមទាំងបានផ្តាំផ្ញើទៅកាន់លោកប្រធានថ្មីឱ្យយកចិត្តទុកដាក់ បំពេញការងារឱ្យបានសកម្ម សុក្រឹត្យជាបន្តទៀត និងបន្តធ្វើការ និងដោះស្រាយបញ្ហា ដែលនៅសេសសល់ពីប្រធានចាស់ផងដែរ ៕
