កណ្តាល ៖ នៅថ្ងៃទី០៦ ខែមីនា ឆ្នាំ២០២០ លោក ថន សុវណ្ណា អភិបាល នៃគណៈអភិបាល ស្រុកពញ្ញាឮ និងលោកស្រីជាភរិយា និងលោកស្រីជំទាវ សេងវណ្ណសាយរដ្ឋលេខាធិការក្រសួងធនធានទឹកនិងឧតុនិយម បានអញ្ជើញជាអធិបតីភាពក្នុងពិធីអបអរសាទរខួបលើកទី១០៩ ទិវាអន្តរជាតិនារី ៨មីនា ឆ្នាំ២០២០ ក្រោមប្រធានបទ «មានសន្តិភាព មានការលើកកម្ពស់សមភាពយេនឌ័រ» ដោយមានការអញ្ជើញចូលរួមពីសំណាក់សមានារីៗ លោកស្រី មេឃុំ ស្មៀនជំទប់ មេភូមិ អនុភូមិ និងអ្នកពាក់ព័ន្ធសរុបចំនួន ២១៦ នាក់។
នៅក្នុងឱកាសនោះ លោកស្រី ហង្ស ចន្ថា ប្រធានអនុសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ បានអានព្រះរាជសារសម្តេចព្រះមហាក្សត្រី នរោត្តម មុនីនាថ សីហនុ ព្រះវរាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ក្រោមប្រធានបទ «មានសន្តិភាព មានការលើកកម្ពស់សមភាពយេនឌ័រ» ជូនដល់អង្គពិធី។
លោកជំទាវ សេង វណ្ណសាយ រដ្ឋលេខាធិការក្រសួងធនធានទឹកនិងឧតុនិយមបានលើកឡើង សំណេះសំណាល ក្នុងឱកាស ប្រារព្ធទិវាអន្តរជាតិនារី ៨មីនា នេះថាជារៀងរាល់ឆ្នាំ រដ្ឋបាលស្រុកពញាឮ តែងតែប្រារព្ធពិធីខួប៨មីនាជារាងរាល់ឆ្នាំដើម្បីអបអរសាទរខួបលើកទី១០៩ ទិវាអន្តរជាតិនារី ៨មីនា មានគោលបំណង រំលឹកដល់សេចក្តីក្លាហាន និងការខិតខំតស៊ូរបស់បុព្វបុរសជាស្ត្រីទូទាំងសកលលោក ដើម្បីសិទ្ធិសិរីភាព និងតួនាទី ស្មើគ្នារវាងបុរស និងស្ត្រីនៅក្នុងសង្គម ។
សំខាន់ជាងនេះទៀត ទិវានេះផ្តល់ឱកាសឲ្យយើងទាំងអស់គ្នានាសម័យបច្ចុប្បន្ន អាចឆ្លុះបញ្ចាំង និងអបអរសាទរ ចំពោះសមិទ្ធផលទាំងឡាយដែលសម្រេចបានក្នុងការលើកកម្ពស់ ការចូលរួមរបស់ស្ត្រីនៅគ្រប់ទិដ្ឋភាពទាំងអស់នៃសង្គម រួមមាន សេដ្ឋកិច្ច សង្គមកិច្ច វប្បធម៌ និងនយោបាយ។
នៅក្នុងឱកាសនោះដែរ ឯកឧត្តមបានបញ្ជាក់ថា ក្នុងនាមខ្ញុំ សូមគាំទ្រលើប្រធានបទ «មានសន្តិភាព មានការលើកកម្ពស់សមភាពយេនឌ័រ» បានរំលេចពីតម្លៃសុខសន្តិភាព និងអរគុណសន្តិភាព ដែលរាជរដ្ឋាភិបាលកម្ពុជា បាននឹងកំពុងថែរក្សាសន្តិភាពឲ្យនៅគង់វង្សយូរអង្វែងឆ្ពោះទៅមុខទៀត។
លើសពីនេះទៀត ក្រោមការដឹកនាំប្រកបដោយកិត្តិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ប្រទេសកម្ពុជាបានពង្រឹងកិច្ចសហប្រតិបត្តិការថែរក្សាសុខសន្តិភាព និងស្ថិរភាពនៅលើពិភពលោក និងកិច្ចសហប្រតិបត្តិការជាមួយបណ្តាប្រទេសជិតខាង ជាប់ព្រំដែន កសាងតំបន់ព្រំដែន ជាតំបន់សន្តិភាព មិត្តភាព សហប្រតិបត្តិការ និងអភិវឌ្ឍន៍។
លោក ថន វណ្ណា អភិបាលស្រុកងាឮបានបញ្ជាក់ប្រាប់ អ្នកសារព័ត៍មានថា រាជរដ្ឋាភិបាលកម្ពុជា បាននិងកំពុងយកចិត្តទុកដាក់ លើកកម្ពស់ស្ត្រីក្នុងនោះ បានដាក់បញ្ចូលស្ត្រីទៅបម្រើការងារនៅតាមស្ថាប័ន មន្ទីរ ក្រសួង និងអាជ្ញាធរមូលដ្ឋាន គ្រប់លំដាប់ថ្នាក់ ក៏ដូចក្នុងជួរ កងកម្លាំងប្រដាប់អាវុធផងដែរ ដើម្បីចូលរួមចំណែក អភិវឌ្ឍន៍ ប្រទេសជាតិ ពោលគឺស្ត្រីអាចបំពេញការងារបានគ្រប់បែបយ៉ាងដូចបុរស និងមានភាពអត់ធ្មត់ជាងបុរស។
ក្នុងឱកាសនោះ លោកជំទាវ សេង វណ្ណសាយ រដ្ឋលេខាធិការដ្ឋានសួងធនធានទឹកនឹងអុតុនិយម ក៏បានជូនប្រាក់១០០០០០រៀល(ដប់មឺនរៀល) និងថ្នាំពេទ្យព្យាបាលក្រពះមួយដបដល់បងប្អូនជានារី ដែលបានចូលរួមខួបលើកទី១០៩ ទិវាអន្តរជាតិនារី ០៨ មីនា ឆ្នាំ២០២០នេះ ដោយក្តីសប្បាយរីករាយ៕
ដោយ ហុក វិបុល
