ខេត្តប៉ៃលិន៖ បច្ចុប្បន្ននេះប្រជាកសិករខេត្តប៉ៃលិនដែលមានចំការមៀនប៉ៃលិន កំពុងតែមានការខកចិត្ត និងមានការព្រួយបារម្មណ៍ចំពោះតម្លៃផ្លែមៀនប៉ៃលិន ដែលនៅតែមានតម្លៃថោក ហើយមិនសូវមានឈ្មួញចូលទិញទៀតផង។
ក្នុងឆ្នាំ២០១៦នេះ មានបងប្អូនប្រជាកសិករខ្លះគាត់បានប្រមូលផលរួចហើយ អ្នកខ្លះកំពុងប្រមូលផល ហើយក៏មានអ្នកខ្លះទៀត មិនទាន់បានប្រមូលផលដែរ អាស្រ័យលើការបញ្ជាអោយចេញផ្លែរបស់ប្រជាកសិករយើង។ មកដល់ពេលនេះ មៀនប៉ៃលិនមានតម្លៃចន្លោះពី១៥០០រៀល ទៅដល់ ២៥០០រៀល អាស្រ័យលើគុណភាពផ្លែមៀនរបស់ប្រជាកសិករយើង ត្រូវតាមស្តង់ដាទីផ្សារ ។
លោក ផៃ ផេង ប្រជាកសិកររស់នៅភូមិអូតាប្រាង សង្កាត់ប៉ៃលិនក្រុងប៉ៃលិនបានមានប្រសាសន៍ថា ដំណាំមៀនប៉ៃលិននេះ គេអាចបញ្ជាអោយវាចេញផ្លែនៅរដូវណាក៏បានដែរ អាស្រ័យលើតម្រូវការទីផ្សារ តែវាក៏ត្រូវការចំណាយដើមទុនខ្ពស់ ត្រូវការអោយមានទឹក ជាប្រចាំ ត្រូវការតែងដើម ដាក់ជីបំប៉ន និងត្រូវការមើលថែរក្សាដោយយកចិត្តទុកដាក់បំផុតដូច្នេះ ចំពោះតម្លៃផ្លែមៀនត្រឹមតែ ២០០០ ឬ ២៥០០រៀល មិនចំណេញទេ។
លោកពូ ណាក់ ប្រជាកសិករដាំមៀនប៉ៃលិននៅភូមិ ដីក្រហម សង្កាត់អូតាវ៉ៅ ក្រុងប៉ៃលិន ខេត្តប៉ៃលិន ដែលផ្លែមៀនរបស់គាត់មានទំហំធំ ល្អ ត្រូវស្តង់ដាកំណត់ ដូច្នេះផ្លែមៀនរបស់គាត់ត្រូវបានក្រុមហ៊ុន ពេជ្រសំណាង ប្រមូលទិញក្នុងតម្លៃ ៤០បាត ដែលជាតម្លៃមួយខ្ពស់បន្តិច សំរាប់ផ្លែមៀនប៉ៃលិននៅ ក្នុងឆ្នាំនេះ។
លោក ស៊ឹម សុជាតិ តំណាងក្រុមហ៊ុន ពេជ្រ សំណាងបានអោយដឹងថា នៅក្នុងឆ្នាំនេះ ប្រទេសចិន មានតម្រូវការផ្លែមៀនតិច ហើយគេទិញតែផ្លែមៀនណាដែលល្អ ធំៗ ត្រូវស្តង់ដារបស់គេប៉ុណ្ណោះ ចំណែកផ្លែណាដែលមិនសូវល្អ គឺតម្លៃចុះទៅតាមនោះដែរ។ លោកបានសំណូមពរសូមអោយប្រជាកសិករត្រូវយកចិត្តទុកដាក់ សំរិតសំរាំងផ្លែមៀនរបស់ខ្លួនអោយបានល្អ ផ្លែធំ ទោះបីបានចំនួនផ្លែតិច តែយើងមានទីផ្សារសំរាប់លក់មៀនរបស់យើងបានស្រួល និងបានតម្លៃខ្ពស់គ្រាន់បើផងដែរ។
បើតាមរបាយការណ៍របស់មន្ទីរកសិកម្មខេត្តប៉ៃលិន បានឱ្យដឹងថា ផ្ទៃដីដាំដុះដំណាំមៀននៅខេត្តប៉ៃលិន គឺមានចំនួន ១៦០៧ ហិចតា បើគិតជាដើមប្រហែល ២២៤៩៨០ ដើម ៕
អត្តបទ អ៊ុក ទូច
