(ខេត្តកំពត)៖ បញ្ហាទំនាស់ដីធ្លី ដែលពាក់ព័ន្ធនឹងព្រំផ្លូវ និងលំនៅស្ថានរវាងប្រជាពលរដ្ឋ និងម្ចាស់ដីឡូត៍ដែលមានភាពរ៉ាំរ៉ៃ តាំងពីឆ្នាំ២០១៦ ដែលស្ថិតនៅទីតាំងក្នុងមូលដ្ឋានភូមិព្រៃត្នោតឃុំកំពង់គ្រែង ស្រុកទឹកឈូ ខេត្តកំពត ជាយូរឆ្នាំកន្លងមកនោះ ត្រូវបានធ្វើការសម្របសម្រួលដោយអាជ្ញាធរខេត្តកំពត កាលពីរសៀលថ្ងៃទី២៤ខែកុម្ភៈ ឆ្នាំ ២០២០។
ការដោះស្រាយសម្របសម្រួលនេះ ក្រោមការចូលរួមពី លោក ជាវ តាយ អភិបាល នៃគណៈអភិបាលខេត្តកំពត និងមានការចូលរួម ពីលោកអភិបាល រងខេត្តទទួលបន្ទុកការងារដីធ្លីព្រមទាំង ថ្នាក់ដឹកនាំមន្ទីរអង្គភាពពាក់ព័ន្ធ អាជ្ញាធរមូលដ្ឋាន ភូមិឃុំ និងស្រុកទឹកឈូ ដើម្បីបើកកិច្ចប្រជុំសម្របសម្រួលរវាងប្រជពលរដ្ឋនិងម្ចាស់ដីឡូត៍ ដែលជាគូភាគីទំនាស់ ដើម្បីធ្វើការដោះស្រាយ ក្នុងគោលការណ៍ឈ្នះឈ្នះទាំងសងខាងរវាងប្រជាពលរដ្ឋនិងម្ចាស់ដីឡូត៍។
កិច្ច ប្រជុំបន្ទាប់ពីបានស្ដាប់នូវរាយការណ៍បណ្ដឹងកន្លងមករបស់ប្រជាពលរដ្ឋ ដែលបានដាក់ជូនឲ្យអាជ្ញាធរមានសមត្ថកិច្ចជួយ អន្តរាគមន៍ដោះស្រាយ ពាក់ព័ន្ធជាមួយម្ចាស់ដីឡូត៍ ដែលបានបិទផ្លូវឆ្លងកាត់ចេញចូលដីស្រែនិងលំនៅស្ថានរបស់ពួកគាត់ និងមតិសំណូមពររបស់ប្រជាពលរដ្ឋក្នុងកិច្ចប្រជុំនេះ ដែលភាគច្រើន សុំស្នើអោយម្ចាស់ដីឡូត៍ គូភាគីទំនាស់ អោយជួយ សម្របសម្រួលដោះស្រាយបើកផ្លូវអោយពួកគាត់បានធ្វើដំណើរចេញចូលឆ្លងកាត់ដីស្រែឬលំនៅស្ថានរបស់ពួកគាត់រួចមក ។
ជាលទ្ធផលកិច្ចប្រជុំ លោក មជាវ តាយអភិបាលខេត្ត បានធ្វើការសម្របសម្រួលដល់គូភាគីទំនាស់ រវាងប្រជាជននិងម្ចាស់ដីឡូត៍ឱ្យមានការសម្បទានយោគយល់គ្នាទៅវិញទៅមកដោយធ្វើយ៉ាងណា ការដោះស្រាយតាមគោលការណ៍ឈ្នះឈ្នះរវាងភាគីទំនាស់ទាំងសងខាង។
លោកអភិបាល ខេត្ត បានបញ្ជាក់ថា រដ្ឋបាលខេត្តគឺជា សេនាធិការឱ្យរាជរដ្ឋាភិបាលហើយការដោះស្រាយទំនាស់ដីធ្លីក្នុងជំហានដំបូងគឺ រដ្ឋបាលខេត្ត ពុំមានជម្រើសណា ក្រៅពីការសម្របសម្រួលសម្បទានគ្នារវាងភាគីទំនាស់បានឡើយ គឺអនុវត្តន៍ទៅតាមគោលការណ៍ឈ្នះឈ្នះទាំងអស់គ្នា ក្រៅប្រព័ន្ធតុលាការ។
ជាមួយនេះ លោក ជាវ តាយ អភិបាលខេត្ត ក៏បានដាក់សំណូមពរស្នើសុំទៅ ប្រជាពលរដ្ឋឱ្យមានការស្ងប់ចិត្ត រីឯម្ចាស់ដីឡូត៍ដែលបានបិទផ្លូវ សូមឲ្យមានការឆ្លើយតបយ៉ាងឆាប់ ពោលគឺឆ្លើយតបតាមការកំណត់ស្នើសុំរបស់ម្ចាស់ដីឡូត៍ឲ្យបានត្រឹមថ្ងៃទី២៧ ខែកុម្ភៈឆ្នាំ ២០២០ នេះបើពុំដូច្នោះទេរដ្ឋបាលខេត្តនឹងចាត់វិធានការអនុវត្តផ្អែកលើមូលដ្ឋានទៅតាមនីតិវិធីច្បាប់ និងដោយយោងតាមពាក្យប្ដឹងរបស់ប្រជាពលរដ្ឋនិងអាជ្ញាធរមូលដ្ឋាន។
តែទោះបីយ៉ាងណាលោកអភិបាលខេត្តក៏បានសម្ដែងក្ដីសង្ឃឹមចំពោះម្ចាស់ដីឡូត៍នឹងគិតពិចារណាធ្វើការសម្របសម្រួល ក្នុងទឹកចិត្តមនុស្សធម៌ដើម្បីបើកផ្លូវជូនប្រជាពលរដ្ឋប្រើប្រាស់ដោយចាត់ទុកជាខ្មែរកាន់ព្រះពុទ្ធសាសនាក្នុងការធ្វើបុណ្យក៏ដូចជាកិត្តិយសរបស់ខ្លួនផងដែរ។
ចំណែកឯការ ដោះស្រាយធ្វើផ្លូវ មួយខ្សែនៅក្នុងទីតាំងនៃមូលដ្ឋាននោះក្រៅពីមានការសម្របសម្រួលដំណោះស្រាយរួចរាល់ ក្នុងកិច្ចប្រជុំនេះ លោកអភិបាលខេត្តនឹងបានចាត់បញ្ជូនគ្រឿងចក្រឲ្យធ្វើការស្ថាបនាផ្លូវនេះជូនប្រជាពលរដ្ឋប្រើប្រាស់ឲ្យបានឆាប់ៗពេលខាងមុខនេះផងដែរ។
សូមបញ្ជាក់ថា កិច្ចប្រជុំស្ដីពីបញ្ហាទំនាស់ដីធ្លីនេះ បន្ទាប់ពីបានជ្រាបនូវរបាយការណ៍របស់អាជ្ញាធរ ក៏ដូចការស្នើសុំ អន្តរាគមន៍ របស់ប្រជាពលរដ្ឋក្នុងមូលដ្ឋាន ឱ្យមានការសម្របសម្រួល ដោះស្រាយ ជូនពួកគាត់និង ផ្អែកលើ ចំណាត់ការរបស់លោកអភិបាលខេត្តបានចាត់បញ្ជូនឲ្យមន្ត្រីជំនាញ និងអាជ្ញាធរមូលដ្ឋាន មានការចុះសិក្សាស្វែងយល់ជាក់ស្តែងដល់ទីតាំងដីទំនាស់កាលពីពេលថ្មីៗកន្លងទៅនេះ ដើម្បីបានជាមូលដ្ឋានធ្វើការសម្របសម្រួលដោះស្រាយជូនប្រជាពលរដ្ឋឱ្យមានប្រសិទ្ធភាព៕ សេង ណារិទ្ធ
