(ខេត្តកំពត) ៖ នៅព្រឹកថ្ងៃទី២៦ ខែកក្កដាឆ្នាំ២០១៩ លោក ជាវ តាយ អភិបាល នៃគណៈអភិបាលខេត្តកំពត និងជាប្រធានគណៈកម្មាធិការគ្រប់គ្រងដីរដ្ឋថ្នាក់ខេត្តបានអញ្ជើញដឹកនាំកិច្ចប្រជុំគណៈកម្មាធិការគ្រប់គ្រងដីរដ្ឋថ្នាក់ខេត្តដើម្បីត្រួតពិនិត្យអំពីលទ្ធផលនៃការអនុវត្តលើការងារវាស់វែងនិងដោះស្រាយបញ្ហាដីធ្លីជូនប្រជាពលរដ្ឋនៅក្នុងបណ្ដាមូលដ្ឋានឃុំ ស្រុកមួយចំនួនក្នុងខេត្តកំពត។
កិច្ចប្រជុំបន្ទាប់ពីបានរួមគ្នាពិនិត្យពិភាក្សាផ្ដោតលើរបាយការណ៍ព្រមទាំងយន្តការឆ្លើយតបឲ្យមានប្រសិទ្ធភាពអំពីបញ្ហាការងារដោះស្រាយនិងការគ្រប់គ្រងលើវិស័យដីធ្លី ទាំងដីធ្លីជាសម្បត្តិរដ្ឋនិងឯកជនដែលបានលើកឡើងដោយ មន្ទីរ អង្គភាពជំនាញ ពាក់ព័ន្ធក្នុងខេត្តរួចមក។
មានប្រសាសន៍ក្នុងកិច្ចប្រជុំលោក ជាវ តាយ អភិបាលខេត្តបានលើកបញ្ជាក់ថា៖បញ្ហាដីធ្លីគឺជាបញ្ហាដែលកើតឡើងជាញឹកញាប់ក្នុងមូលដ្ឋានមួយចំនួនក្នុងខេត្តនៅទូទាំងប្រទេសមិនថាក្នុងខេត្តកំពតប៉ុណ្ណោះទេ។ ហើយទន្ទឹមនោះ រាជរដ្ឋាភិបាលក្រោមការដឹកនាំរបស់សម្ដេចតេជោហ៊ុន សែន ក៏មិនបានព្រងើយកន្កើយចំពោះបញ្ហានេះដែរ គឺតែងតែបានណែនាំជំរុញដល់សមត្ថកិច្ចពាក់ព័ន្ធគ្រប់ថ្នាក់ ពិសេសអាជ្ញាធរនិងសមត្ថកិច្ចក្នុងខេត្តនីមួយៗត្រូវតែយកចិត្តទុកដាក់ដោះស្រាយជូនប្រជាពលរដ្ឋ អោយបានឆាប់រហ័សដើម្បីផ្ដល់ការកាន់កាប់ដីធ្លីជាកម្មសិទ្ធស្របច្បាប់ សំដៅការកាត់បន្ថយបាននូវជម្លោះដីធ្លីឬប្រើប្រាស់ឲ្យអស់លទ្ធភាពធនធានដីធ្លីក្នុងការរួមចំណែកអភិវឌ្ឍសេដ្ឋកិច្ចសង្គមនិងការកាត់បន្ថយភាពក្រីក្រជាមួយរាជរដ្ឋាភិបាល។
ដូច្នេះកិច្ចប្រជុំពេលនេះគឺក្នុងគោលបំណងដើម្បីពិនិត្យនូវលទ្ធផលការងារដោះស្រាយនិងពង្រឹងយន្តការ លើការងារគ្រប់គ្រងនិងតម្រង់ទិសដៅការងារដឹកនាំដោះស្រាយបន្តពាក់ព័ន្ធលើវិស័យដីធ្លីក្នុងខេត្តឲ្យបានកាន់តែមានប្រសិទ្ធភាពថែមទៀត។
លោក ជាវ តាយ អភិបាលខេត្តក៏បានធ្វើការកត់សម្គល់វាយតម្លៃខ្ពស់ចំពោះលទ្ធផលការងារដែលក្រុមការងារបានខិតខំយកចិត្តទុកដាក់អនុវត្តកន្លងមក។
ប៉ុន្តែទន្ទឹមនឹងនោះបញ្ហាមួយចំនួនក៏នៅតែកើតមានឡើងជាបន្តបន្ទាប់នៅមិនទាន់បានដោះស្រាយចប់ដាច់ជ្រះស្រឡះនៅឡើយដែរ ដែលទាមទារឲ្យអាជ្ញាធរនិង មន្ដ្រីជំនាញយើងត្រូវតែគិតគូរសិក្សាពីបញ្ហាកើតឡើងទាំងអស់នោះឲ្យបានច្បាស់លាស់ ដើម្បីឈានដល់ការដោះស្រាយវះកាត់ឲ្យទទួលបានប្រសិទ្ធភាពព្រោះថាកិច្ចការងារសង្គម គឺមិនអាចបញ្ចប់បានឡើយ ក៏ប៉ុន្តែយើងក៏ត្រូវការទាមទាររួមសហការគ្នា ដើម្បីធ្វើការដោះស្រាយនិងទទួលខុសត្រូវឲ្យបានព្រមគ្នាទើបការងារទាំងនោះសម្រេចបានលទ្ធផលវិជ្ជមាននិងប្រសិទ្ធភាពជោគជ័យ។
លោក ជាវ តាយ ក៏បានណែនាំដល់ក្រុមការងារឲ្យពង្រឹងនិងរៀបចំយន្តការថ្មីបន្ថែមទៀតដើម្បីពន្លឿនការដោះស្រាយបញ្ហាដីធ្លីនៅសេសសល់ដែលកើតឡើងកន្លងមកជូនប្រជាពលរដ្ឋឲ្យបានឆាប់ចប់ក្នុងខេត្តកំពត។ ពិសេសពិនិត្យយកចិត្តទុកដាក់ដោះស្រាយជាសំខាន់លើការកាន់កាប់ដាំដុះនិងរស់នៅជាក់ស្ដែងលើដីធ្លីរបស់ប្រជាពលរដ្ឋឬប្រជាពលរដ្ឋខ្វះដីសម្រាប់លំនៅដ្ឋាននិងបង្កបង្កើនផលពិតប្រាកដដោយអនុវត្តផ្អែកលើលក្ខណៈច្បាប់។
សូមបញ្ជាក់ថា កិច្ចប្រជុំបានផ្ដោតលើឯកសារពិនិត្យលើរបាយការណ៍អំពីលទ្ធផលកាចុះពិនិត្យនិងវាស់វែងដីជូនប្រជាពលរដ្ឋនៅភូមិជ័យសេនាឃុំតាកែនស្រុកឈូក។
របាយការណ៍អំពីលទ្ធផលចុះពិនិត្យស្រាវជ្រាវទីតាំងដីរបស់ប្រជាពលរដ្ឋ ស្ថិតនៅភូមិតេជោអន្លង់ក្មេងលេង ឃុំតេជោអភិវឌ្ឍន៍ស្រុកឈូក។
-របាយការណ៍អំពីលទ្ធផលនៃកិច្ចប្រជុំលើការស្នើសុំធ្វើការអភិវឌ្ឍន៍គម្រោងអេកូទេសចរណ៍និងការអភិវឌ្ឍន៍វារីវប្បកម្មនៅភូមិកំពង់កែស ឃុំត្រពាំងសង្កែស្រុកទឹកឈូ។
-ករណីសំណើសុំការគាំទ្រនិងផ្ដល់ទីតាំងសម្រាប់គម្រោងអភិវឌ្ឍន៍ទេសចរណ៍តំបន់ភ្នំដូង
នៅភូមិបឹងតាព្រាមសង្កាត់ត្រើយកោះក្រុងកំពតរបស់ក្រសួងទេសចរណ៍។
-របាយការណ៍អំពីការចុះពិនិត្យទីតាំងដី របស់បញ្ជាការដ្ឋានតំបន់ប្រតិបត្តិការសឹករងខេត្តធ្វើទីលានសម្រាប់ហ្វឹកហ្វឺនបាញ់គ្រាប់ពិត។
-សំណើសុំឈូសឆាយដីចំការដើម្បីដាំដំណាំកសិកម្មក្នុងភូមិព្រៃពាយឃុំត្រពាំងភ្លាំងស្រុកឈូក។
-សំណើសុំដីកសិកម្ម ដើម្បីបង្កបង្កើនផលរបស់ប្រជាពលរដ្ឋនៅភូមព្រៃពាយឃុំត្រពាំងភ្លាំងស្រុកឈូក៕ សេង ណារិទ្ធ
