ខេត្តមណ្ឌលគីរី ៖ ដោយយោងតាមសំដីរបស់លោកមេឃុំស្រែឈូក ស្រុកកែវសីមា ខេត្តមណ្ឌលគិរី បានប្រាប់ភ្នាក់ងារព័ត៌យើងប្រចាំខេត្ត ឲ្យដឹងថា កាលពីវេលា ម៉ោងប្រមាណ៥ល្ងាចថ្ងៃទី១៦ វិច្ឆិកា ២០១៥ ថា នៅចំណុចភូមិឃុំរបស់លោកមានករណីរថយន្ដបង្កុងមួយគ្រឿង ដឹកឈើ(ពក)ធ្នង់មួយដុំទម្ងន់ប្រមាណជិតបីតោនបើកឆ្លងកាត់ស្ពានអូផ្លាក់ ធ្វើឲ្យបាក់ស្ពាន ។
ហេតុការណ៍នេះបានកើតឡើងកាលពីវេលាម៉ោង៥ និង៣០នាទីល្ងាច ថ្ងៃទី១៦ វិច្ឆិកា ២០១៥ ស្ថិតនៅចំណុចក្រុមរហ៊ូត ភូមិចក់ចា ឃុំស្រែឈូក ស្រុកកែវសីមា ខេត្តមណ្ឌលគិរី។
បើតាមសាក្សីនៅកន្លែងកើតហេតុ និងតៃកុងជាអ្នកបើកបររថយន្ដបង្កុង(រថយន្តកែច្នៃ)បានប្រាប់ឲ្យដឹងថា រថយន្ដខាងលើនេះជារបស់ឈ្មោះ ដុក ដែលមានទីលំនៅភូមិ កាបី ឃុំពីធ្នូ ស្រុកស្នូល ខេត្តក្រចេះ ។
ចំណែកលោក មាឌ វុទ្ធី ប្រធានគំរោងតំបន់អភិរក្សជីវៈចម្រុះសីមា បានប្រាប់ឲ្យដឹងថា លោកកំពុងតែឲ្យមន្ត្រីរបស់លោកចុះទៅពិនិត្យមើលនៅកន្លែងកើតហេតុ នឹងឃាត់ទុកឈើ ដើម្បីចាត់តាមផ្លូវច្បាប់ ផងដែរ ៕
ដោយ ៖ ចិន្ដា កម្ពុជាអភិវឌ្ឍន៍
