ខេត្តប៉ៃលិន ៖ រហូតមកដល់ពេលនេះ បន្ទាប់ពីអាជ្ញាធរក្រុងប៉ៃលិនទទួលបានកញ្ចប់ថវិកាចំនួន១៤៨លានរៀល ពីមន្ទីរបរិស្ថានខេត្ត ក៏បានដាក់ឱ្យក្រុមហ៊ុនអនាម័យខេត្តប៉ៃលិនដេញថ្លៃយក ដោយជួលកម្មករជាច្រើននាក់ឱ្យដើររើសសម្រាមនិងជម្រះស្មៅសម្អាតតាមដងផ្លូវនានានៅទូទាំងក្រុងប៉ៃលិនឱ្យក្លាយទៅជាទីក្រុងស្អាត បរិស្ថានល្អ និងបញ្ចេញសោភ័ណភាពស្រស់ថ្លា ជាទីទាក់ទាញភ្ញៀវទេសចរជាតិ និងអន្តរជាតិគួរឱ្យចង់ចូលមកលេងផងដែរ ។
ជាក់ស្តែងកាលពីវេលាម៉ោង៧ និង៣០នាទីព្រឹកថ្ងៃទី២៩ ខែតុលា ឆ្នាំ២០១៥កន្លង ទៅនេះ ស្ថិតក្នុងភូមិប៉ាហ៊ីជើង ភូមិប៉ាហ៊ីត្បូង អូរតាពុកលើ និងភូមិផ្សេងៗទៀត ក្នុងសង្កាត់ប៉ៃលិន ក្រុងប៉ៃលិន មានក្រុមកម្មករអនាម័យរើសសម្រាមជាច្រើននាក់ បាននាំគ្នាដើរធ្វើការសំអាតតាមដងផ្លូវនានា រួចប្រមូលដាក់១កន្លែង ទុកឱ្យរថយន្តដឹកយកទៅចាក់ចោលនៅទីលានចាក់សម្រាម ។
បើតាមប្រភពព័ត៌មានពី លោក សែប សារ៉ាន់ ហៅចិន អាយុ៥១ឆ្នាំ ជាមេការក្រុមហ៊ុនអានាម័យខេត្តប៉ៃលិនមួយ ឈ្មោះ ”វណ្ណៈភាព” បានរៀបរាប់ឱ្យដឹងថា ការធ្វើអនាម័យរើសម្រាមក្នុងក្រុងប៉ៃលិននេះខាងក្រុមហ៊ុនបានដេញថ្លៃពីអាជ្ញាធរក្រុង រួចជួលប្រជាពលរ ដ្ឋចំនួន៣៦នាក់ ឱ្យធ្វើការដើររើសសម្រាម និងជម្រះស្មៅលើចិញ្ចើមផ្លូវនានាតាមភូមិក្នុងក្រុងរហូតមកដល់ពេលនេះ អស់រយៈពេលជិត១ខែហើយ ដោយម្នាក់ៗ ជួលក្នុង១ខែថ្លៃ៥០ម៉ឺនរៀល ។ ចំណែកកម្មករចំនួន១៨នាក់ទៀត ជាអ្នកលើក និងដឹកសម្រាមយកទៅចាក់ចោលនៅទីលានចាក់សម្រាម ដោយជួលក្នុង១ខែ ថ្លៃ៥៥ម៉ឺនរៀល ។ ការធ្វើអនាម័យដើររើសសម្រាមនេះ ពួកគាត់ម្នាក់ៗត្រូវធ្វើការក្នុង១ថ្ងៃចំងាយ១គីឡូម៉ែត្រ ដោយបែងចែកនៅតាមគោលដៅរៀងៗខ្លួន ។ លោកបញ្ជាក់ទៀតថា ការរើសសម្រាម ចាប់ពីចំណុចស្តេចកន ក្នុងភូមិទួលស្រឡៅ សង្កាត់ទួលល្វា រហូតទៅទល់នឹងភូមិអូរតាវ៉ៅ សង្កាត់អូរតាវ៉ៅ ក្រុងប៉ៃលិន ។ លោកបញ្ជាក់ទៀតថា ក្រោយមកនាពេលថ្មីៗនេះអាជ្ញាធរក្រុង បានទិញធុងដាក់សម្រាមចំនួន៨០ធុង ដើម្បីឱ្យប្រគល់ឱ្យក្រុមហ៊ុនរៀបចំយកទៅដាក់នៅតាមជ្រុងផ្លូវធំៗ និងផ្លូវកែងសាលាខេត្ត។ ចំណែកឯធុងសម្រាមផលិតពីកង់រថយន្តចំនួន១០០ធុងទៀត ខាងក្រុមហ៊ុននឹងយកទៅដាក់នៅតាមក្បែរផ្លូវតូចៗក្នុងក្រុងដែរ ដើម្បីឱ្យបងប្អូនប្រជាពលរដ្ឋយកសម្រាមទៅចាក់ក្នុងធុងនោះ ជៀសវាងបោះចូលពាសវាលពាសកាល នាំឱ្យបាត់បង់សណ្តាប់ធ្នាប់ សោភ័ណភាពក្រុង និងបង្កទៅជាមេរោគប៉ះពាល់ដល់សុខភាពខ្លួនឯង និងអ្នកដទៃ។
ចំណែកលោក ឡូ លុយ អភិបាលរងក្រុងប៉ៃលិន បានឱ្យដឹងតាមទូរស័ព្ទថា ខាងអាជ្ញាធរក្រុងបានទទួលកញ្ចប់ថវិកាចំនួន១៤៨លានរៀលពីមន្ទីរបរិស្ថានខេត្ត រួចដាក់ឱ្យម្ចាស់ក្រុមហ៊ុនអនាម័យខេត្តប៉ៃលិន ដេញថ្លៃយកទៅរៀបចំ ជួលកម្មករ និងទិញធុងសម្រាម ព្រមទាំងដាក់បិទបដាប្រកាសសេចក្តីជូនបងប្អូនប្រជាពលរដ្ឋឱ្យជ្រាបច្បាស់ ដោយនៅថ្ងៃខាងមុខ មិនត្រូវបន្តបោះសម្រាមចោលផ្តេសផ្តាសឡើយ ។
លោកក៏បានសំណូមពរឱ្យបងប្អូនប្រជាពលរដ្ឋទាំងអស់ក្នុងខេត្តប៉ៃលិនយកចិត្តទុកដាក់ថែរក្សាអនាម័យក្រុងទាំងអស់គ្នា ដោយទីក្រុងអាចស្អាតទៅបាន លុះត្រាតែចេះអ នាម័យចាប់ពីខ្លួនយើងម្នាក់ៗ ជាមុនសិន នោះអ្នកដទៃឃើញគេនឹងធ្វើតាមយើងជាក់ជាមិ នខានឡើយ។
សូមបញ្ជាក់ថា នេះជាលើកទី១ហើយ ដែលអាជ្ញាធរក្រុងប៉ៃលិនរៀបចំអនាម័យជួល កម្មករអោយរើសសម្រាមអនាម័យខេត្ត ៕
អត្ថបទ រតនៈ
