ខេត្តប៉ៃលិន ៖ តាមរយៈដីកាលេខ ៥៩ (ចៅក្រមបន្ទប់“ក”)ចុះថ្ងៃទី ០៧ ខែឧសភា ឆ្នាំ២០១៥ ដែលចេញដោយលោក លាង សួគ៌ ប្រធានសាលាដំបូងខេត្តប៉ៃលិន ។
ដីដែលអាជ្ញាធរខេត្តដោះដូរឱ្យប្រជាពលរដ្ឋរស់នៅតំបន់សម្បុកចាប ស្ថិតក្នុងភូមិ ផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន មករស់នៅដីថ្មីចំណុចអូរតាសៀម ជាប់ក្រវាត់ព្រំដែនក្នុងភូមិ ផ្សារព្រំដដែលនោះ ត្រូវបានគេមើលឃើញថា ជាដីដែលមានការពាក់ព័ន្ធដីកាសម្រេចរក្សាការពាររបស់សាលាដំបូង ខេត្តប៉ៃលិន ។
បើតាមខ្លឹមសារដីកាសម្រេចរក្សាការពារបង្ហាញថា ជាដីដែលមានទំនាស់មិនទាន់ដោះស្រាយរួចរាល់នៅ ឡើយនោះទេ ភាគីម្ចាស់ទំនាស់នោះគឺលោក យិន សាវុធ ហៅ អ៊ុង វណ្ណៈ ជាម្ចាស់បំណុលជាមួយលោក ឌី ហុក និងឈ្មោះ នង ស៊ីវត្ថាន ជាសហកូនបំណុល ។ តាមខ្លឹមសារដីកា គឺបានសម្រេចថា ហាមឃាត់បន្ទាន់លើសហកូន បំណុលឈ្មោះ ឌី ហុក និងឈ្មោះ នង ស៊ីវត្ថាន ព្រមទាំងតតិយជនផ្សេងៗទៀតមិនឱ្យលក់-ដូរ ជួលបញ្ចាំ ផ្ទេរសិទ្ធិ ឬកម្មសិទ្ធិធ្វើអំណោយ ឬមរតក ដាក់ធានាដាក់ហ៊ីប៉ូតែក ទៅឱ្យអ្នកដទៃ និងមិនឱ្យសាងសង់សំណង់ដាំដំណាំ និងឈូសឆាយផ្សេងៗនៅលើអចលនវត្ថុនេះទេ ។
លោក យិន សាវុធ ហៅ អ៊ុង វណ្ណៈ ជាមនុស្សពិការភ្នែកទាំងពីរ និងជាម្ចាស់ដីបានរៀបរាប់ឱ្យដឹងថា គាត់ មានដីទំហំ ២០ម៉ែត្រ គុណ ៥០ម៉ែត្រ បានកាន់កាប់តាំងពីឆ្នាំ២០០០ មកម្ល៉េះ ជាដីរបបមេភូមិចែកឱ្យតែក្រោយមក នៅថ្ងៃទី ៣០ ខែមិនា ឆ្នាំ២០១០ រូបគាត់បានទៅបោះបង្គោលព្រំដីបន្ថែមតែត្រូវឈ្មោះ ឌី ហុក មកវាយបំផ្លាញ ចោលអស់ ព្រមទាំងប្រាប់គាត់ថា បានទិញដីនេះពីឈ្មោះ ប៉ាក ប៊ុននឿន ទៅហើយតែតាមពិតដីដែល ឌី ហុក ទិញនេះជាដីឡូតិ៍ផ្សេងទៅវិញនោះទេ ។
លោកបន្តថា ចាប់តាំងពីពេលនោះមករូបគាត់បានដាក់ពាក្យប្តឹងទៅមេឃុំ មេស្រុក-ខេត្ត រហូតដល់តុលា ការហើយតុលាការបានចេញដីកាសម្រេចរក្សាការពារទៀតផង ។ រូបគាត់បានស្នើសុំសម្តេចអគ្គមហាសេនាបតីតេ ជោ ហ៊ុន សែន មេត្តាជួយរូបគាត់ផង ព្រោះរូបគាត់មានតែដីមួយនេះទេ សម្រាប់រស់នៅហើយណាមួយខ្លួនគាត់ជា អ្នកពីការទៀត ពុំបានទៅរកអ្វីជាដុំកំភួនដើម្បីទ្រទ្រង់ជីវភាពឡើយ ។
តាមប្រភពព័ត៌មានមួយផ្សេងទៀតបានឱ្យដឹងថា នៅថ្ងៃទី ២០ ខែតុលា ឆ្នាំ២០១៥ បែរជាមានបុរសម្នាក់ ឈ្មោះ ភិន វ៉ាន់ ហៅប្រុស ជាសមាជិកក្រុមការងារគណៈកម្មការដើម្បីចុះស្រង់ទិន្នន័យចំនួនខ្នងផ្ទះនៅចំណុចតំបន់ សម្បុកចាបមកហែកដីកាយកទៅបំផ្លាញចោលដោយមិនខ្លាចដីការបស់តុលាការឡើយ ។
ទង្វើនេះត្រូវបានគេនិយាយថា មើលទៅដីកាអ្វីដែលចេញដោយតុលាការ គឺពុំមានប្រសិទ្ធភាពនោះទេ បើ បុគ្គលឈ្មោះ ភិន វ៉ាន ហៅប្រុស នេះមិនខ្លាចផងនោះ តើបុគ្គលម្នាក់នេះយកច្បាប់ទៅទុកឯណា ?
ក្នុងនោះ លោក ប្រធានមន្ទីរសាធារណៈការ និងដឹកជញ្ជូនបានយកគ្រឿងចក្រ១គ្រឿង កំពុងតែកាយគម្រប លូចេញដើម្បីយកកាកសំណល់ចេញពីក្នុងលូនៅពេលនោះមានបុរសម្នាក់ឈ្មោះ ភិន វ៉ាន ហៅប្រុស បានបើកបររថ យន្តទំនើប មកហាមដល់គណៈកម្មការនៅកន្លែងកាយលូរួចហើយ ក៏បានប្រើពាក្យសម្តីប្រមាងលោកអភិបាលស្រុក និងប្រមាថមើលងាយដល់ក្រុមការងារដែលចុះពិនិត្យប្រព័ន្ធលូថែមទៀតផង ។
ពាក់ព័ន្ធនឹងបញ្ហានេះដែរ អ្នកសារព័ត៌មានយើងមិនសុំការបំភ្លឺពីលោក ភិន វ៉ាន់ ហៅប្រុស បានទេ ព្រោះទូរស័ព្ទមិនចូល ។ កាលពីថ្ងៃទី ២០ រហូតមកដល់ថ្ងៃទី ២៣ ខែតុលា ឆ្នាំ២០១៥ មានគណៈកម្មការនិង ប្រធានមន្ទីរបរិស្ថាន លោកប្រធានមន្ទីរសាធារណការ និងដឹកជញ្ជូនខេត្ត លោកអភិបាលស្រុក សាលាក្រៅ និងមន្ត្រីជំនាញឃុំ-ស្រុក-ខេត្ត ព្រមទាំងមន្ទីរព័ត៌មានខេត្តប៉ៃលិនទាំងអស់ បានចុះទៅពិនិត្យប្រព័ន្ធលូនៅលើផ្លូវ ជាតិលេខ ៥៧ ចំណុចខាងត្បូងវត្តផ្សារព្រំ ក្នុងភូមិផ្សារព្រំ ដែលមានសំរាមកកស្ទះក្នុងលូហើយមានទាំងដី ។
សារព័ត៌មានយើងនឹងព្យាយាមសុំការទាក់ទងបន្ថែមទៀតនៅបញ្ហាខាងលើឱ្យបានជាក់ច្បាស់ ។/
