នៅថ្ងៃចន្ទ ទី២ ខែមីនា ឆ្នាំ២០២៦ នៅសាលប្រជុំព្រៃបាសាក់ (អគារ ខ) សាលាខេត្តស្វាយរៀង បានរៀបចំកិច្ចប្រជុំពិភាក្សា ដើម្បីពិនិត្យលើករណីសំណើសុំដីស្ថិតក្នុងភូមិសាស្ត្រស្រុករមាសហែក សម្រាប់សាងសង់ ទីតាំងបម្រើឱ្យវិស័យ អប់រំ បណ្តុះបណ្តាលវិជ្ជាជីវៈ វិស័យសង្គមកិច្ច និងវិស័យការពារជាតិ ក្រោមអធិបតីភាពលោក ហម សារាវុធ អគ្គនាយករងរដ្ឋបាលព្រៃឈើ តំណាងឯកឧត្ដម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោក ម៉ែន អេង អភិបាលរង តំណាងឯកឧត្ដម ប៉េង ពោធិ៍សា អភិបាលខេត្តស្វាយរៀង។ ពិធីនេះមានការអញ្ជើញចូលរួមពីលោកឧត្តមសេនីយ៍ត្រីមេបញ្ជាការតំបន់ប្រតិបត្តិការសឹករងស្វាយរៀង មន្ទីរ អង្គភាពពាក់ព័ន្ធ អាជ្ញាធរមូលដ្ឋាន និងក្រុមការងារបច្ចេកទេសពីក្រសួងកសិកម្មផងដែរ។
កិច្ចប្រជុំបានផ្តោតការពិភាក្សាយ៉ាងលម្អិតលើការស្នើសុំកាត់ឆ្វៀល ឬប្រើប្រាស់ផ្ទៃដីសរុបចំនួន ២៤២ ហិកតា ដែលស្ថិតក្នុងស្រុករមាសហែក ដើម្បីយកទៅប្រើប្រាស់ជាប្រយោជន៍សាធារណៈ និងការអភិវឌ្ឍតាមវិស័យយុទ្ធសាស្ត្ររបស់រដ្ឋ រួមមាន៖
១. វិស័យអប់រំ៖ ការសាងសង់គ្រឹះស្ថានសិក្សា។
២. បណ្តុះបណ្តាលវិជ្ជាជីវៈ៖ ការបង្កើតមជ្ឈមណ្ឌលបណ្តុះបណ្តាលជំនាញបច្ចេកទេសដល់យុវជន។
៣. វិស័យសង្គមកិច្ច៖ ការរៀបចំសាងសង់មណ្ឌលអប់រំ បន្សាប ព្យាបាល និងស្តារនីតិសម្បទាអ្នកញៀនគ្រឿងញៀន។
៤. វិស័យការពារជាតិ៖ ការសាងសង់មណ្ឌលហ្វឹកហ្វឺន និងពង្រឹងហេដ្ឋារចនាសម្ព័ន្ធការពារជាតិក្នុងតំបន់។
ក្នុងជំនួបពិភាក្សានេះ តំណាងរដ្ឋបាលខេត្ត និងតំណាងក្រសួងកសិកម្ម បានធ្វើការផ្លាស់ប្តូរមតិយោបល់លើទិដ្ឋភាពច្បាប់ ស្ថានភាពដីជាក់ស្តែង និងផលប៉ះពាល់ផ្សេងៗ ដើម្បីធានាថាការប្រើប្រាស់ដីនេះស្របតាមនីតិវិធីជាធរមាន និងបម្រើឱ្យផលប្រយោជន៍ប្រជាពលរដ្ឋបានពិតប្រាកដ។ ក្រុមការងារបានបន្តចុះពិនិត្យទីតាំងជាក់ស្តែង និងរៀបចំជារបាយការណ៍ដាក់ជូនថ្នាក់ដឹកនាំ ដើម្បីសុំការសម្រេចជាបន្តទៀត។
កិច្ចប្រជុំ និងការចុះពិនិត្យនេះ បានបញ្ចប់ទៅដោយជោគជ័យ និងទទួលបានលទ្ធផលជាវិជ្ជមាន ដែលជាជំហានដ៏សំខាន់ក្នុងការជំរុញការអភិវឌ្ឍខេត្តស្វាយរៀងឱ្យកាន់តែរីកចម្រើន៕
