ឯកឧត្តម សាយ សំអាល់ ឧបនាយករដ្ឋមន្ត្រី ជារដ្ឋមន្ត្រីក្រសួងដែនដីនគរូបនីយកម្ម និងសំណង់ ជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ បានមានប្រសាសន៍ថា ប្រជាការពារមានតួនាទីសំខាន់ក្នុងការចូលរួមជួយមន្ត្រីនគរបាលទៅវិញទៅមក។ ឯកឧត្តម ឧបនាយករដ្ឋមន្ត្រី បានមាន ប្រសាសន៍ដូចនេះ នារសៀល ថ្ងៃទី០៥ ខែកក្កដា ឆ្នាំ ២០២៥ នៅក្នុងឱកាសជួបសំសំណេះ សំណាល និងប្រគល់ឯកសណ្ឋានសម្ភារៈជូនប្រជាការពារភូមិទាំង ១៥ ចំនួន ៣៩២រូប ចំណុះសង្កាត់ទាំង៤ ក្រុងព្រះសីហនុ ខេត្តព្រះសីហនុ ។
ឯកឧត្តម ឧបនាយករដ្ឋមន្ត្រី បានបន្ថែមថា យើងកុំគិតថា យើងមិន មែនជាមន្ត្រីក្របខណ្ឌ កុំគិតថាយើងជាមន្ត្រីនគរបាល កុំគិតថា យើងជាមន្ត្រីយុត្តិធម៌ដូចកងរាជ អាវុធហត្ថ ព្រោះយើងជាអ្នកស្រឡាញ់ខេត្តព្រះសីហនុ ដូច្នេះយើងត្រូវចូលរួមជាមួយគ្នា ព្រោះប្រជាការពារបានធ្វើការងារយ៉ាង ច្រើននៅក្នុងមូលដ្ឋានគ្រប់បែប យ៉ាងក្នុងការចូលរួមការងារអនាម័យបរិស្ថាន និងសូមថ្លែងអ ណរគុណដល់ប្រជាការពាររបស់យើង និងសូមបន្តការងារដ៏ឧត្តុងឧត្តមរបស់បងប្អូនបន្ថែមទៀត។
ឯកឧត្តម សាយ សំអាល់ បានបញ្ជាក់ថា ការប្រគល់ឯកសណ្ឋាននាពេលនេះ គឺជាកិត្តិយស និងជានិមិត្តរូបនៃការទទួលស្គាល់ប្រជាការពាររបស់អ្នកកំពង់សោម យើងអាចបង្កើតវប្បធម៌បំពេញការងារជាមួយគ្នា ដោយសារលោកស្នង ការខេត្តព្រះសីហនុ បានជួយ ឧបត្ថម្ភនូវឯកសណ្ឋានមានសម្លៀកបំពាក់ ស្បែកជើង ដែលជាឯកសណ្ឋានច្បាស់លាស់ យើងត្រូវចូលរួមជ្រោមជ្រែងអនុវត្តនូវគោលនយោបាយ ភូមិ ឃុំ សង្កាត់មានសុវត្ថិភាព ក្នុងការកសាងខេត្តព្រះសីហនុជាភូមិដ្ឋានក្រេមក្សាន្ត ២៤ម៉ោង លើ២៤ម៉ោង កុំឱ្យភ្ញៀវមកលេងហើយមានការព្រួយបារម្មណ៍ ព្រោះទីក្រុងកំពង់សោម ជាទីក្រុងអន្តរជាតិ។ ទន្ទឹមនោះយើងត្រូវចេះបដិសណ្ឋាកិច្ចចំពោះភ្ញៀវទេសចរជាតិ និងអន្តរជាតិ ហើយប្រជាការពាររបស់យើងត្រូវចូលរួមជាមួយរដ្ឋបាលខេត្ត រដ្ឋបាលក្រុង ស្នងការដ្ឋាននគរបាលខេត្ត និងបញ្ជាការកងរាជអាវុធហត្ថខេត្ត ដើម្បីប្រែក្លាយខេត្តព្រះសីហនុ ជាខេត្តសម្បុរសប្បាយមានការអភិវឌ្ឍរីកចម្រើននាពេលខាងមុខ។
ក្នុងឱកាសនោះ ឯកឧត្តម ប្រធានក្រុមការងារ ក៏បាននាំយកថវិការបស់សម្តេចធិបតី ហ៊ុន ម៉ាណែត និងលោកជំទាវបណ្ឌិត ឧបត្ថម្ភជូនប្រជាការពារទាំង ៣៩២នាក់ ក្នុងម្នាក់ទទួលបានថវិកា ៥ម៉ឺនរៀល និងជូនស្នងការដ្ឋាននគរបាលខេត្តព្រះសីហនុ ចំនួន ៥,០០០ពាន់ដុល្លាអាមេរិក៕
