ទាហានថៃឃាត់ខ្លួនខ្មែរពីរនាក់ ដែលនាំបារីគេចពន្ធចូលដីថៃជាង ១.៥០០០ កញ្ចប់ ប្រទេសថៃ,ស្រុកខ្លងហាត  

ជនជាតិខ្មែរចំនួនពីរនាក់ ត្រូវបានទាហានព្រំដែនថៃឃាត់ខ្លួន បន្ទាប់ពីជនជាតិខ្មែរទាំងពីរនាក់នេះកំពុងលីការ៉ុងដែលសុទ្ធសឹងជាបារី រាប់ម៉ឺនកញ្ចប់ឆ្លងដែនចូលទឹកដីថៃ ដោយគ្មានការអនុញ្ញាត។
យោងតាមការផ្សាយរបស់គេហទំព័រក្នុងប្រទេសថៃបានលើកឡើងថា កម្លាំងកងទ័ពជួរមុខថៃបានធ្វើការល្បាតតាមខ្សែបន្ទាត់ព្រំដែនកាលពីរសៀលថ្ងៃទី ៥ ខែកក្កដា ឆ្នាំ២០២៥ ក៏បានសង្កេតឃើញមានមនុស្សពីរនាក់កំពុងឈររេរាជាមួយនឹងការ៉ុងពណ៌ក្រហមជាច្រើនការ៉ុង។
នៅពេលនោះដែរកម្លាំងយោធាព្រំដែនថៃ បានចុះត្រួតពិនិត្យទើបដឹងថាក្នុងការ៉ុងទាំងនោះសុទ្ធតែជាបុរីបរទេសដែលបម្រុងនាំចូលទៅក្នុងផ្សារខៅឌីនតាមច្រកខាងក្រោយផ្សារ ទើបយោធាថៃឃាត់ខ្លួនតែម្ដង។ ពួកគេទាំងពីរនាក់មានឈ្មោះ ១.កៀត កាយ ភេទប្រុស អាយុ៣៦ឆ្នាំ និង ២.ខាយ ឈឿន ភេទប្រុស អាយុ២២ឆ្នាំ ជាជនជាតិខ្មែរ រួមជាមួយនឹងបារីចំនួន ១៥.៦០០ កញ្ចប់ ។
ពួកគេបានសារភាពថា បារីទាំងនេះគឺបាននាំចេញតាមច្រកប៉ុស្តិ៍គីឡូ ៩ ដែលគ្រប់គ្រងដោយកម្លាំងវរៈការពារព្រំដែនគោកលេខ ៨១៧ ទល់មុខនឹងច្រក ៧៧ ថៃ ក្នុងឃុំក្លងហាត ស្រុកក្លងហាត ខេត្តស្រះកែវ ដែលខាងកម្ពុជា គឺច្រកនេះស្ថិតនៅចំណុច ប៉ុស្តិ៍គីឡូ៩ ស្រុកសំពៅលូន ។ បច្ចុប្បន្នជនជាតិខ្មែរទាំងពីររូបរួមនឹងវត្ថុតាង ត្រូវបានកម្លាំងយោធាថៃបញ្ជូនទៅកាន់អង្គភាពគយនិងរដ្ឋាករ ខេត្តស្រះកែវហើយដើម្បីអនុវត្តតាមផ្លូវច្បាប់ ៕ទៀវ  ដារិន