នាព្រឹកថ្ងៃទី០១ខែកក្កដាឆ្នាំ២០២៥នេះ ឯកឧត្តមសន្តិបណ្ឌិត ចាន់ អ៊ាន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម អភិសន្តិបណ្ឌិត ស សុខា ឧបនាយរដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតីភាព ក្នុងពិធីប្រកាសចូលកាន់មុខតំណែងអភិបាលរងនៃគណៈអភិបាលខេត្តឧត្តរមានជ័យ ដោយលោក ម៉េត មាសភក្ដី ត្រូវបានតែងតាំងជាអភិបាលរងខេត្តឧត្ដរមានជ័យថ្មី ។ ក្នុងពិធីនេះក៏មានការអញ្ជើញចូលរួមពីឯកឧត្ដម ប្រធានក្រុមប្រឹក្សាខេត្ត រួមទាំងប្រធាន អនុប្រធានមន្ទីរ អង្គភាពពាក់ព័ន្ធយ៉ាងឱឡារិកផងដែរ។
លោក ម៉េត មាសភក្ដី ដែលទើបនិងចូលកាន់តំណែងជាអភិបាលរងខេត្តឧត្ដរមានជ័យថ្មី បានធ្វើការប្តេជ្ញា ថានឹងខិតខំប្រឹងប្រែងបំពេញការងារឲ្យបានល្អ គោរពតាមតួនាទី ដើម្បីបម្រើផលប្រយោជន៍ជូនប្រជាពលរដ្ឋ នៅតាមមូលដ្ឋាន ឲ្យបានល្អបំផុត និងបំពេញភារៈកិច្ច របស់ខ្លួនឲ្យបាន ល្អប្រសើរ គោរពការពារ ជាដាច់ខាតរដ្ឋធម្មនុញ្ញនៃព្រះរាជាណាចក្រកម្ពុជា។
ឯកឧត្តមសន្តិបណ្ឌិត ចាន់ អ៊ាន មានប្រសាសន៍ថា អភិបាលរងខេត្តឧត្ដរមានជ័យ ដែលចូលកាន់មុខតំណែងថ្មីនេះ ត្រូវតែគោរព និងអនុវត្តឱ្យបានយ៉ាងម៉ឺងម៉ាត់ តាមឋានានុក្រមដឹកនាំរបស់រាជរដ្ឋាភិបាលកម្ពុជា ក្រសួងមហាផ្ទៃ ដើម្បីសម្រេចឱ្យបានជោគជ័យនូវគ្រប់កម្មវិធីនយោបាយ និងយុទ្ធសាស្រ្តចតុកោណ សំដៅលើកកម្ពស់អភិបាលកិច្ចល្អ រួមចំណែកកាត់បន្ថយភាពក្រីក្រ ជូនប្រជាពលរដ្ឋ។
ឯកឧត្តមសន្តិបណ្ឌិត រដ្ឋលេខាធិការ ក៏បានផ្ដាំផ្ញើរដល់ អភិបាលរងខេត្តឧត្ដរមានជ័យថ្មី ត្រូវបង្កើនសាមគ្គីភាព ឯកភាពផ្ទៃក្នុងជាមួយថ្នាក់ដឹកនាំគ្រប់លំដាប់ថ្នាក់ ក្នុងជួររដ្ឋបាលខេត្ត រដ្ឋបាលក្រុងស្រុក ក៏ដូចជាបង្កើនទំនាក់ទំនងល្អជាមួយបណ្តាអង្គភាពពាក់ពន្ធ័ សមាគម និងអង្គការនានា ដើម្បីរួមចំណែកសម្រេចបានជោគជ័យគ្រប់ផែនការការងារ និងបង្កើតជំនឿចិត្តពីសំណាក់ប្រជាពលរដ្ឋផងដែរ៕ដោយ៖លួនហាក់ឡី៕
