ក្រោយទទួលដំណឹងថា មានពលករខ្មែរម្នាក់ជួបគ្រោះថ្នាក់ចរាចរណ៍នៅប្រទេសថៃ ដោយមិនមានការព្យាបាល ព្រមទាំងទុកចោលនោះ លោកស្រី បាន ស្រីមុំ អភិបាលនៃគណៈអភិបាលខេត្តប៉ៃលិន បានធ្វើការទំនាក់ទំនងភ្លាមៗ ទៅភាគីប្រទេសថៃ ដើម្បីបញ្ជូនពលករយកមកព្យាបាលទាន់ពេលវេលា នៅថ្ងៃទី២៧ ខែមិថុនានេះ។ នេះបើតាមការបញ្ជាក់ឱ្យដឹងពីលោក សែត វិចិត្រ នាយករដ្ឋបាលសាលាខេត្តប៉ៃលិន។
បើតាមលោក សែត វិចិត្រ ថ្លៃព្យាបាល និងការធ្វើដំណើរ ព្រមទាំងអាហារសម្រាប់ពលកររងគ្រោះ គឺមានការឧបត្ថម្ភទាំងស្រុង ពីលោកស្រី បាន ស្រីមុំ អភិបាលខេត្តប៉ៃលិន ដែលនេះសរបញ្ជាក់ពីការយកចិត្តទុកដាក់ខ្ពស់ ចំពោះសុខទុក្ខរបស់ពលករចំណាកស្រុក ដែលវិលត្រឡប់មកពីប្រទេសថៃ។
ពលករខ្មែរ ដែលជួបគ្រោះថ្នាក់ចរាចរណ៍ មានឈ្មោះ ង៉ែត សុភ័ស្ស ភេទប្រុស អាយុ៣៨ឆ្នាំ ជាកម្មករធ្វើការនៅប្រទេសថៃ មានអាការៈធ្ងន់ធ្ងរមួយចំហៀងខ្លួន មានទីលំនៅ ភូមិគោកឃ្មុំ ឃុំគោកឃ្មុំ ស្រុកថ្មគោល ខេត្តបាត់ដំបង និងមានប្រពន្ធឈ្មោះ រឿន មករា រស់នៅជាមួយគ្នា។
បើតាមស្ត្រីឈ្មោះ រឿន មករា ដែលជាភរិយារបស់ពលកររងគ្រោះ បានឲ្យដឹងថា ប្តីរបស់គាត់ជួបគ្រោះថ្នាក់ចរាចរណ៍នៅថ្ងៃទី២៥ ខែមិថុនានេះ វេលាម៉ោង៩យប់ ខណៈដើរទៅទិញម្ហូប យកមកហូបជុំគ្រួសារ ក៍ត្រូវបានរថយន្តថៃមួយគ្រឿង បើកមកបុកពីក្រោយក្នុងទិសដៅស្របគ្នា បណ្តាលឲ្យប្តីរបស់គាត់ខ្ទាតទៅប៉ះបង្គោលក្បែរផ្លូវ ហើយត្រូវបានម្ចាស់បង្គោលទារឲ្យសងថ្លៃខូចខាតចំនួន ៣ម៉ឺនបាត ស្មើរលុយខ្មែរជាង ៣លានរៀល។
ប្រពន្ធពលកររងគ្រោះ ក៍បានបញ្ជាក់ដែរថា ប្តីរបស់គាត់គ្រោះថ្នាក់រហូតសន្លប់នៅហ្នឹងកន្លែង យកទៅព្យាបាលក៍គេមិនមើល ដោយទុកប្តីរបស់គាត់ចោល ព្រោះតែគាត់មិនមានលុយព្យាបាល ទើបតែថ្ងៃទី២៧ ខែមិថុនា ឆ្នាំ២០២៥ ក៍ភាគីថៃ បញ្ជូនប្តីមកប្រទេសខ្មែរវិញទាំងឈឺមិនដឹងខ្លូន តែត្រូវបានក្រុមគ្រូពេទ្យ និងមន្ត្រីច្រកទាំងអស់ជួយសង្គ្រោះ។
ជាមួយនេះ រូបគាត់និងក្រុមគ្រសារ បានថ្លែងអំណរគុណដល់អភិបាលខេត្តប៉ៃលិន ដែលតែងតែគិតគូរ និងយកចិត្តទុកដាក់ ចំពោះសុខទុក្ខរបស់ប្រជាពលរដ្ឋ និងពលករចំណាកស្រុក ពិសេសបានចាត់ក្រុមគ្រូពេទ្យជំនាញ ជួយព្យាបាលជំងឺ និងឧបត្ថម្ភថវិកា ទាំងថ្លៃព្យាបាល និងថ្លៃធ្វើដំណើរ ព្រមទាំងអាហារ ដល់គ្រួសាររបស់គាត់។
ការយកចិត្តទុកដាក់នេះ មិនត្រឹមតែជាការលើកទឹកចិត្តប៉ុណ្ណោះទេ ប៉ុន្តែថែមទាំងជាសកម្មភាពជាក់ស្តែង ក្នុងការជួយដោះស្រាយបញ្ហាប្រឈមនានា ដែលពលករជួបប្រទះ។ អ្វីដែលកាន់តែពិសេសនោះ គឺលោកស្រីអភិបាលខេត្ត បានផ្តល់សេវារថយន្តជូនទៅដល់ស្រុកកំណើតដោយឥតគិតថ្លៃ សម្រាប់ពលករដែលវិលត្រឡប់មកពីប្រទេសថៃ ដែលនេះជាការជួយសម្រួល ដល់ការធ្វើដំណើររបស់ពួកគាត់ បានយ៉ាងច្រើន និងកាត់បន្ថយការចំណាយ ហើយសកម្មភាពទាំងនេះបានបង្ហាញ ពីការទទួលខុសត្រូវខ្ពស់ និងភាពជាអ្នកដឹកនាំដ៏ល្អរបស់លោកជំទាវក្នុងការបម្រើប្រជាជន៕
